PA Kategorial GBKP Tgl. 6 - 12 Agustus 2017

PA MAMRE GBKP TGL. 6 - 12 AGUSTUS 2017

Nrs. Pdt. L. br. Sinuhadji (Bp. Rey Tarigan)

Budaya (Konsep Kerna Njayo)

Ogen : 2 Tesalonika 3:6-15

Tema : PANG NJAYO

Tujun Gelah Mamre : 1) Nuriken erti njayo. 2) Nuriken biak-biak sekalak Mamre si ikataken njayo. 3) Melasken tekadna “Pang Njayo” secara fisik ras secara perukuren

Metode : Diskusi

Penjelasan Bahan Ogen & Aplikasi

Ogenta sendah lit i teruh judul “Tanggung jawab guna erdahin”, i bas terj. BIS-BIMK “Kewajiban untuk bekerja”, i bas terj. TB-LAI “Berdoa & bekerja”, nuriken kerna pedah-pedah rasul Paulus man perpulungen i kota Tesalonika (gundari gelarna Salonika i negara Yunani) erkiteken lit sebagin perpulungen si terpengaruh ajaren si papak paksa si e si ngajarkenca Tuhan Yesus enggo nandangi reh si peduakaliken. Erkiteken kentisik nari reh Tuhan Yesus maka enggo la nai perlu erdahin guna ncukupken kebutuhen geluhna. Rasul Paulus nggelari perpulungen si bagenda e me perpulungen “si perkisat, si la nggit ngikutken ajaren si ibereken kami” (ay. 6); “la nggit erdahin” (ay. 10); “la kai pe ibahanna” (ay. 11). Ay. 11 i bas terj. TB-LAI nina, “orang yang tidak tertib hidupnya dan tidak bekerja”.

Pedah-pedah rasul Paulus enda memang arus isehken erkiteken keberadaan perpulungen si persikat, la nggit iajari, ras la nggit erdahin enda enggo membebani ras mengganggu perpulungen si tutus. Perpulungen si tutus terganggu labo saja i bas pendahinna tapi pe i bas kinitekenna erkiteken perpulungen si papak rusur “ncampuri sikerajangen kalak” (ay. 11), i bas terj. TB-LAI “sibuk dengan hal-hal yang tidak berguna”, i bas terj. BIS-BIMK “sibuk mencampuri urusan orang lain”, termasuk je mabai perpulungen si tutus kinitekenna ku bas ajaren si papak. Perpulungen si tutus enggo terbebani erkiteken perpulungen si papak mulai memanfaatken Gereja guna kepentingenna, salah sadana e me ndatken pangan gratis. Rasul Paulus ngatakenca i bas ay. 10, “Kalak si la nggit erdahin ola bere man”. Man i jenda maksudna pangan si biasa isikapken guna perjamuan kasih i tengah-tengah perpulungen bage pe guna nampati perpulungen si la megegeh secara ekonomi bagi anak melumang ras diberu balu-balu.

I bas si e rasul Paulus ngatakenca man perpulungen si tutus gelah ngusih “kami” (termasuk je teman pelayanenna e me Silas ras Timotius) si labo perkisat (ay. 7), “la ipan nakan kalak la nggalar” (maksudna la memanfaatken statusna sebage rasul guna ndatken keuntungen materi), erdahin alu latih suari ras berngi (ay. 8). Si e kerina ilakoken rasul Paulus labo berarti la lit hakna mindo keperlunna guna pelayanen (bdk. 1 Kor. 9:4-17; Gal. 6:6; rsd.). Si e kerina ilakoken rasul Paulus gelah jadi usihen si mehuli man perpulungen (ay. 9) sebab erdahin alu tutus e me perentah Dibata (bdk. Kej. 2:15; 3:19; Kel. 31:3; 35:35; Ul. 5:13; Joh. 5:17; 6:27; 9:4; rsd.) janah erdahin e me buah kiniteken si payo (bdk. Ef. 4:28; Fil. 1:22; rsd.). Tapi i bas si e kerina, amin pe ikataken rasul Paulus gelah nirangi kalak si perkisat (ay. 6), ola nai iperkuanken (ay. 14), perpulungen si tutus arus tetap ngkelengi ras ngajarken bagi sekalak senina (ay. 15). Man perpulungen si perkisat, la nggit iajari, ras la nggit erdahin, alu tegas rasul Paulus ngatakenca i bas ay. 12, “ipersingeti kami maka arus idalankenna kegeluhen si metunggung dingen erdahin ncariken keperlunna”.

PA-nta sendah lit i teruh judul “Budaya (konsep kerna njayo)”, tema “Pang njayo”, alu tujun gelah Mamre ngasup nuriken erti njayo. nuriken biak-biak sekalak Mamre si ikataken njayo, bage pe melasken tekadna “Pang Njayo” secara fisik ras secara perukuren. Kerna konsep njayo i bas kalak Karo banci iogenndu i bas Buku Bimbingen PA Mamre. I bas bhs. Indonesia njayo menam seri ertina ras “mandiri”. Mandiri i bas KBBI ertina mampu berdiri di atas kaki sendiri (berdikari) ras tidak bergantung kepada orang lain. Adi sinen secara psikologis, mandiri entah pe kemandirian mencakup : kemerdekaan untuk bertindak, tidak terpengaruh lingkungan, merdeka untuk mengatur kebutuhan sendiri, merdeka untuk mengambil inisiatif, mengatasi hambatan, gigih dalam usaha, melakukan sendiri segala sesuatu tanpa bantuan orang lain, kemampuan menguasai, mengatur, atau mengelola diri sendiri. Ertina, mandiri entah pe kemandirian leben erkaiten ras mentalitas entah pe karakter sesekalak.

Kai si iajarken rasul Paulus i bas ogenta sendah e me pembentukan karakter entah pe mentalitas mandiri i bas kai pe. Ibenaken alu palas kemandirian erkiniteken. Mandiri i bas erkiniteken ertina tuhu-tuhu lit i bas kita relasi si payo ras Dibata si nepa kita. Relasi si payo ras Dibata enda erbahanca lit i bas kita kininggiten guna ngelakoken kerina si jadi peratenNa i bas kegeluhenta (bdk. ay. 13). Kesah si Badia tuhu-tuhu erdahin i bas geluhta si erbahanca lit semangat, optimisme, kinigenggengen, kinipangen ngalaken kerina tantangan, ketekunan, rsd. Adi enggo mandiri kinitekenta teklah kita maka Dibata arah KesahNa si Badia mpengasup kita mandiri i bas kai pe : i bas pendahinta, i bas jabunta, i bas pelayanenta, i bas kita bersosialisasi ras sekelewetta, rsd. Dibata si mpegegehi kita.

PA MORIA GBKP TGL. 6 - 12 AGUSTUS 2017

Nrs. Pdt. L. br. Sinuhadji (Bp. Rey Tarigan)

Terpenalem : tantangan dari teman sekitar, pekerjaan

Si Man Ogen : Bilangen 14:1-13

Tema : BIAK SI NGAMBATI KEMAJUN

Tujun : Gelah Moria

1) Ngidah tantangen si ialaken Musa i bas pendahinna

2) Nadingken biak-biak si ngambati kemajun

Metode : Nuratken tantangen si ngambati kemajun

Penjelasan Bahan Ogen & Renungen

I bas Bil. 13 ituriken kerna mata-mata si 12 kalak si isuruh guna nyelidiki taneh Kanaan sope bangsa Israel bengket ku taneh si ipadanken Dibata e. Kenca 40 wari mulih mata-mata ndai ras ilaporkenna man Musa ras kalak Israel hasil si enggo idatken i bas penyelidikenna. Ikataken mata-mata e ndai maka taneh Kanaan tuhu-tuhu mehuli ras mehumur, janah enggo ibuatna contoh buah sinuan-sinuanna, tapi kalak si ringan i je tuhu-tuhu megegeh, kuta-kutana mbelin ibentengi alu mehuli, janah lit iidahna kesusuren manusia raksasa. Seh i jenda situhuna la lit persoalen erkiteken faktana tuhu-tuhu sue ras si enggo ipadanken Dibata, janah Dibata pasti mereken gegeh ras nampati gelah bangsa-bangsa si tading i taneh Kanaan ndai banci italuken bangsa Israel. Ikataken Kaleb i bas Bil. 13:30 nina, “Arus maka siserang ia genduari janah sikuasai taneh e; kita cukup megegeh guna ngkuasaisa”. Tapi kai si ikataken Kaleb e la ibegiken bangsa e janah lebih tek bangsa e nandangi berita pesimis, negatif ras palsu si ikataken mata-mata si 10 kalak. Piah dungna bangsa e dem alu kebiaren.

I bas bahan ogenta sendah ituriken maka gedang-gedang berngi tangis bangsa e perban lesekna atena. Ijunguti kalak e si Musa ras Harun janah ersura-sura milih sekalak peminpin guna mulih ku Mesir. I bas keadaan si bagenda rupana Musa ras Harun enggo la nai banci erkai pe, i bas ay. 5 ituriken maka erjimpuh Musa ras Harun i lebe-lebe bangsa e kerina, ayona seh ku taneh, bagi si enggo menyerah pada keadaan. Tapi minter icaingken Yosua ras Kaleb uisna i lebe-lebe bangsa e perban cedana atena. Sebab i bas 12 mata-mata ndai, Yosua ras Kaleb ngenca si maba berita positif, optimis, ras tek nandangi kuasa Dibata. Ikatakenna nina, “Negeri si iselidiki kami tuhu-tuhu sada negeri si seh kal ulina. Adi ngena ate Tuhan man banta, la banci la ibabaNa kita ku je, jenari iberekenNa man banta negeri si mehuli ras si mehumur e. Ola lawan Tuhan janah ola mbiar man kalak si ringan i bas negeri e. La banci la sukah siakap naluken ia. Tuhan kap ras kita janah enggo italukenNa dibata-dibata si ngkawali ia kerina; e maka ola mbiar”. Tapi la ibegiken bangsa e janah iancamna Yosua ras Kaleb ibenterina atena alu batu. Tapi la surung ilakoken erkiteken rempet idah bangsa e sinalsal terang kerehen Tuhan mbincar i babo Kemah Perjumpan.

Turi-turin selanjutna ertoto Musa man Dibata janah mindo pengalemi dosa bangsa e man Dibata. Ialemi Dibata dosa bangsa e tapi nina Dibata i bas ay. 21-23, “erpadan Aku maka la banci lang, bagi Aku nggeluh janah kemulianKu la banci la ndemi doni enda, sada pe la lit kalak enda bengket ku bas negeri e. Enggo idahna sinalsalKu ras tanda-tanda kuasa si Kubahan i Mesir ras i bas taneh mesawang, tapi la erngadi-ngadi iujina kesabarenKu janah la ia nggit erkemalangen man bangKu. E maka la banci ia ngidah negeri si enggo Kupadanken man nini-ninina. La lit sada pe si enggo nulak Aku banci ngidah negeri e”.

Tema si seh man banta i bas PA sendah “Biak si ngambati kemajun” alu tujun gelah Moria ngidah tantangen si ialaken Musa i bas pendahinna, ras nadingken biak-biak si ngambati kemajun. Rikutken ogenta sendah teridah maka tantangen si ialaken Musa e me 10 kalak mata-mata si biakna seri ras ratana bangsa Israel : la tek nandangi kuasa Dibata, perukurenna dem alu perukuren si negatif, pesimis, mpebelin-belin kebiaren i bas hal si lenga siteh kedungenna (hiperbola - membesar-besarkan hal yang belum pasti kebenarannya), iandalkenna gegeh perukurenna, mesera man ajarenken janah rusursa jungut-jungut, status quo entah pe sudah merasa nyaman dengan apa yang dicapainya di Mesir dan tidak mau mencoba hal-hal yang baru entah pe menyerah sebelum mencoba (malas), rsd. Musa pe adi sinen i bas ogenta menam enggo bagi si putus asa ras la nari pang mpersingeti bangsa e. Si e kerina biak-biak si ngambati kemajun.

Kemajun entah pe perkembangen ku si mehuli situhuna e me sura-suranta, janah tujun Dibata nepa kita manusia gelah kita maju berkembang ku kerina si mehuli sue ras peratenNa. Tapi i bas kita erusaha datken kemajun si mehuli i bas geluhta labo hal si murah, melala tantangan bas nari bage pe darat nari. Tantangen bas nari e me biak-biak bagi ratana bangsa Israel i bas ogenta sendah. Tantangan i bas darat nari e me pengaruh lingkungan sekelewetta si banci erbahanca kita terbawa arus ku hal-hal si la mehuli. I bas si e tentuna perlu kita semakin meningkatkan kualitas kinitekenta man Dibata sebab kemajun ras perkembangen la banci lang harus ibenai alu keyakinan bahwa hidupku harus semakin maju dan berkembang ke arah yang lebih baik. E nge si jadi peraten Dibata i bas geluhta. Kegeluhen si berkualitas terbaik i bas erkiniteken bage pe i bas kerina dampar kegeluhenta.

Mari radu ras sievaluasi dirinta pribadi lepas pribadi, kai-kai saja si sedekah enda ngambati kemajun i bas geluhta, totoken gelah ipengasup Dibata kita guna nadingkenca entah pe ngatasisa. Si debanna e me kemajun i bas pelayanen i bas kategorial Moria, enda pe perlu radu ras jadi bahan evaluasinta, kai-kai saja si sedekah enda jadi hambaten (adi lit), entah mungkin lit i bas kita si secara tanpa isadari ngambati kemajun pelayanen i bas Moria, status quo entah pe tidak merasa perlu untuk semakin meningkatkan kualitas ras kualitas pelayanan, rsd. Gereja si maju ras berkembang e me Gereja si nggit terus-menerus erlajar meningkatken kualitas ras kuantitas pelayanenna. Dibata si mpegegehi kita.