PA Kategorial GBKP Tgl. 27 Agt. - 2 Sep. 2017

PA MORIA GBKP TGL. 27 AGT. - 2 SEP. 2017

Pdt. Larena br. Sinuhadji (Nd. Rey Tarigan)

Si Man Ogen : Jop 12:9-13

Tema  : MEGEGEH ERDANDANKEN KEPENTAREN DIBATA

Tujun : Gelah Moria : 1) Erlajar arah kepentaren; 2) Makeken kepentaren Dibata i bas kerina dampar kegeluhen

Metode PA : Sharing

Penjelasen Bahan Ogen & Aplikasi

Jop kalak si tutus erkemalangen man Dibata, ia kalak si mehuli janah la lit perbahanenna si jahat. Reh Iblis ncubai Jop alu seizin Tuhan alu erbage-bage kiniseran si nderpa; i ja anak-anak Jop mate ras kerina kebayakenna ikernepken. Jop sendiri mengalami sakit pinakit i ja ugahen kerina daging kulana, mulai i bas tapak-tapak nahena nari terus ku piseranna. Tapi Jop tetap setia erkemalangen man Dibata.

Teman-teman Jop : Elipas, Bildat, Sopar, menghakimi Jop maka kai sialami Jop erkiteken kesalahenna. Sabab memang pengangkan si nggeluh i bas bangsa Israel bage, adi patuh man Dibata tetap ipasu-pasuNa, sedangken adi silakoken si la mehuli ketulahen (kutuk) ibahan Dibata (Ul. 28). Tapi arah peristiwa sialami Jop mereken pengangkan si mbaru, maka kalak si setia erkemalangen man Dibata pe banci mengalami sakit pinakit ras erbage-bage kiniseran, tapi Tuhan la pernah nadingken kegeluhenna. Adi tetap kita tahan uji, menang ngalaken erbage-bage perbebenta maka kinitekenta reh paguhna.

Perikopta ngerana kerna jawaben Jop man teman-temanna si enggo nalahken ia, secara khusus  Sopar (ps. 11).  Ay. 11, “Itandai Dibata apai kalak si la erguna; IidahNa kerina perbahanen si jahat. Ay. 13-14, “Pehulilah perukurenndu o Jop. Dadakenlah tanndu ertoto man Dibata. Asa kai si jahat dingen salah, pedaulah i bas rumahndu nari”. Jop tuhu-tuhu merasa sendiri i bas kesusahen si alamina. Ps. 12:4, “Teman-temanku jine pe enggo nguncimi aku genduari; itawaina aku aminna aku benar dingen sitik pe la ersalah”; janah i bas kinata kegeluhen pe idah Jop maka pinangko ras kalak si la er-Dibata nggeluh alu senang, aminna gia si jadi dibatana eme gegehna jine. Sedangken Jop tetap setia erkemalangen man Dibata ikenai alu erbage-bage kesusahen. Tapi Jop tetap mengandalken Tuhan i bas kegeluhenna, la sitik pe lit sura-surana nadingken Dibata. Kai si jadi gegeh Jop ngalaken si bage rupana? Kiniteken Jop man Dibata, maka Dibata kap si negu-negu kegeluhen tinepaNa, kesah manusia lit i bas tan Dibata (ay. 9). Dingen Tuhan si mereken kepentaren ras gegeh guna ndalankenca.

Payo i bas kalak si enggo metua lit kepentaren, lit pengertin, erkiteken rusur ikataken enggo “mbue man asam ras sira”. Pengalamen me si erbahanca kalak si enggo metua lit kepentaren ras pengertinna. Tapi i bas Dibata lit kepentaren dingen gegeh, lit pengertin ras gegeh guna ndalankenca. Ertina labo terjeng kepentaren ras pengertin saja tapi kengasupen guna ndalanken kai si enggo ieteh kita. Ertina, adi ras Dibata la memandang usia, tapi i bas kita ernalem man Tuhan, iberekenNa kepentaren, pengertin guna ngantusi kai si terjadi i bas kegeluhenta ras gegeh guna ndalanken si enggo sieteh. Labo hanya ieteh, iangkai kata Dibata tapi lit gegeh guna ndalankenca. Labo hanya mampu bertahan i bas perbeben si nderpa tapi tetap mampu erbahan si ngena ate Dibata, bagi si ilakoken Jop.

Bena-benana kepentaren e me kap erkemalangen man Dibata. Jop tetap setia erkemalangen man Dibata, amin sekali erbage-bage kiniseran nderpa tetap kinitekenna man Dibata. Kepentaren si idataken Jop, maka kalak si bujur pe mengalami erbage-bage kesusahen. Ikut Yesus pikul salib, desken Yesus sendiri pe mersan kayu persilang i bas ngalemi dosa-dosa manusia. Dibata la pernah nandingken kalak si tetap setia ernalem man baNa, iberekenNa gegeh ras serpang pulah tepat i bas waktuNa. Bagi si ialami Jop, kebayakenna ibereken Tuhan dua kali lipat buena asa si mbarenda, anak-anakna lit ka pitu dilaki ras telu diberu. Tuhanta la pernah tunduh.

PA MAMRE GBKP TGL. 27 AGT. - 2 SEP. 2017

Nrs. Pdt. L. Sinuhadji (Bp. Rey Tarigan)

HUT MAMRE

Ogen : Kejadin 1:26-27

Tema : MAMRE SI NCIDAHKEN TEMPAS DIBATA

Tujun Gelah Mamre : 1) Nandai dirina selaku tinepa Dibata si maba kiniulin

2) Ngergaken dirina alu ngelakoken perbahanen si ngena ate Dibata

Metode : Evaluasi & Nandai Diri

Penjelasan Bahan Ogen & Aplikasi

Bahan ogenta sendah akap kami enggo rusur sibegiken kita entah pe sibahas. Tapi amin bage gia Kata Dibata tetap mabai kita ku bas pemahamen si mbaru bage pe mereken gegeh si mbaru man banta kerina. “Nina Dibata, “Genduari Sijadikenlah manusia si sentudu ras tempasTa, si menam seri ras Kita, gelah ikuasaina kerina nurung, perik-perik, bage pe kerina asuh-asuhen ras rubia-rubia si meliar, subuk si galang ras si kitik.” E maka ijadiken Dibata manusia, si sentudu ras tempasNa; dilaki ras diberu ijadikenNa”. I bas si e, ngataken bujur kita man Dibata sebab i bas kerina tinepa si ijadiken Dibata, manusia (dilaki ras diberu) ngenca si ijadiken Dibata sentudu ras tempasNa. “Si sentudu ras tempasTa si menam seri ras Kita” i bas Alkitab TB-LAI nina, “menurut gambar dan rupa Kita”, i bas Alkitab BIMK-BIS nina, “yang akan menjadi seperti Kita dan menyerupai Kita”. Antusenna lit hubungen (relasi) si khusus (istimewa) antara manusia ras Dibata, i ja manusia ijadiken Dibata mitra kerjaNa i bas ncidahken kemulianNa i tengah-tengah doni enda. Mitra Dibata ertina, manusia ngelakoken kerina si jadi peraten Dibata. E maka i bas manusia “ngkuasai” doni enda labo i bas pengertin mendominasi entah pe mengeksploitasi tapi i bas pengertin menata kelola alu mehuli kerina tinepaNa guna kemulianNa sue ras peratenNa.

Kuasa dosa erbahanca kemulian Dibata i bas manusia enggo bene. Si lit i bas manusia kenca ikuasai dosa e me peraten guna ngelakoken kerina si la mehuli, termasuk mendominasi entah pe mengeksploitasi kerina si lit i bas doni enda guna kepuasen dirina jine. Tapi kuasa dosa enggo italuken Yesus Kristus, kemulian Dibata i bas manusia si tek man baNa enggo ipulihken. Rasul Paulus ngatakenca Yesus Kristus e me tempas (rupa) Dibata si banci iidah manusia janah kemulianNa segambar ras Dibata (Kol. 1:5; 2 Kor. 4:4). Ertina identitasta selaku kalak si ncidahken kemulian Dibata reh tangkasna kenca kerehen Yesus Kristus ku tengah-tengah doni enda, nina rasul Paulus i bas 2 Kor. 3:18, “Janah kita kerina natap dingen pembincarken sinalsal kemulian Tuhan alu ayo si la itutupi. Kemulian e, si rehna i bas Tuhan nari, e me Kesah, ngobah kita reh dekahna reh muliana, seh maka kita dungna segambar ras Tuhan”. Kerina kalak si tuhu-tuhu tutus erkiniteken man Dibata i bas Yesus Kristus lit i bas proses pembaharuan si kedungenna segambar ras Tuhan. I bas identitasta selaku kalak si ncidahken kemulian Dibata tentuna tangkas i bas caranta rukur, pengerananta, bage pe perbahanenta.

Tema si seh man banta i bas rangka HUT Mamre GBKP si pe-22-ken e me “Mamre si ncidahken tempas Dibata”, alu tujun gelah Mamre nandai dirina selaku tinepa Dibata si maba kiniulin ras ngergaken dirina alu ngelakoken perbahanen si ngena ate Dibata. Metodena evaluasi ras nandai diri. I bas tujun si pemena perlu radu ras siakui maka rikutken sejarah bengketna Berita si Meriah ku tengah-tengah masyarakat Karo, maka proses internalisasi nilai-nilai kiniteken i bas Yesus Kristus lenga tuhu-tuhu mengakar ras mabai perobahen ku si mehuli sue ras peraten Dibata. Tapi arah kerina pembinaan-pembinaan erkiniteken si enggo ilakoken i tengah-tengah Gerejanta iarapken maka semakin melala perpulungen, khususna Mamre, si tuhu-tuhu tutus erkiniteken man Yesus Kristus janah kinitekenna e tuhu-tuhu mabai perobahen si nyata i bas geluhna ras banci jadi usihen man sekelewetna sue ras kerina si jadi peraten Dibata. Proses internalisasi si mehuli kerna nilai-nilai kiniteken i bas Yesus Kristus erbahanca kita tuhu-tuhu nandai maka kita enda tempas Dibata, kemulian Dibata lit i bas kita, janah iutusNa kita jadi mitra kerjaNa guna ncidahken kemulian Dibata e arah kerina pengkebet geluhta. I bas kita ncidahken kemulian Dibata arah kerina pengkebet geluhta e me tandana kita tuhu-tuhu enggo ngergaken dirinta selaku tinepa Dibata si maba kiniulin.

Selamat ninta man Mamre GBKP si enggo berusia 22 tahun. Reh tambahna usia Mamre GBKP reh dewasana i bas erkiniteken. Sitotoken gelah program-program Mamre baik secara Sinodal, Klasis, Runggun, bagepe Sektor semakin meningkat kuantitas ras kualitasna. Janah semakin melala Mamre si tuhu-tuhu erkemalangen man Dibata. Dibata si mpegegehi kita kerina.