PA Kategorial GBKP Tgl. 3 - 9 September 2017

PA MAMRE GBKP TGL. 3 - 9 SEPTEMBER 2017

Nrs. Pdt. L. Sinuhadji (Bp. Rey Tarigan)

Kiniteken (Iman) & Teknologi Informasi

Ogen : Kejadin 1:26-28

Tema : KINITEKEN RAS TEKNOLOGI

Tujun Gelah Mamre makeken teknologi guna kemulian Tuhan

Metode : Sharing & Diskusi

Penjelasan Bahan Ogen & Aplikasi

Bahan ogenta sendah hampir seri ras bahan ogenta minggu si lepas alu tambahen sada ayat e me ay. 28. E maka i bas kesempaten enda ulihi kami penjelasen ogen minggu si lepas. Manusia (dilaki ras diberu) ijadiken Dibata sentudu ras tempasNa. Antusenna lit hubungen (relasi) si khusus (istimewa) antara manusia ras Dibata, i ja manusia ijadiken Dibata mitra kerjaNa i bas ncidahken kemulianNa i tengah-tengah doni enda. Mitra Dibata ertina, manusia ngelakoken kerina si jadi peraten Dibata. E maka i bas manusia “ngkuasai” doni enda labo i bas pengertin mendominasi entah pe mengeksploitasi tapi i bas pengertin menata kelola alu mehuli kerina tinepaNa sue ras peratenNa guna kemulian GelarNa.

Kuasa dosa erbahanca kemulian Dibata i bas manusia enggo bene. Si lit i bas manusia kenca ikuasai dosa e me peraten guna ngelakoken kerina si la mehuli, termasuk mendominasi entah pe mengeksploitasi kerina si lit i bas doni enda guna kepuasen dirina jine. Tapi kuasa dosa enggo italuken Yesus Kristus, kemulian Dibata i bas manusia si tek man baNa enggo ipulihken. Identitasta selaku kalak si ncidahken kemulian Dibata reh tangkasna kenca kerehen Yesus Kristus ku tengah-tengah doni enda. Kerina kalak si tuhu-tuhu tutus erkiniteken man Dibata i bas Yesus Kristus lit i bas proses pembaharuan si kedungenna segambar ras Tuhan (bdk. 2 Kor. 3:18). I bas identitasta selaku kalak si ncidahken kemulian Dibata tentuna tangkas i bas : caranta rukur, pengerananta, perbahanenta, termasuk je caranta memperlakukan sesamanta manusia ras bagepe makhluk si deban si lit i sekelewetta. Kerina si icidahken kita e sue ras peraten Dibata guna kemulian GelarNa.

PA-nta sendah lit i bas judul “Kiniteken (Iman) & Teknologi Informasi”. Tema si seh man banta e me “Kiniteken ras teknologi”, alu tujun gelah Mamre makeken teknologi guna kemulian Tuhan. Kerna kemajun teknologi si lit i sekelewetta si pemena lebe arus kita ngataken bujur man Dibata, erkiteken i bas kinitekenta tek kita maka kerina kemajun i bas bidang teknologi si icapai manusia rehna i bas kepentaren Dibata nari. Melala teknologi si berkembang genduari ipergunaken guna tujun kesejahteraan manusia, mempermudah kegeluhenta si tep-tep wari. Tapi i bas sisi si deban perlu ka kita metenget, erkiteken teknologi e banci memperbudak manusia guna ndatken hal-hal si la mehuli rikutken kepuasan nafsu manusia. Sipindo gegeh i bas Dibata nari gelah ipengasupNa kita makeken teknologi si lit guna kemulian gelar Dibata, janah si pentingna kel e me relasi si mehuli ras si nyata (labo si maya) ras sapih-sapihta manusia jadi si utamana asangken teknologi informasi ras komunikasi ndai. Dibata si mpegegehi kita.