PA Kategorial GBKP Tgl. 8 - 14 Oktober 2017

PA MORIA GBKP TGL. 8 - 14 OKTOBER 2017

Pdt. Larena br. Sinuhadji (Nd. Rey Tarigan)

Terpenalem : Kearifan Lokal Benang Penjarumi

Ogen : Lukas 1:16-17

Tema : JADI BENANG PENJARUMI

Tujun Gelah Moria : 1) Ngidah pendahin Johanes Peridiken si mperdameken

2) Maba Perdamen i bas kerina dampar kegeluhen.

Metode PA : Studi Kasus

Penjelasen Bahan Ogen & Aplikasi

Nats PA i bas minggu enda bagin i bas berita kerna ketubuhen Johanes Peridiken. Ituriken maka Sakaria ras ndeharana Elisabet kalak si erkemalangen man Tuhan. Sakaria erdahin selaku imam i bas Rumah Pertoton. Tapi enggo pe duana kalak enda metua lenga lit anakna. Melala kalak ngatakenca, maka Elisabet la banci mupus (ay. 36, mandul).

Sada paksa waktu Sakaria ertugas guna ndahiken dahin imam i lebe-lebe Dibata. Janah asum ibahan tikam tanduk, Sakaria me si terpilih bengket ku bas kamar si badia guna nutung kumenen i je. Sangana idalanken Sakaria tugasna, reh Malekat Tuhan njumpai ia. Sengget ras mbiar kel Sakaria. Tapi Malekat Tuhan mpetetap ukur Sakaria gelah ula mbiar. Tuhan enggo megiken pertotonna ras keluargana (ay 24 nina Elisabet, “dungna isampati Tuhan nge aku”). Ertina, enggo pe ikataken kalak maka ndeharana mandul, tapi keluarga enda la erngadi-ngadi ertoto man Tuhan. Ia ras ndeharana ibereken Tuhan pagi sekalak anak dilaki. Janah gelarna pe enggo isikapken Malekat Tuhan, e me Johanes. Labo hanya keluarga enda si ermeriah ukur i bas ketubuhen Johanes, tapi kalak si deban pe ermeriah ukur. Mulai tubuhna nari pe enggo ia dem alu Kesah Si Badia. Ia me si mbuka dalan man kerehen Jesus Kristus, entah pe leben ia reh asa Tuhan. Kehadirenna erbahanca enterem kalak Israel bertobat, mulihken erkemalangen man Tuhan Dibata. Ras enda terbukti i bas Johanes Peridiken erberita i taneh mesawang Judea, “Jeralah i bas dosa-dosandu nari. Tandana kam enggo jera, kam arus iperidiken, gelah dosa-dosandu ialemi Dibata”. Dingen paksa si e, nterem kalak si merespon ras bertobat. Ulih pendahinna, melala idamekenna bapa ras anak-anakna, ibahanna kalak jahat jadi bujur, alu bage isikapkenna man Tuhan sada bangsa si metunggung. Banci kataken, Johanes Peridiken jadi benang penjarumi i tengah-tengah kegeluhen bangsa Israel.

Benang penjarumi merupaken sada istilah i bas kita kalak Karo si seh kel mehulina, i ja kita terpanggil jadi jurudamai. Desken dua kain si merigat banci mulihi ipersada kenca enggo ijarumi. Sebab lit ka deba kalak, labo jadi benang penjarumi tapi gunting pemisah entah pe kompor si erbahanca persoalen kitik jadi mbelin.

Bagi Kristus si reh ku doni enda si enggo ndameken kita ras Dibata (bdk. Roma 3:25, Dibata enggo netapken Ia jadi sada persembahen gelah arah Ia engkorbanken diriNa seh mate, kerina dosa-dosa manusia isasapken dingen pernembeh ate Dibata ipepalem, adi tek ia man Jesus Kristus. Arah si enda icidahken Dibata maka Ia bujur kap. Nai nari isinikken Dibata saja kerna dosa-dosa manusia), emaka kita pe terpanggil guna jadi jurudamai, ndameken manusia ras Dibata, ras manusia sesama manusia si sangana konflik entah pe la siperiahen. Sabab jelas, ‘di kenca hubungen manusia ras Dibata ceda labo lit dame sejahtera i bas kegeluhenna. Termasuk hubungen si la mehuli antar sesama. Banci jadi asum kita berkonflik agak mesera guna erdamai, tapi kehadiren teman orang ketiga banci jadi jurudamai, jadi benang penjarumi si erbahanca meriah ka hubungenta ras temanta ndai. Dahin enda labo gampang, tapi adi kedua belah pihak menyadari kesalahenna ras nggit saling memaafkan maka perdamaian banci tercapai. Si penting jurudamai arus netral, la ia erpihak ku sada-sada pihak.

PA MAMRE GBKP TGL. 8 - 14 OKTOBER 2017

Nrs. Pdt. L. Sinuhadji (Bp. Rey Tarigan)

Peningkaten Kinerja Bidang Dana Usaha Mamre

Ogen : Perb. Rasul 18:3; 1 Tesalonika 2:9-11

Tema : MUAT BAGIN I BAS NATANG PERBELITEN MAMRE

Tujun gelah Mamre : 1) Tutus i bas ndahiken dahin ras ngidah peluang pasar

2) Mendukung Bidang Dana Usaha Mamre

Metode : Ngerehken sekalak Narasumber si mereken pencerahen i bas Bidang Usaha

Penjelasan Bahan Ogen & Aplikasi

Ogenta si pemena nuriken kerna pendahin rasul Paulus i Korinti, i bas turi-turin e iteh kita maka lit sada pendahin si deban si ilakoken rasul Paulus selain meritaken Berita si Meriah e me erbahan tenda, seri bagi profesi Akwila. I bas sada tafsiren ikataken rasul Paulus enggo semal i bas erbahan erbage-bage kerajinan tangan i bas bahan dasar kulit kambing nari, sebab daerah Kilikia i ja rasul Paulus ipebelin-belin memang terkenal sebage daerah penghasil erbage-bage kerajinan i bas kulit kambing nari termasuk tenda. Ogen si peduaken e me surat rasul Paulus man perpulungen kalak si tek i Tesalonika i ja rasul Paulus mereken pedah-pedah ras pergegeh man perpulungen i Tesalonika. I bas ogenta si peduaken enda iteh kita maka rasul Paulus nggit erdahin alu latih guna ncukupken kebutuhen geluhna, sementara i bas dampar si deban tetap ia tutus er-Berita si Meriah. I bas kesempaten-kesempaten si deban pe rusur ikataken rasul Paulus kerna dahin si deban si ilakokenna guna ncukupken kebutuhen geluhna ras pelayanenna, umpamana : Perb. Rasul 20:34; 2 Tes. 3:8; 1 Kor. 4:12; 2 Kor. 11:27; rsd.

Akap kami paling lang lit dua hal si menjadi latar belakang engkai maka rasul Paulus arus erdahin alu latih guna ncukupken kebutuhen geluhna ras pelayanenna. Si pemena lebe, i bas jaman rasul-rasul memang lenga lit dana khusus guna per-Berita si Meriah. I bas si e tentu banci sigambarken situasi si nihadapi rasul Paulus, ngajar ia i Sinagoge-sinagoge, umpamana, tapi la idatkenna sen i bas dahin pelayanenna e. Memang i bas Fil. 4:12-20 ituriken lit penampat i bas perpulungen nari tapi sifatna insidental denga ras lenga tertata alu mehuli. Tapi si pentingna kel, dahin er-Berita si Meriah tetap arus erdalan, emaka kai pe si jadi kebutuhen guna pelayanen e tetap erdalan, iusahaken rasul Paulus. Si peduaken, erdahin alu latih guna ncukupken kebutuhen geluh labo semal i bas budaya Yunani paksa si e, sebab erdahin alu latih i bas budaya kalak Yunani biasana hanya ilakoken sekalak budak. Tapi i bas konteks enda rasul Paulus mereken pencerahan gelah perpulungen kalak si tek nggit erdahin erbintuas sebab erdahin alu tutus e me perentah Dibata.

PA-nta sendah lit i teruh tema umum “Peningkaten Kinerja Bidang Dana Usaha Mamre”, tema khusus “Muat Bagin I Bas Natang Perbeliten Mamre”, alu tujun gelah Mamre tutus i bas ndahiken dahin ras ngidah peluang pasar, bage pe mendukung Bidang Dana Usaha Mamre. Lit perbedan situasi si siginifikan i bas jamanta gundari ras jaman rasul Paulus. I bas jamanta gundari, sumber dana guna dahiken kerina dahin pelayanen i bas Gerejanta umumna idatken arah kerina bentuk persembahen si isehken perpulungen. Secara khusus i bas kategorial Mamre pe guna ncukupken kerina biaya pelayanenna umumna idatken arah : iuran, persembahen pengataken bujur, sisa dana i bas kepanitiaan nari. Piga-piga Runggun ngenca si lit usaha Mamrena guna ncukupken perbelitenna, umpamana : Kantin Mamre, Juma Mamre, Peternakan Mamre, rsd. Adi lit usaha si deban labo terjeng bergantung ku bas iuran, pengataken bujur, sisa dana panitia ras donatur situhuna lebih mejile erkiteken lit sumber dana alternatif janah si pentingna program tetap banci idalanken la terkendala soal lit entah la lit danana.

I bas PA-nta sendah iajuk kita gelah semakin meningkatken bentuk-bentuk usaha guna semakin mpegegehi kas Mamre i bas mewujudken program-programna. Rasul Paulus mereken teladan man banta, maka guna ncukupken kebutuhen geluh ras pelayanenna nggit ia erdahin alu latih. Emaka kita pe, khususna pengurus, iajuk gelah semakin meningkatkan kuantitas ras kualitas usaha Mamre. Sue ras metodenta sendah, iarapken gelah itenahken sekalak Narasumber si banci mereken pencerahen i bas Bidang Usaha Mamre, asa bancina metode enda iikutken gelah semakin nambahi motivasinta. Man banta kerina Mamre mari radu ras sidukung kerina program Mamre alu ikut muat bagin i bas natang perbeliten Mamre. Kesadarenta guna si e penting sebab rusur si terjadi arus lebe isingetken kerna tanggung jawabta nehken iuran maka sisehken. Dibata termulia arah Mamre GBKP.