PA Kategorial GBKP Tgl. 13 - 19 Agustus 2017

PA MAMRE GBKP TGL. 13 - 19 AGUSTUS 2017

Pdt. Larena br. Sinuhadji (Nd. Rey Tarigan)

HUT LANSIA

Ogen : Jesaya 46:4

Tema : MEDIATE NANDANGI KECIBAL ORANG TUA

Tujun Gelah Mamre : 1) Ngangkai maka umur si gedang e me pasu-pasu i bas Dibata nari; 2) Ngergaken kalak si enggo Lansia

Metode : Diskusi

Penjelasan Bahan Ogen & Aplikasi

Ogenta sendah termasuk i bas nubuaten nabi Yesaya kerna kepulahen bangsa Israel i bas pembuangen Babilon nari (Yes. 40-55). Raja Babilon bakal italuken raja Persia janah kerina kalak Israel si itaban banci mulih ku kutana. I bas kerina nubuaten si isehken nabi Yesaya man bangsa Israel si sangana itaban e, lit i je pengarapen si mpeturah semangat si mbaru janah reh paguhna kiniteken man Dibata amin pe bangsa e lit denga i bas pembuangen. Tapi i bas kinatana melala ka bangsa e si latih akapna erkiniteken man Dibata seh makana isembahna dibata-dibata si deban si lit i bas pembuangen.

Ogenta sendah i bas Pustaka si Badia lit i bas perikop kelanjuten bindu 45 alu judul “TUHAN doni enda ras gana-gana Babilon”, i bas Alkitab TB-LAI lit i bas perikop terpisah alu judul “Para dewa Babel tidak berdaya”, janah sope si e lit sada perikop i bas bindu 45 alu judul “Seruan kepada bangsa-bangsa supaya kembali kepada TUHAN”. Ertina, i bas latar belakang ogenta sendah teridah maka lit kalak Israel si isembahna dibata-dibata si deban, e maka ipersingeti nabi Yesaya gelah mulihken ku TUHAN Dibata. Sebab la lit kuasa i bas dewa Bel, Nebo, dibata-dibata ras gana-gana Babilon.

I bas ay. 3-5 ikataken Dibata erkelangken nabiNa Yesaya man bangsaNa niNa, (ay. 3) “O kesusuren Jakup, dengkehkenlah Aku, kam kerina si tading denga i bas bangsangKu. Enggo kutatang-tatang kam mulai i bas bertin nari, tangtang tubuhndu nari enggo kam Kuembahi. (ay. 4) Aku kap Dibatandu, e maka Kuembah-embah kam, seh kam metua janah ubanen. Aku si njadiken kam, e maka Kutatang-tatang, Kuangkip-angkip, janah Kukelini kam. (ay. 5) Ras ise kin Aku banci ipeserindu? Lit kin si deban bali ras aku?” I bas ayat-ayat enda jelas maka TUHAN e me Dibata Si njadiken bangsaNa, Si setia natang-natang, ngangkip-angkip, ngembah-embah, ras ngkelini bangsaNa, mulai i bas bertin nari seh metua janah ubanen. E maka sembahlah IA.

Kesetian Dibata i bas ngkelengi bangsaNa la lit batasna amin pe rusur bangsaNa la setia man baNa. Ukumen ras kiniseran si nialami bangsaNa e me termasuk cara Dibata i bas ngkelengi bangsaNa gelah tuhu-tuhu ididik erkemalangen man baNa. Janah la pernah itadingken Dibata bangsaNa si sangana lit i bas ukumen ras kiniseran. I bas si e tentuna enggo radu ras siteh kai si jadi sura-sura Dibata nandangi kita anak-anak si ikelengiNa, e me tuhu-tuhu erkiniteken, erkemalangen man baNa janah ngelakoken kerina si jadi peratenNa.

PA-nta sendah e me i bas rangka HUT Lansia pe - 26 tahun - ken (15 Agustus 1991), alu tema “Mediate nandangi kecibal orangtua”, ras tujun gelah Mamre ngangkai maka umur si gedang e me pasu-pasu i bas Dibata nari, ras ngergaken kalak si enggo Lansia. Tek kita maka umur si gedang e me pasu-pasu i bas Dibata nari sue ras janjiNa i bas ogenta sendah. Tapi lit kata-kata bijak si ngatakenca, “menjadi tua adalah kenyataan yang tidak bisa ditolak, tetapi menjadi dewasa itu pilihan”. Ertina umur si gedang tuhu-tuhu jadi pasu-pasu adi reh dewasana kita i bas kai pe khususna i bas erkiniteken janah nggit kita ipake Dibata jadi saluren pasu-pasuNa man sekelewetta. Arapenta tentuna kerina kalak si enggo metua secara usia i bas GBKP e me kalak si reh dewasana i bas kai pe, khususna i bas erkiniteken man Dibata. Janah tujun ilitkenna lembaga kategorial Lansia (Saitun th. 2015 Sid. Sinode) i bas GBKP labo terjeng gelah lit wadah guna perpulungen si enggo lanjut usiana, tapi si lebih penting gelah kebutuhen kerna erkiniteken tuhu-tuhu terfasilitasi.

Ngergaken orangtua e me salah sada perentah Dibata man banta, janah akap kami kerina kita Mamre tuhu-tuhu enggo mehamat, ngergaken, ras mediate nandangi kecibal orantuanta masing-masing. Masmur 90:10 ngatakenca “Dekahna kami nggeluh lit pitu puluh tahun, adi kami megegeh banci jadi seh waluh puluh tahun. Tapi kesusahen e me ayam-ayam geluh kami”. Ertina, umur si gedang e me pemere Dibata, dekah banci nggeluh bas doni enda, seh iidah kempu-kempu sue ras padan Tuhan (Mas. 128:6). Tapi i bas dampar si deban, kesusahen enggo jadi ayam-ayam geluhna (turah erbage pinakit, urak gegeh, pemegi berkurang bahkan lit deba pasek, pengidah pe berkurang, erdalan mesera, pertunduh la sikap, penginget kurang, mesera man kai pe sabab ipen pe enggo ropang ras la nari banci ternikmati kai pe sekali pe pangan-pangan si ntabeh, rsd). I bas si enda nge perlu pengertin, kesabaren i bas anak-anak terus ku kempu guna banci alu dem kekelengen mperdiateken orangtuanta enda, terlebih Mamre. Sebab terkadang la nari lit waktu guna mperdiateken orangtuanta enda erkiteken kesibuken, piah dungna erbahanca megelut ukur orangtuanta. Sibimbing orangtuanta maka tetap igejapina pengekelengi ras kesetian Tuhan arah kehadiren keluarga. Sibabai terus maka tetap orangtuanta pe erkemalangen man Tuhan alu tutus seh ia ngadap ku Tuhan Dibata.

PA MORIA GBKP TGL. 13 - 19 AGUSTUS 2017

Pdt. L. br. Sinuhadji (Nd. Rey Tarigan)

HUT LANSIA GBKP

Si Man Ogen : Titus 2:1-5

Tema : NGERGAI RAS NGIKUTKEN AJAR LANSIA

Tujun : Gelah Moria : 1) Nginget ajaren-ajaren orangtua; 2) Erbahan aksi secara pribadi/organisasi untuk Lansia

Metode : Diskusi & Aksi

Penjelasan Bahan Ogen & Renungen

Ogenta e me sada bagin pedah-pedah rasul Paulus nandangi Titus anak rohanina. I bas bindu 1:15 teridah maka tujun rasul Paulus nadingken Titus i Pulau Kreta gelah ipejorena dahin si perlu idungi, bage pe gelah ngangkat pertua-pertua i bas tep-tep kuta. I bas usiana si nguda denga bagi Timotius, tentuna Titus perlu denga iarak-arak Paulus gelah kerina dahin-dahin pelayanen banci erdalan alu mehuli. Guna tujun si e nge surat enda ipeseh Paulus man bana.

Pedah-pedah si lit i bas ogenta sendah itujuken man perpulungen i ja Titus ngelai, khususna man perpulungen si enggo metua. Ikataken rasul Paulus amin pe nguda denga Titus tapi arus iajarkenna si sentudu ras pengajaren si payo, khususna man perpulungen si enggo metua. I bas ay. 2 ikataken maka dilaki si enggo metua gelah jore ukurna, mehuli lagu langkahna, dingen ngasup ngkuasai dirina, tuhu-tuhu sehat kinitekenna, erkeleng ate dingen megenggeng. I bas Alkitab TB-LAI ikataken nina, “Laki-laki yang tua hendaklah hidup sederhana, terhormat, bijaksana, sehat dalam iman, dalam kasih dan dalam ketekunan”.

Ay. 3-5 e me pedah-pedah man diberu si enggo metua, ikataken maka diberu-diberu si enggo metua gelah bersih lagu langkahna, la banci ncekuraki kalak si deban, la banci nagih minem anggur, arus ia ngajarken si mehuli man diberu si nguda denga kerna keleng ate man perbulangenna ras anak-anak, gelah ngasup ngkuasai dirina, nggeluh badia, beluh ngaturken jabuna, dingen jadi ndehara si patuh man perbulangenna, gelah Berita si Meriah i bas Dibata nari tuhu-tuhu erkuasa nandangi sekelewetna. I bas Alkitab TB-LAI nina, “Demikian juga perempuan-perempuan yang tua, hendaklah mereka hidup sebagai orang-orang beribadah, jangan memfitnah, jangan menjadi hamba anggur, tetapi cakap mengajarkan hal-hal yang baik dan dengan demikian mendidik perempuan-perempuan muda mengasihi suami dan anak-anaknya, hidup bijaksana dan suci, rajin mengatur rumah tangganya, baik hati dan taat kepada suaminya, agar Firman Allah jangan dihujat orang”.

Akap kami la mesera guna ngangkai bahan ogenta sendah, pedah-pedah e kerina sifatna praktis erpalasken kiniteken man Yesus Kristus. Engkai maka isehken rasul Paulus pedah-pedah e man perpulungen si enggo metua? Mungkin paksa si e melala orangtua si labo jadi usihen man generasi muda. Geluhna berbanding terbalik ras kerina pedah-pedah si isehken rasul Paulus. I bas si e tentuna kalak si enggo metua la saja jadi beban man perpulungen tapi jadi beban sosial man masyarakat i sekelewetna. Si e nge si ate rasul Paulus iajarken gelah Berita si Meriah tuhu-tuhu erkuasa nandangi masyarakat i sekelewet perpulungen kalak Kristen paksa si e.  

PA-nta sendah i bas rangka HUT Lansia alu tema “Ngergai ras ngikutken ajar Lansia” ras tujun gelah Moria nginget ajaren-ajaren orangtua ras erbahan aksi secara pribadi/organisasi untuk Lansia. Ngergai ras ngehamati kalak si enggo metua entah pe orangtuanta e me termasuk pedah Dibata man banta. Tapi adi ngikutken ajar, tentuna perlu kita kritis i bas hal enda. Pengajaren si uga? Adi pengajaren si la payo apakah tetap arus siikutken? I bas Heber 12:9 ikataken i bas bhs. Ind., nina, “kita harus lebih taat kepada Bapa segala roh, supaya kita boleh hidup”, bdk. Perb. Rasul 5:29, nina, “Kita harus lebih taat kepada Allah dari pada kepada manusia”. Ertina si niarapken kita nandangi kalak si enggo metua entah pe orangtuanta e me banci jadi usihen man sekelewetna sue ras peraten Dibata bagi ogenta sendah. E maka ingetlah rusur pengajaren-pengajaren orangtuanta si mehuli si sue ras Kata Dibata janah wariskenlah e man anak-anakta.

Ngataken bujur kita man Dibata erkiteken enggo lit Lembaga Kategorial Lansia i bas GBKP. Ertina perbeben khusus nandangi kalak si enggo metua enggo banci terwadahi arah litna Lembaga Kategorial Lansia. Lembaga Kategorial Lansia enda arus sidukung gelah kualitas ras kuantitas pelayanenna banci terus-menerus meningkat janah orangtuanta pe tuhu-tuhu terfasilitasi kebutuhenna erkiniteken man Dibata alu mehuli. Selamat ninta man Lansia. Mari radu ras kita ertoto gelah ipengasup Dibata kita mendukung Lansia i bas GBKP.