PJJ GBKP Tgl. 6 - 12 Agustus 2017

PJJ GBKP TGL. 6 - 12 AGUSTUS 2017

Pdt. Larena br. Sinuhadji (Nd. Rey Tarigan)

Tema : GEREJA SI MABA KEJUAH-JUAHEN NANDANGI PERPULUNGEN (Lukas 4:16-19)

Penjelasen Bahan Ogen & Renungen

Kehadiren Gereja entah pe kalak si tek arus maba pasu-pasu ku sekelewetna. Pernyataan enda siimani ras siaminken erkiteken Yesus selaku Tuhan ras Juruselamatta pe reh ku doni enda guna maba kejuah-juahen. Hal enda banci teridah i bas kerina karya ras tugas pelayanen si enggo idalanken Yesus sedekah IA nggeluh i doni enda. Janah enda pe teridah i bas bahan ogenta sendah i bas Yesus menaken pelayanenNa i Galilea alu mengajar i Rumah-rumah Pertoton si lit i je janah kerina kalak mujiken Yesus. Seh ka Yesus ku Nasaret, e me kuta inganNa ipebelin. Tupung wari Sabat bagi biasana reh ka IA ku Rumah Pertoton. Tedis Yesus guna ngoge Pustaka si Badia ras ibereken kalak man baNa kitab nabi Yesaya. I bas ibadah harian Yahudi tetap iogeken Taurat, tapi i bas wari Sabat biasana itambah alu bacaan i bas kitab Nabi-nabi. Janah setiap dilaki si enggo dewasa banci iundang pejabat Rumah Pertoton guna ngoge, adi ngasup banci ka mereken penjelasen (bdk. Perb. 13:15, 27). Janah biasana kesempaten-kesempaten si bage nge si rusur ipake Yesus ras Paulus guna mberitaken Berita si Meriah man kalak Yahudi.

Si iogeken Yesus e me nubuaten i bas kitab nabi Yesaya 61:1-2, kenca bangsa enda mulih i bas pembuangen Babil nari. “Kesah Tuhan lit i babongku”, Kesah Tuhan e me gegeh Tuhan si iberekenNa guna banci ndalanken tugas. Janah Yesus sendiri benaken bas bertin nari enggo idemi Kesah si Badia (Luk. 1:35), i bas IA iperidiken (Luk. 3:22), janah alu gegeh kuasa Kesah si Badia italukenNa kuasa Iblis asum IA icubai Iblis (Luk. 4:1,14). Kesah si Badia si menjadi gegeh man Yesus, rasul-rasul bahkan kerina kalak si tek i bas ndalani tugas panggilenNa, maka kehadirenNa, kehadiren kalak si tek maba kejuah-juahen. “Meritaken Berita si Meriah man kalak musil, erberita man kalak siitaban maka ipulahi me” (dua kali berita e ipeseh, “kalak itindas ipulahi me ras mpebetehken masana Tuhan mulahi bangsaNa”). Tuhan Yesus nerusken inti pengarapen tahun Yobel (Im. 25:8-55) i ja setiap tahun pe-50-ken juma ipediat la banci pake, budak ibebasken, utang iputihken. Peraturen enda ilakoken dalam rangka mperdiateken kesejahteraan kalak Israel, secara khusus kalak si musil.

Visi GBKP 2016-2020 e me “GBKP menjadi kawan sekerja Allah menyatakan rahmat Allah kepada dunia” entah pe “GBKP aron Dibata guna jadi pasu-pasu man isi doni enda”. Selaku Gereja dahinta labo terjeng er-Berita i mimbar alu kata-kata tapi secara holistik, jasmani ras rohani. Secara khusus GBKP sangat menonjol i bas Pelayanen Diakonia : Alpha Omega (kalak si berkebutuhen khusus iperdiateken); PAK Gelora Kasih, Pusat Pelayanen Orangtua Sejahtera, Badan Pelayanan Kesehatan GBKP ras HIV / AIDS - Napza, Bank Perkereditan Rakyat, CU, CUM si banci meningkatken kesejahteraan perpulungen bage pe kalak si deban, selain banci menabung, banci memimjam alu bunga si kitik janah ilitken ka pelatihen-pelatihen guna mengembangken talenta si banci nambahi perbeliten jabu (erbahan kue, kursus menjahit, salon, i bas bidang pertanian, erbahan pernak-pernik dari sampah daur ulang, rsd). Bage pe mendampingi anggota perpulungenta arah Pendampingen Pastoral gelah megegeh i bas ngalaken perbeben si mberat. Enda me si arus terus-menerus ilumbaken ras ihadirken i bas kegeluhen ber-Gereja, gelah lit tuhu nanamna Gereja nandangi perpulungen Tuhan.

Bage pe kita secara pribadi e me Gereja. Kehadirenta maba kejuah-juahen man sekelewetta, ibenaken i rumahta, man sangkep geluh, jiran tetangga, teman-teman perpulungen ras kalak si deban. Arah perukuren si membangun ras positif, arah pengerana si memotivasi, arah perbahanen si mehuli ras nampati. Bagi nina Mother Teresa, “Mengasihi harus menjadi perbuatan sedemikian biasa bagi kita sebagaimana hidup dan bernapas, hari demi hari sampai ajal menjelang”.