PA Kategorial GBKP Tgl. 24 - 30 September 2017

PA MORIA GBKP TGL. 24 - 30 SEPTEMBER 2017

Pdt. Larena br. Sinuhadji (Nd. Rey Tarigan)

Terpenalem : Kearifan Lokal, Nande Ingan Tertande

Ogen : Rut 1:1-22

Tema : NANDE INGAN TERTANDE

Tujun : Gelah Moria : 1) Ngidah kinigenggengen Naomi i bas ngepkep jabuna; 2) Megenggeng ras jadi ingan penundalen

Metode : Drama & Diskusi

Penjelasen Bahan Ogen & Aplikasi

Ogen i bas PA-nta sendah akap kami enggo semal man banta kerina, nuriken kerna keluarga Elimelek si melala menghadapi perbeben i bas geluhna :

1) Terjadi kelihen si mesangat i Betlehem, itadingkenna Betlehem ngongsi ia sada jabu ku Moab si jarakna kurang lebih 80 Km i Betlehem nari.

2) La ndekahsa mate Elimelek. Tulang punggung jabu. Tading me Naomi ras dua anakna. Banci sibayangken Naomi si enggo mbalu, berjuang ngepkep keluargana i negeri kalak. Seh erjabu dua anakna ras si nguda-nguda kalak Moab. Orpa ras Rut. Kenca 10 tahun tading i ja, mate ka dua anakna ndai. Banci sibayangken keadaan Naomi. Merasa sebatang kara, aminna lit dua permainna. “Aku me si liahna, entah madin mate saja aku Tuhan, la lit nari gunana aku nggeluh”. Adi la ndai ia erkiniteken. Sura-surana ku Moab, gelah sikap jabuna, malah sebalikna.

3) Sieteh, akhirna lit sekalak permainna si luar biasa kelengna man bana, e me kap Rut. Aminna pe meseksek Naomi mindo gelah mulih saja permainna enda duana ku orangtuana. Orpa mulih ku jabu orangtuana, sedangken Rut tetap ras bibina. “Ola suruhndu aku nadingken kam, bangsandu jadi bangsaku, Dibatandu jadi Dibatangku, esumpah aku maka Tuhan si ngukum aku alu kiniseran si mberatna kel adi kusirangken kam”. Banci si Rut muat keputusen si bagenda beratna erkiteken kiniteken, keleng ate Naomi si enggo icidahkenna sedekah enda.

4) Tapi akhirna happy ending. Mulih ku Betlehem duana kalak enda. Rut erdahin i juma Boas sembuyak Elimelek si bujur ras bayak, guna banci keperlun dirina ras bibina. Berjuang, la ia putus asa, optimis, bekerja keras. Akhirna ibere Dibata dalan pulah, erjabu Rut ras Boas. Arah kesusurenna reh me pagi Juruselamat e me kap Yesus Kristus.

Si jadi fokus i bas PA-nta sendah e me Naomi, sekalak pernanden si luar biasa. Kai kira-kira rahasia Naomi i bas ia jadi sekalak pernanden si luar biasa?

Si pemena, erpengendes man Tuhan, yakin Naomi maka beliden kuasa Tuhan nampati asa perbeben si lit. Bergantung sepenuhnya kepada Allah (bdk. Pilipi 4:13). Doa i bas Richard Niebuhr nari akap kami banci menggambarken kiniteken si paguh i bas Naomi, “Tuhan berilah aku kedamaian batin untuk bisa menerima hal-hal yang tidak dapat kuubah lagi, beri aku keberanian dan kekuatan untuk mengubah hal-hal yang masih bisa kuubah dan kebijaksaan untuk dapat membedakan keduanya”. I bas kita ernalem man Tuhan, lit porsi Tuhan, lit ka tanggung jawab si arus sidalanken kita.

Si peduaken, ersada. Jabu kalak Kristen e me kap jabu si kompak, ersada arihna, sikeleng-kelengen, saling menopang, saling mendukung, saling mperdiateken sada ras si debanna. Mberat pe perbeben e, menahang jadina adi banci ersada ukur. Tapi sebalikna, sitik si man ukurenken, banci jadi mbelin erkiteken la ersada arih. I bas ogenta teridah kiniersadan si paguh antara Naomi ras Rut.

Si peteluken, berpikir positif. Si ebahanca la ngasup kita ngalaken perbeben e erkiteken negatif caranta rukur. Amin pe bagi si putus asa Naomi i bas ia ngalaken perbeben si nialamina, tapi pertotonna man Dibata erbahanca ia ipengasup Dibata guna berpikir secara positif.

Tema i bas PA-nta sendah e me “Nande ingan tertande”, alu tujun gelah Moria ngidah kinigenggengen Naomi i bas ngepkep jabuna bagepe megenggeng ras jadi ingan penundalen. Ogenta sendah tentuna memotivasi kita gelah megegenggeng ras jadi ingan penundalen bagi Naomi. I bas dampar si deban khususna khasanah budayanta kalak Karo ikataken maka nande e me ingan tertande. I bas kearifan lokal enda pe banci kita erlajar gelah kita jadi sekalak pernanden si tuhu-tuhu banci jadi ingan tertande, sebab enggo melala i bas jaman si modern enda pernanden si lanai jadi ingan tertande. Nande ingan penundalen perbulangenna rikut ras anak-anakna. Banci jadi seisi jabu enggo menyerah asum litna perbeben si mberat, tapi ingan tertande tetap berjuang gelah tetap survive, selamat i bas ngalaken perbeben.

PA MAMRE GBKP TGL. 24 - 30 SEPTEMBER 2017

Nrs. Pdt. L. Sinuhadji (Bp. Rey Tarigan)

Kekerasan Nandangi Anak

Ogen : Epesus 6:4; Lukas 18:15-16

Tema : NGKELENGI ANAKTA

Tujun gelah Mamre ngasup jadi orangtua, guru, ras teman nandangi anak

Metode : Diskusi & Studi Kasus

Penjelasan Bahan Ogen & Aplikasi

Bahan ogenta sendah lit dua, si pemena e me sada bagin i bas pedah-pedah rasul Paulus man perpulungen Epesus, khususna i bas relasi si mehuli antara orangtua ras anak-anakna i bas jabu-jabu kalak Kristen. Ikataken rasul Paulus nina, “Kam orangtua! Ola pesega-sega anakndu si erbahanca ia merawa. Tapi i bas mpebelin-belin ia ajari dingen tegu-tegulah ia bagi si ngena ate Tuhan”, i bas Alkitab TB-LAI nina, “Dan kamu, bapa-bapa, janganlah bangkitkan amarah di dalam hati anak-anakmu, tetapi didiklah mereka di dalam ajaran dan nasihat Tuhan”, i bas Alkitab BIMK-BIS nina, “Saudara-saudara yang menjadi ayah! Janganlah memperlakukan anak-anakmu sedemikian rupa sehingga mereka menjadi marah. Sebaliknya, besarkanlah mereka dengan tata tertib dan pengajaran Tuhan”. I bas terj. bhs. Indonesia jelas pedah-pedah e itujuken man perbapan. Adi sibandingken ras Kolose 3:21 nina, “ola rusursa junguti anakndu gelah ola bene ukurna”. Latar belakang pedah-pedah enda e me budaya kalak si labo kalak Yahudi paksa si e si memperlakukan anak-anakna seri bagi sekalak budak. Sekalak perbapan banci memaksa anak-anakna guna erdahin bagi sekalak budak, janah banci ka idayakenna anak-anakna adi iakapna menguntungken secara ekonomi. I bas latar belakang si bagenda pedah-pedah rasul Paulus seh kel pentingna, sebab i bas kiniteken Kristen anak-anak e me pasu-pasu Dibata nari janah anak-anak si tubuh i bas keluarga Kristen e me generasi penerus kekristenan. Erkiteken si e anak-anak arus ipebelin-belin ras itegu-tegu perbapan bagi si ngena ate Tuhan.

Ogen si peduaken e me pasu-pasu Tuhan Yesus nandangi anak-anak si kitik denga. Adi sinen paralelna i bas Mat. 19:13-15 ras Mrk. 10:13-16, icatat maka labo saja ialo-alo Yesus tapi idakepNa anak-anak e sekalak-sekalak. Lit telu peran si banci sipelajari arah ogen si peduaken enda : 1) Peran orangtua si mabai anak-anakna ndahi Yesus guna itotoken ras ipasu-pasu. Kai si mendorong orangtua enda mabai anak-anakna ndahi Yesus? Tentuna kinitekenna si tuhu-tuhu nandangi Yesus Kristus. 2) Peran ajar-ajar Yesus si ngelarang anak-anak e ndahi Yesus. Labo ijelasken engkai maka ilarang ajar-ajar Yesus anak-anak ndai, mungkin lit anggapen paksa si e maka anak-anak si kitik denga lenga lit hakna guna ndatken pelayanen i bas Yesus nari. 3) Peran Yesus si ngaloken keberadaan anak-anak sebage bagin si penting i bas pelayananNya. La lit perbedan antara kalak si enggo dewasa ras kalak si anak-anak denga usiana, kerinana berhak guna ndatken pelayanen si maksimal bagepe kerinana berhak guna ndatken pasu-pasu. Adi sioge kitab Injil memang melala si nuriken kerna pelayanen Yesus man anak-anak, umpamana i bas Mat. 14:21 i ja Yesus mere man 5 ribu kalak termasuk je diberu ras anak-anak (bdk. Mat. 15:38). I bas Mrk. 5:41-42 ipegeluh Yesus mulihken anak Yairus si enggo mate. Janah i bas ogenta sendah anak-anak ijadiken Yesus sebage media pembelajaran kerna Kinirajan Dibata. I bas bahasa si deban, usihlah anak-anak si i bas kepolosenna ngasup ia ncidahkenca kiniteken si tuhu-tuhu nandangi Dibata.

Tema i bas PA-nta sendah e me “Ngkelengi anakta” alu tujun gelah Mamre ngasup jadi orangtua, guru, ras teman nandangi anak. Kerna tema ras tujun sendah akap kami enggo rusur ilumbaken Gerejanta. Ertina iarapken enggo melala kita, khususna Mamre, si enggo iteh kita kai si arus silakoken sebage orangtua Kristen si bertanggung jawab nandangi anak-anak si enggo ipelemiken Dibata i bas jabunta masing-masing. Mungkin banci ikataken enggo lanai lit kekerasan nandangi anak-anak i bas jabu-jabu kalak Kristen. Anak-anak i bas jabu-jabu kalak Kristen labo terjeng gelah lit keturunen saja, tapi lit tujun si lebih penting asangken gelah lit anak saja, e me menciptakan generasi yang takut akan Tuhan ras menciptakan generasi Kristen si berkualitas i bas kai pe. I bas si e tentuna kai si ipedahken rasul Paulus i bas ogenta arus siikutken. Bagepe peran orangtua i bas ogen si peduaken ras peran Yesus Kristus i bas nehken pelayanen si terbaik nandangi anak-anak perlu ka tetap silakoken. Emaka mari radu ras kita mplimbarui tekadta i bas kita semakin meningkatkan kuantitas ras kualitas kekelengenta nandangi anak-anakta. Dibata si mpegegehi kita.