PJJ GBKP Tgl. 20 - 26 Agustus 2017

PJJ GBKP TGL. 20 - 26 AGUSTUS 2017

Pdt. Larena br. Sinuhadji (Nd. Rey Tarigan)

Tema : GEREJA SI MABA KEJUAH-JUAHEN NANDANGI BANGSA RAS NEGARA (Daniel 6:4,10,19-28)

Penjelasen Bahan Ogen & Renungen

Tema-nta i bas PJJ minggu enda hampir seri ras tema dua minggu si lewat “Gereja si maba kejuah-juahen man perpulungen”. Ertina kehadiren Gereja entah pe kalak si tek arus maba kejuah-juahen man perpulungen, man masyarakat i ja ia tading, bahkan man bangsa ras negara. Rikutken Visi GBKP 2016 - 2020 “Gereja aron Dibata guna jadi pasu-pasu man isi doni enda”, ertina kehadiren Gereja tuhu-tuhu ernanam man sekelewetna, labo terjeng alu kata-kata tapi arah kerina pengkebet geluhna.

Daniel tokoh bangsa Yahudi si iambekken ku Babel terus ku Persia (bindu 5:30 kerajan Babel ndabuh ku bas tan Darius raja Persia) tetap berintegritas, subuk i Babel bage pe i Persia. I bas ogenta sendah Darius ngangkat 120 gubernur si itugasken i belang-belang kerajan Persia. Janah Daniel ras dua kalak si deban iangkat raja jadi wakilna mperdiateken pendahin gubernur-gubernur e. Dahin Daniel ndauh ulin asangken gubernur-gubernur bage pe dua wakil raja si deban, ras lit sura-sura raja guna ngangkat Daniel jadi wakilna ngaturken kerina kerajan e. Tentu dua wakil raja si deban ras gubernur-gubernur la senang ras idaramina dalan guna banci ndabuhken Daniel. Daniel sangat berintegritas, i bas pendahinna la lit sitik pe ibahanna si salah ras si la bujur. E maka sepakat kalak enda guna ndabuhken Daniel arah aturen agamana si enggo pasti berbeda ras kalak Persia. Daniel jelas kalak Yahudi si tetap setia erkemalangen man Dibata ras teridah maka ia patuh ertoto man Tuhan telu kali sada wari. Kesepakaten si ibahan kalak enda irembukenna man raja, e me gelah ipedarat raja aturen selama telu puluh wari guna tetap nembah, ras mindo kai pe man raja la banci ku si deban, ise si melanggar iambeken ku bas lubang singa.

Kenca enggo ieteh Daniel aturen enda labo ia mengubah perbahanen si biasa ilakokenna, tetap nge ia ersembah man Dibatana. Ras erkiteken si e nge maka Daniel iambeken ku bas lubang singa. Radu ras siteh maka kedungenna Daniel isampati Tuhan, ikatupken Tuhan babah singa-singa e seh makana tetap sehat ras mejuah-juah Daniel. Nina Daniel, “si enda ibahan Dibata sabab ietehNa aku bujur, janah la lit kubahan si salah salah man kam o Raja”. Raja sendiri senang ras mengakui integritas Daniel rikut ras kemahakuasaan Dibata si isembah Daniel. Erkiteken si e, ibahan raja Darius surat man kerina bangsa, suku ras cakap i doni enda guna tetap mbiar ras mehamat man Dibata si isembah Daniel. Sedangken kerina kalak si ngaduken Daniel ras kerina keluargana iambekken ku lubang singa.

Melala tokoh Alkitab si deban si kegeluhenna jadi pasu-pasu man bangsa ras negara i ja ia tading erpalasken kiniteken si tuhu-tuhu nandangi Dibata, bagi Yusuf, Nehemia, Ester, ras teman-teman Daniel. I bas cataten sejarah, melala tokoh Kristen si geluhna jadi pasu-pasu man bangsa ras negarana. Janah memang e nge si jadi peraten Dibata i bas geluhta, ipasu-pasu Dibata gelah jadi pasu-pasu man doni enda. Gereja bage pe kerina kalak si tek man Yesus Kristus iutus guna jadi pasu-pasu man doni enda.

Gereja e me kap kita, subuk secara organisasi bage pe pribadi, maka i japa pe kita, kehadirenna arus min maba kejuah-juahen man bangsa ras negaranta. Melala contoh kongkrit si banci silakoken, sebage si erdahin entah pengusaha, pegawai, perbinaga, rsd., tetap kita ngelakoken pendahinta alu mehuli, berintegritas. Ula min tercurna gelar Dibata arah perbahanenta, umpamana korupsi, kurang disiplin, pengerana ras perbahanenta la mehuli. Labo kita erdahin erkiteken mbiar man atasennta tapi erkietken mbiar kita man Dibata, seh makana je la je atasenta tetap si mehuli silakoken. Kewajibanta sebage warga negara tetap sidalanken, membayar pajak ras patuh nandangi aturen bas negaranta enda.

Jadi sada evaluasi man banta pribadi lepas pribadi gelah i bas wari-wari si reh enda reh mehulina kegeluhenta bage pe pendahinta. Reh buena Daniel-Daniel masa kini i bas negaranta enda. Mantan Gubernur DKI Ahok enggo mereken usihen man banta, aminna pe arus ngkorbanken dirina tapi iakui enterem jelma seh ku dunia internasional perbahanenna si bujur ras tetap berintegritas.