PJJ GBKP Tgl. 13 - 19 Agustus 2017

PJJ GBKP TGL. 13 - 19 AGUSTUS 2017

Pdt. Larena br. Sinuhadji (Nd. Rey Tarigan)

Tema : JADILAH MBISA (Nehemia 4:11-15)

Penjelasen Bahan Ogen & Renungen

Nehemia e me sekalak Yahudi si ertugas i bas istana raja Artahsasta (Artaxerxes - raja Persia) sebage juru inemen entah pe si ngidangi inemen raja (Neh. 1:11; 2:1). Amin pe cukup meganjang jabatenna i bas kerajan Persia, tapi ermediate denga ia nandangi bangsana si lit i bas kiniseran, baik si lit i bas pembuangen bage pe si enggo mulih ku taneh Israel. I bas bindu 1:1-11 ituriken maka kenca enggo ibegi Nehemia berita kerna keadaan kutana, tangis ras erceda ate ia. Erpuasa Nehemia janah ertoto man Dibata gelah ipulahi Dibata bangsana si lit i bas kiniseran si mbelin. Tapi labo terjeng erpuasa ras ertoto ngenca, lit sura-sura Nehemia guna mulih ku kutana ras majekken mulihi kutana si enggo sontar. Pertoton Nehemia ibegiken Dibata. I bas bindu 2:1-9 ituriken maka kenca enggo iteh raja kai si jadi perbeben ras sura-sura Nehemia, ialoken raja kerina si jadi pemindon Nehemia, janah ibereken raja jabaten si deban man Nehemia, e me jadi gubernur Juda (12 tahun, Neh. 5:14, ras seterusna Neh. 13:6-7).

Ogenta sendah termasuk i bas turi-turin si nuriken kerna proses majekken mulihi tembok kota Yerusalem si enggo sontar. I bas proses majekken mulihi tembok kota Yerusalem e melala tantangen si nihadapi Nehemia, khususna arah Sanballat anak kuta Bet Horon ras Tobia pegawai i propinsi Amon nari, si nembeh kel atena erkiteken Nehemia reh erdahin guna kiniulin bangsa Israel. Judul perikop bindu 4 si jadi ogenta sendah e me “Nehemia naluken kalak si ngelawan pendahinna”. Tuhu memang Nehemia naluken Sanballat, Tobia, kalak Arab, Amon, ras Asdot, si erpekat lako nerang Yerusalem gelah guntar ras pembangunen tembok kota e gagal ilaksanaken. Tapi si menarik adi sioge bindu 4 benaken ay. 1 nari, piga-piga kali Nehemia ertoto man Dibata i bas tantangen si niadapina (ay. 4,5,9). Pertoton Nehemia ibegiken Dibata. Ibereken Dibata kebeluhen man Nehemia erbahan strategi guna ngadapi tantangen si niadapina janah pembangunen tembok kota Yerusalem banci erdalan alu mehuli seh dung hanya i bas 52 wari ngenca dekahna (Neh. 6:15).

Hal penting si deban si banci sipelajari i bas ogenta sendah, ipegegehi ras ipetetap ukur Nehemia bangsa Israel seh makana bangsa e pang ngaloken resiko terburuk janah ergiah-giah majekken mulihi tembok kota Yerusalem. I bas bahasa si deban, Nehemia berhasil mengobarkan semangat nasionalisme i tengah-tengah bangsana si lit i bas kiniseran ras dem alu kebiaren erpalasken kiniteken si paguh man Dibata. I bas ay. 14 ikataken Nehemia, “Ola kam mbiar man musuh-musuhta. Inget uga belinna ras gegehna Tuhanta, e maka erjuanglah guna senina-seninanta sada bangsa, guna anak-anakndu, ndeharandu ras rumahndu”.

Tema PJJ-nta sendah “Jadilah mbisa”. Mbisa i bas Kamus Bahasa Karo ertina : kuat, banyak tenaganya, tidak lemah, jago, pemberani. Adi rikutken ogenta sendah maka Nehemia banci sikategoriken sebage sekalak peminpin si mbisa. Tapi kinimbisan Nehemia labo erpalasken gegeh, kebeluhen, entah pe jabatenna. Kinimbisan Nehemia erpalasken kinitekenna si paguh nandangi Dibata si isembahna. Memang labo lit keterangen si nurikenca latar belakang kegeluhen Nehemia i bas kitab Nehemia, tapi melala sioge maka Nehemia enda sekalak si tuhu-tuhu erkemalangen man Dibata seh makana lit i bas ia karakter-karakter si mehuli sue ras peraten Dibata :

1) Terteki ras terpenalem (dapat dipercaya dan diandalkan). Kerina jabaten si ibereken man Nehemia e me jabaten si membutuhken kepercayaan (bdk. Neh. 5:14-19). Adi la terteki ras terpenalem i bas jabatenna tentuna la ibereken raja jabaten juru inemen ras gubernur Juda. Idahikenna kerina dahin si ipercayaken man bana alu mehuli janah kerina dahin si idahikenna erkedungen alu mehuli.

2) Ermediate (peduli dan berpihak). Karakter mediate si lit i bas Nehemia erbahanca nggit ia nadingken zona nyamanna, erinisiatif ia mulih ras erdahin guna kiniulin bangsana. Ibelana, ipegegehina ras ipetetap ukur Nehemia bangsana si lit i bas kiniseran ras kebiaren.

3) Pang (berani) i bas si benar. I bas kerina kalak Israel si lit i Juda, Nehemia ngenca si pang menakenca pembangunen tembok kota Yerusalem si enggo sontar alu resiko kebenen nyawana sendiri. Pang Nehemia ngadapi kerina tantangen i bas musuh-musuhna nari si secara logika lebih megegeh asangken ia. Labo terjeng je saja, pang ia majekken kerina si mehuli i tengah-tengah bangsa Israel sue ras peraten Dibata.

4) Meteruk ukur ras nggit erdahin (rendah hati dan mau bekerja). Sebage sekalak si meganjang jabatenna, la erbahanca Nehemia meganjang ukur, nggit ia nusur ku tengah-tengah bangsana janah radu ras erdahin.

Nehemia mereken teladan man banta kerna kinimbisa erpalasken Kata Dibata. Mbisa labo terjeng hebat secara fisik, tapi si utamana e me tutus erkemalangen man Dibata. I bas ketutusenta erkemalangen man Dibata maka ibereken Dibata karakter-karakter si mehuli man banta bagi si enggo ijelasken i datas. Jadilah mbisa ertina, mari radu ras kita membangun karakter-karakter si mehuli erpalasken kinitekennta si tuhu-tuhu nandangi Dibata i bas Yesus Kristus.