PA Kategorial GBKP Tgl. 1 - 7 Oktober 2017

PA MAMRE GBKP TGL. 1 - 7 OKTOBER 2017

Nrs. Pdt. L. Sinuhadji (Bp. Rey Tarigan)

Pinakit Sosial

Ogen : Heber 13:5; 1 Timotius 6:10

Tema : JUDI

Tujun gelah Mamre ngergaken si ibereken Dibata janah makekenca guna kemulian Dibata

Metode : Diskusi

Penjelasan Bahan Ogen & Aplikasi

Ogenta si pemena e me salah sada pedah praktis i bas rasul si la tersinget gelarna nari man perpulungen kalak Heber si tek man Yesus Kristus paksa si e. Isi pedahna e me pemahamen kiniteken si mehuli kerna duit nina, “I bas geluhndu ola kam merangap nandangi duit. Ermengkahlah atendu asa si lit i bas kam. Sabap nina Dibata, “Asa ndigan pe la kam Kutadingken, asa ndigan pe la kam Kupulahi”, i bas terj. TB-LAI nina, “Janganlah kamu menjadi hamba uang dan cukupkanlah dirimu dengan apa yang ada padamu. Karena Allah telah berfirman: “Aku sekali-kali tidak akan membiarkan engkau dan Aku sekali-kali tidak akan meninggalkan engkau”. “Ola kam merangap nandangi duit” i bas  bhs. Yunani nina aphilagyros ertina : tidak mencintai uang atau tidak serakah. Kerna pedah enda akap kami enggo jelas nilai kinitekenna nandangi duit entah pe erta kebayaken doni enda, sebab si jadi pusat i bas kiniteken Kristen labo duit entah pe erta kebayaken doni tapi kiniteken man Yesus Kristus. Si jadi penungkunen mungkin kai si jadi latar belakang ayat enda?

I bas kebiasaan geluh kalak Yunani paksa si e lit budaya hedonisme, akar katana e me hedone ertina kenikmatan ras kesenangan doni enda. Hedonisme e me gaya hidup si njadiken kenikmatan fisik ras kesenangan psikis sebage tujun si utamana geluh i doni enda. I bas si e duit entah pe erta kebayaken doni tuhu-tuhu jadi perayaken sebab arah e nge kenikmatan fisik ras kesenangan psikis banci situkur. Tapi enggo radu ras siteh maka kenikmaten ras kesenangen doni enda sementara saja sifatna, la banci mereken kebahagiaan si tuhu-tuhu. I bas konteks geluh si bagenda penulis surat Heber nehken pedah si tujunna gelah perpulungen ula terbaba arus, ula fokus ku bas kenikmatan ras kesenangan doni si sifatna sementara, tapi arus fokus i bas erkiniteken man Dibata, sebab Dibata si erkuasa ncukupken kerina kebutuhen geluh janah i bas Dibata lit kesenangan si tuhu-tuhu. Erdahin guna ndatken duit entah pe erta kebayaken doni enda labo ilarang, saja ula sempat duit entah pe erta kebayaken doni enda ngkuasai geluh kalak si tek entah pe ijadiken tuhan.

Ogenta si peduaken e me salah sada pedah rasul Paulus man anak rohanina Timotius bage pe man peminpin-peminpin perpulungen paksa si e nandangi duit entah pe erta kebayaken doni enda. Nina, “Sabap merangap nandangi duit e me sumbul kerina kejahaten. Enggo lit piga-piga kalak si merangap nandangi duit lanai tetap i bas kiniteken janah gulut ukurna ibahan erbage-bage kecedan ate”. I bas terj. bhs. Ind., nina “Karena akar segala kejahatan ialah cinta uang. Sebab oleh memburu uanglah beberapa orang telah menyimpang dari iman dan menyiksa dirinya dengan berbagai-bagai duka”. Adi sioge benaken ay. 3 nari teridah latar belakang si jadi ogenta sendah, lit sebagin perpulungen si merangap nandangi erta kebayaken seh makana imanfaatkenna perpulungen kalak si tek guna ndatken erta kebayaken alu ajaren-ajaren si papak.

Tema i bas PA-nta sendah “Judi” alu tujun gelah Mamre ngergaken si ibereken Dibata janah makekenca guna kemulian Dibata. Kerna tema sendah akap kami enggo pernah sibahas i bas PJJ Tgl. 16 - 22 Juli 2017 si lepas. Adi rikutken ogenta sendah duana banci ikataken judi e me salah sada bentuk merangap nandangi duit entah pe erta kebayaken doni enda. Menurut Kamus Besar Bahasa Indonesia (KBBI), judi e me mempertaruhkan sejumlah uang (harta) dalam permainan tebakan berdasarkan kebetulan dengan tujuan mendapatkan sejumlah uang atau harta yang lebih besar dari uang (harta) semula. Lit bermacam-macam judi : togel, sabung ayam, judi kartu (joker karo), judi mesin koin, judi on line, rsd. Janah lit pengakap, maka salah sada cara tercepat ndatken erta kebayaken e me kap melalui erjudi. Walaupe Pustaka si Badia la lit nuratken kata “judi”, tapi Dibata enggo ngatakenca, “terpaksa igegehindu erdahin” (bdk. Kuan-kuanen 10:4; 13:11; 15:6; 16:8; Pengerana 9:10; rsd.).

Piga-piga alasen ras enggo mbue terjadi engkai la banci kita erjudi :

1. Judi erbahanca kita nagih, adi sekali talu, ulihi ka ngadi-ngadi menang, seh sen enggo keri bahkan dayaken kerina si lit. Enggo pe menang, lit denga keinginan guna erjudi denga ka, guna melipatgandaken ertata ndai, tapi banci ka talu.

2. Judi erbahanca kalak kisat erdahin si enggo ibereken Tuhan, sebab Firman Tuhan sendiri ngatakenca erbintuas kam i bas ndahiken dahinndu.

3. Judi erbahanca kalak jadi jahat, idayakenna ertana piah dungna kebutuhen keluargana pe enggo terbengkalai bahkan lit deba, ndehara ras anakna pe idayaken.

4. Judi erbahanca melala keluarga berantakan, sabab enggo dekahen ia bas arena judi asangken mperdiateken jabuna ras ndabuh ku kemusilen.

5. Kalak erjudi ndatken keuntungen i bas kerugian kalak si deban. Kehadirenna la nari jadi pasu-pasu (berkat), malah erbahanca kalak si deban menderita.

E maka mari radu ras tuhu-tuhu sitadingken judi, janah siendesken geluhta man Dibata si enggo nelamatken kita, mereken kesehaten ras gegeh guna banci kita ndahiken dahinta alu mehuli. Teklah kita maka si ernalem man Tuhan tetap ipeliharaken Tuhan geluhna. Adi erjudi kita, maka siendesken geluhta man nasib entah pe untung-untungan, padahal geluh kalak si erkiniteken man Dibata enggo pasti guna kemulian gelar Dibata.