PJJ GBKP Tgl. 27 Agt. - 2 Sep. 2017

PJJ GBKP TGL. 27 AGT. - 2 SEP. 2017

Pdt. Larena br. Sinuhadji (Nd. Rey Tarigan)

Tema : KUPEKENA-KENA RUMAH-NDU (Hagai 2:1-9)

Penjelasen Bahan Ogen & Renungen

Hagai e me kap nabi si pemena kel iutus Tuhan kenca bangsa Israel mulih i bas pembuangen Babel nari, si erdahin terus-menerus guna mpersingeti bangsa Israel gelah mulihi majeken Rumah Pertoton Tuhan si enggo ibangun Salomo ndube si enggo runtuh asum iradasken Babel.

Kenca enggo italuken Persia kerajan Babel si enggo naban bangsa Israel selama kurang lebih 70 tahun i teruh pimpinen raja Koresh, e maka mulihi me kalak Israel ku kutana e me kap i bas rombongen pemena sekitar 40 ribu kalak si ipimpin gubernur Zerubabel ras imam besar Yosua. Mulai je nari maka enggo ibenakenna majeken Rumah Pertoton Tuhan i Jerusalem. Tapi erkiteken mbue tantangen si ialami kalak Israel, i ja mbiar bangsa sekelewet ‘di kenca enggo pajek Rumah Pertoton Tuhan maka megegeh ka mulihi bangsa Israel iusahakenna maka batal pembangunen e. Erkiteken si e, maka selama 15 tahun terbengkalai pembangun Rumah Pertoton Tuhan e (bdk. Esra 3:1-4:23).

E maka tahun 522 SM Darius raja Persia berikutna njemba kalak Jahudi guna nerusken pembangun Rumah Pertoton e (Esra 4:24). I bas si e pe tetap denga masyarakat mengeluh alu erbage-bage alasen : asil rani la bias, makanan pe sitik, sen kurang (Esra 1:1-6). Janah sekali nari Hagai mpersingeti perpulungen maka waktu enggo keri. Enggo cukup ndekah perpulungen e menunda pembangunen Rumah Pertoton Tuhan e. Nabi Hagai menantang ras mendorong umat Tuhan guna banci ndungi pembangun Rumah Pertoton Tuhan si enggo ibenaken 15 tahun si lepas. Tahun 515 SM Rumah Pertoton Tuhan mulihi ilanjutken pembangunenna.

Janah i bas perikopta, nabi Hagai mpetetap ukur bangsa Israel, maka aminna pe kurang megah, kurang mejile Rumah Pertoton si genduari ibandingken Rumah Pertoton asum ibangun jaman raja Salomo, tetap ipancarken Tuhan kemulianNa i bas Rumah PertotonNa. “Ola tumpat ukurndu. Teruskenlah ndahiken dahin e, sabab Tuhan tetap ras bangsaNa. Ola mbiar, Tuhan tetap setia nemani bangsaNa, bagi IA enggo naruhken bangsa Israel Mesir nari ku Kanaan”. Alu kuasa ras kinimbisan Tuhan ibahan Tuhan maka Rumah Pertoton si genduari sangana ibangun banci ndauh jilen asangken si ibangun raja Salomo. Iugur Tuhan langit, doni ras daraten, kerina bangsa-bangsa ras erta-ertana guna erbahan mejile Rumah Pertoton Tuhan e. Sabab Tuhan si mada doni enda ras kerina isina, alu cara Tuhan icukupiNa guna ndungi pembangun Rumah Pertoton e. Si penting kemulian Tuhan terpancar i bas Rumah Pertoton e. Ertina, si lebih ipentingken i jenda labo soal nilai materialna (bangunan fisiknya), tapi ndauh belin nilai kerohanian i bas Rumah Pertoton e adi ifungsiken bagi arusna.

Bahanta sekali enda mulihi mpersingeti kita guna tetap banci mpekena-kena Rumah Pertoton Tuhan, banci Gedung Gereja secara fisik ras banci ka kita secara pribadi e me kap Rumah PertotonNa (1 Kor. 6:19). Rumah Pertoton Tuhan, inganta secara khusus jumpa ras Tuhan bage pe jumpa ras teman-temanta sada kiniteken guna muji ras pebadiaken GelarNa. Hasil Persidangen Sinode GBKP tahun 2015 maka la nari ibahan Lelang Sinodal dalam rangka Pembangunan Gereja i belang-belang GBKP, sebab asilna kurang maksimal ras enggo melala kari struk undangen pembangunen man sesekalak si niakap mbue senna (kurang litna partisipasi jemaat). E maka iputusken guna Pembangunen Gedung Gereja secara Sinodal partisipasi jemaat Rp. 2.000/bulan. Ras keputusen i bas Sidang Majelis Klasis Riau Sumbar guna Pembangun Gereja i wilayah Riau Sumbar Rp. 5.000/bulan. Jadi setiap bulanna Rp. 7.000 per-KK guna nehken tanggung jawabta i bas pembangunen Gereja Tuhan. Alu metode si bagena iarapken kerina perpulungen banci berpartisipasi, la erndobahen. Tapi seh ngayak gundari e pe macet denga, lenga bo kerina berpartisipasi. Tentuna enda banci menjadi bahan evaluasi man banta kerina, sebab enda enggo radu ras siputusken secara Sinodal.

Mungkin salah sada cara si banci ilakoken adi enggo nggeluh perpuluhen bas Gerejanta, maka tanggung jawab Runggun guna imasukken bas Rapen/Rabel tiap bulanna ras ipedarat rikutken jumlah KK i bas perpulungen e. Ula kita mbiar i bas pekena-kena Rumah Pertoton Tuhan. I bas kita erdiate guna mpekena-kena Rumah Pertoton Tuhan dalanna maka tetap ipepaler Tuhan pasu-pasuNa ku bas geluhta, seri bagi si ialami bangsa Israel (bdk. bindu 2:15-19). Janah perlu ka siinget maka Gerejanta labo hanya Gereja inganta erbakti, melala Gereja-gereja si perlu denga penampatta. Em tandanta kita bas GBKP enda ersada ras mediate sada ras si debanna.

Mpekena-kena Rumah Pertoton Tuhan pe termasuk i bas kita tetap banci memelihara ras merawat alu mehuli Rumah Pertoton e. Ula sibiasaken sitadingken sampah i bas Gerejanta kenca kita mulih kebaktin nari. Ruangen tetap terpelihara bersih ras kerina alat-alat sipakeken pe banci ifungsiken alu mehuli. I bas bagin si enda GBKP arus terus-menerus berbenah diri, sebab lenga bo banci kita jadi contoh i bas menjaga Gedung Gereja ras lingkungenta bersih. Sediaken mbue tong sampah, gelah benaken KAKR nari pe enggo sibiasaken menjaga kebersihen.

Janah si paling penting kel labo kerna gedung si megah ras mejile maka i je teridah kemulian Tuhan, tapi nilai kerohanian si arus iperdiateken. Ketulusen ras ketedehen ateta jumpa ras Dibata bage pe jumpa ras temanta sada kiniteken, sabab kulanta sendiri e me kap Rumah Pertoton Tuhan. Kemulian Tuhan terpancar arah pengkebet geluhta si ambah warina iubahken Kesah si Badia si kedungenna kita maba perubahen ku sekelewetta. Ada pepatah mengatakan, “Kita tidak akan pernah mengubah dunia dengan pergi ke Gereja, tetapi dunia akan berubah dengan kita menjadi Gereja” (being the Church). Ras perlu iperdiateken partisipasi jemaat guna muat bagin i bas kerina kegiaten i bas Gereja. Salah sada kriteria kedewasaan Gereja e me kap “seberapa banyak anggota jemaat yang terlibat dalam pelayan-pelayan”. Arus lit kerja sama si mehuli antara Pengurus Gereja (Serayan Tuhan, Pengurus PJJ, Pengurus Kategorial) ras kerina perpulungen guna ngasup ngidah ras makeken potensi entah talenta si lit bas perpulungen si banci ipakeken guna kemulian Tuhan (singers, pemain musik, mengajar koor, tim multimedia, pemeliharaan sarana dan prasarana, dekorasi, bunga altar, konsumsi, rsd). Maka kehadiren perpulungen jadi pasu-pasu nandangi si debanna.

Adi banci simpulken kami, rikutken bahanta sekali enda, hal-hal kongkrit si banci silakoken kita e me kap : 1) Ikut muat bagin i bas geraken 2.000/bulan entah bas kita Klasis Riau Sumbar 7.000/bulan. 2) Sijaga kebersihen ras sirawat Gerejanta. 3) Dirinta e me kap Rumah pertoton Tuhan, e maka tulus iklas kita tanpa kepura-puraan entah pe keterpaksaan i bas kita erbakti man Tuhan, gelah Kesah si Badia ngubahken kita wari lepas wari. 4) Berpartisipasi rikutken potensi ras talenta si enggo ibereken Tuhan banta.