PJJ GBKP Tgl. 30 Juli - 5 Agustus 2017

PJJ GBKP TGL. 30 JULI - 5 AGUSTUS 2017

Pdt. Larena br. Sinuhadji (Nd. Rey Tarigan)

Tema : ERGIAH-GIAH MAKEKEN SI LIT GUNA TUHAN
(2 Kronika 31:1-10)

Penjelasen Bahan Ogen & Renungen

Raja Hizkia e me raja si pe-13-ken i bas kerajan Juda. Lit dua turi-turin kerna raja Hizkia enda, e me i bas 2 Raj. 18-20 ras i bas 2 Kron. 29-32. Turi-turin si lit i bas 2 Raj. 18-20 mbue nuriken kerna perlawanen raja Hizkia nandangi bangsa Asyur, sedangken turi-turin si lit i bas 2 Kron. 29-32 mbue nuriken kerna pembaharuan si ilakoken raja Hizkia nandangi kegeluhen erkiniteken bangsa si ipimpinna. Ogenta i bas Pustaka si Badia erjudul “Hizkia pelimbarui kegeluhen eragama”. Pembaharuan si ilakokenna e me : 1) Rumah Pertoton ibersihken ras iendesken man Tuhan janah ifungsiken mulihi kenca enggo ndekah la igunaken erkiteken bangsa e nembah dibata-dibata si deban (2 Kron. 29). 2) Wari-wari raya keagamaan bagi si enggo itentuken i bas Undang-undang irayaken mulihi bagi semalna (2 Kron. 30). 3) Kerina gana-gana ingan ersembah kalak perbegu si lit i tiap kota i Juda ibulakkenna ras iradaskenna (2 Kron. 31:1). 4) Itetapken raja Hizkia mulihi pembagin tugas imam-imam ras kalak Lewi guna ngelaksanaken dahin-dahin keagamaan i bas Rumah Pertoton (2 Kron. 31:2). 5) Raja Hizkia mereken contoh nehken persembahen man Tuhan janah ikatakenna man kerina rayat gelah nehken persembahen man Tuhan rikutken si enggo itentuken i bas Undang-undang. Kerina rayat ngikutken kai si ikataken raja janah kenca enggo empat bulan ndekahna mbue terpepulung persembahen-persembahen i bas Rumah Pertoton (2 Kron. 31:3-10).

Lit telu hal si banci sipelajari arah pembaharuan si ilakoken raja Hizkia. Si pemena, pembaharuan ibenakan i bas diri sendiri. Raja Hizkia mereken teladan man banta, benaken jadi raja, ia enggo menakenca alu erkemalangen man Dibata (2 Kron. 29:2). Si peduaken, njadiken Tuhan Dibata si utamana i bas kegeluhen. Hal enda teridah i bas ketutusen raja Hizkia mpelimbarui kerina hal si berkaiten ras penyembahen man Dibata i bas Rumah Pertoton. Si peteluken, lit dukungen i bas kerina pihak i bas erbahan pembaharuan. Adi la lit dukungen i bas kerina pihak, khususna i bas kerina rayat nari, pembaharuan si ilakoken raja Hiskia la banci erdalan alu mehuli.  

Tema PJJ-nta sendah e me “Ergiah-giah makeken si lit guna Tuhan” i bas rangka mperingeti GBKP njayo si pe-76-ken. Ngataken bujur kita man Dibata erkiteken benaken tanggal 21-23 Juli 1941, i bas Sidang Sinode si pemena i Sibolangit, GBKP enggo njayo (mandiri). Kenca enggo 76 tahun njayo tentuna enggo banci radu ras siidah perkembangen si luar biasa si lit i bas Gerejanta bekas pengarak-ngarak Kesah si Badia bage pe enggo reh buena perpulungenta si ergiah-giah guna ikut muat bagin i bas perkembangen Gerejanta. Kemandirian entah pe njayo e me salah sada bagin i bas pembaharuan. Si awalna bergantung denga kita man zending Belanda nari, gundari enggo mandiri la nai bergantung man pihak asing. Proses kemandirian GBKP enda tentuna labo ngadi seh 76 tahun ngenca, tapi berkelanjutan seh maranatha, Tuhan Yesus reh si peduakaliken. Lit telu hal si ilumbaken i bas kemandirian GBKP e me kemandirian i bas daya, dana, ras teologi. Penungkunen evaluatif man banta pribadi lepas pribadi, kenca enggo 76 tahun GBKP njayo, enggo seh i ja keterlibatenta i bas proses kemandirian e khususna i bas hal daya, dana ras teologi?

Rikutken ogenta sendah, kemandirian GBKP arus terus-menerus sidukung. Tanpa lit dukungen i bas kita nari perpulungen GBKP maka proses kemandirian enda la banci erdalan alu mehuli, sebab GBKP e me kita. Kerina kita banci ikut muat bagin i bas proses kemandirian enda. I bas hal daya, umpamana, nggit kita mengembangken talenta entah pe pemere-pemere Kesah si  lit bas kita arah secara proaktif ikut muat bagin i bas dahin-dahin Gerejanta amin pe kita labo serayan entah pengurus. I bas hal teologi, umpamana, nggit kita tutus erlajar kerna kerina rumusen-rumusen teologis si enggo ibahan i bas Gerejanta (Konfesi, Tata Gereja, GBP, rsd.) entah pe nggit kita muat bagin i bas kerina pembinaan-pembinaan si ilitken i bas Gerejanta baik secara Sinodal, Klasis bage pe Runggun. I bas hal dana, umpamana, tutus kita nehken persepuluhenta, ermeriah ukur i bas kita nampati pembangunen Gerejanta, rsd.

Kerina si mehuli si lit bas kita tek kita rehna i bas Dibata nari. Janah kerina si mehuli e arus sipakeken guna kemulian gelar Tuhan i bas kegeluhenta, khususna i bas kemandirian GBKP. Kemandirian ibenaken i bas dirinta pribadi lepas pribadi. Mari radu ras kita erlajar jadi jemaat si mandiri, la nai man iah-iahenken i bas kai pe si berhubungen i bas dahin-dahin Gerejanta. I bas si e tentuna perlu pembaharuan terus-menerus i bas kita erkiniteken man Dibata. Semakin paguh kinitekenta man Dibata semakin kita menyadari keleng ate Dibata si la erkeri-kerin i bas kegeluhenta. Semakin kita menyadari keleng ate Dibata si la erkeri-kerin e, semakin kita ergiah-giah ikut muat bagin i bas proses kemandirian GBKP. GBKP e me kita. Dibata si mpegegehi kita.