PA Kategorial GBKP Tgl. 20 - 26 Agustus 2017

PA MAMRE GBKP TGL. 20 - 26 AGUSTUS 2017

Nrs. Pdt. L. Sinuhadji (Bp. Rey Tarigan)

Hari Kemerdekaan RI

Ogen : Miha 2:1-13

Tema : MAMRE SI MERDEKA

Tujun Gelah Mamre : 1) Meteh makna kemerdekaan

2) Nggeluh selaku Mamre si enggo merdeka

Metode : Perenungen

Penjelasan Bahan Ogen & Aplikasi

Nabi Miha e me sekalak nabi kuta Moreset nari (38 km i selatan Yerusalem) si nggeluh ras erdahin sebage nabi i Israel sekitar abad VIII SM raduken ras nabi Yesaya, Amos, ras Hosea. I bas bindu 1:1 ituriken kerna waktu pendahin nabi Miha e me tupung paksa Jotam, Ahas, ras Hiskia jadi raja-raja Juda, bage pe wilayah pendahinna e me mencakup Samaria (ibu kota kerajan Israel utara) ras Yerusalem (ibu kota kerajan Israel selatan). Secara umum berita si isehken nabi Miha seri bagi nabi-nabi si nggeluh sada angkaten ras ia, e me persinget man bangsa Israel gelah jera i bas kinilasetianna nandangi Dibata, bage pe nubuaten-nubuaten kerna pembuangen ras pengarapen khususna nubuaten si terkenal e me kerna kerehen sekalak Mesias (Mi. 5:1-4; bdk. Mat. 2:1-6; Luk. 2:4-7; Yoh. 7:42).

Secara khusus i bas ogenta sendah, nabi Miha mengkritik kinilaadilen ras kesewenang-wenangen si ibahan peminpin-peminpin bage pe kalak bayak si mpergunaken kuasa si lit bas ia guna ngelakoken erbage-bage kejahaten. Ay. 1 i bas Alkitab BIMK-BIS lebih jelas ikataken, “karena mereka mempunyai kekuatan untuk melakukannya”. Kejahaten-kejahaten luar biasa si ilakoken e me : irampasna juma kalak, ibuatna rumah kalak, la ibahanna aman jabu ras erta kalak (ay. 2); ibahanna rayat jadi musuhna janah itangkona si kerajangenna (ay. 8); ipelawesna diberu-diberu janah irampasna kemulian Dibata i bas anak-anakna nari (ay. 9). Labo terjeng je saja, ngena atena man nabi si nuriken kata guak dingen penipu (ay.11), ilarangna nabi ngataken si benar ras ernubuat, sebab iakapna la lit ukumen i bas Dibata nari janah enggo benar iakapna kai si enggo ilakokenna e (ay. 6,7).

I bas kejahaten si luar biasa enda ipelawes nabi Miha kerina kalak si jahat ndai sebab dosa-dosana maba cilaka man bangsa e (ay. 10) janah erberita nabi Miha kerna ukumen si bakal ialoken peminpin-peminpin ras penguasa-penguasa si jahat ndai (ay. 3-5). Sebalikna, ipepulung ras ipersadaken Dibata kalak Israel si tetap erkemalangen man baNa. Italangi Dibata dalan janah ibabaiNa mulih bebas i bas pembuangen nari (ay. 12-13). Kerina nubuaten nabi Miha enda tuhu-tuhu terjadi.

Tema si seh man banta i bas rangka HUT NKRI pe-72-ken enda e me “Mamre si merdeka” alu tujun gelah Mamre meteh makna kemerdekaan ras nggeluh selaku Mamre si enggo merdeka. Leben ngataken bujur kita man Dibata erkiteken enggo ikawali Dibata perdalanen bangsa ras negaranta Indonesia seh 72 tahun, amin pe melala denga kita si lenga tuhu-tuhu merdeka. Melala denga kita si lenga merdeka i bas kemusilen, korupsi, judi, narkoba, radikalisme, rsd. Ogenta sekali enda ncidahkenca maka lit kalak si mempergunaken kemerdekaan si lit bas ia guna ngelakoken erbage-bage kejahaten, entah pe i bas kalimat si deban, lenga merdeka i bas kerangapen ras erbage-bage bentuk dosa si deban. I bas si e tentuna jadi sada perenungen man banta, enggo kin kita tuhu-tuhu merdeka janah mempergunaken kemerdekaan si lit bas kita guna ngelakoken kerina si mehuli sue ras peraten Dibata? Sura-sura Dibata man banta tentuna gelah kita tuhu-tuhu merdeka i bas kuasa dosa nari janah mempergunaken kemerdekaan si lit guna ngelakoken kerina si mehuli sue ras peratenNa. Dibata si mpegegehi kita.

PA MORIA GBKP TGL. 20 - 26 AGUSTUS 2017

Pdt. Larena br. Sinuhadji (Nd. Rey Tarigan)

Si Man Ogen : 1 Petrus 3:1-6

Tema  : NAMPATI PERBULANGEN NGGELUH BAS TEMPAS DIBATA

Tujun : Gelah Moria : 1) Nuriken kinijilen si rehna bas pusuh nari si la ermasap-masap;

2) Ngelakoken perbahanen si mehuli si rehna i bas pusuhna nari nandangi perbulangenna.

Metode PA : Diskusi ras Aksi

Penjelasen Bahan Ogen & Aplikasi

Surat 1 Petrus itujuken man kalak Kristen si labo kalak Yahudi si nggeluh i bas 5 propinsi : Pontus, Galatia, Kapadokia, Asia Kitik ras Bitinia (Turki), i ja bagin i bas kerajan Romawi. Tujun surat enda e me mpegegehi ukur kalak si ngogesa, si sangana iayak-ayak dingen ngenanami kiniseran erkiteken kinitekenna man Yesus Kristus (1:5-9, 4:12-19). Kalak enda tading i bas masyarakat si mbue denga nembah man dibata-dibata si deban ras nggeluh alu cara si la mehuli (2:11-12, 3:13-17, 4:3-4) si kin ndube ilakokenna. Tapi erkiteken kinitekenna man Kristus maka perbahanen si bage enggo itadingkenna. Erkiteken si e, maka mbue ialokenna kiniseran selaku kalak si tek. Surat enda itulis Petrus sekalak ajar-ajar Tuhan Yesus, ras isampati Silas i bas penterjemahenna ku bahasa Yunani si halus (5:12).

Judul bas perikop enda “Ndehara ras Perbulangen” (BIMK-BIS : “Suami dan Istri”), si nuriken kerna hubengen i bas ndehara ras perbulangenna, khususna man perbulangen si lenga erkiniteken man Tuhan entah pe la tek nandangi Kata Dibata. Kedungenna perbulangen e banci imenangken ras tek man Kristus erkiteken perbahanen si mehuli i bas ndeharana, la gia ndeharana ngerana sengkebabah pe. Labo berarti i jenda ndehara la banci ngerana ras perbulangenna, komunikasi e tetap ibangun sebage pasangan suami - istri tapi la perlu ceramah kerna Kata Dibata. Perbulangen e kedungenna tek man Tuhan arah perbahanen si mehuli si tetap ilakoken ndeharana. Idahna maka mehuli dingen mehamat lagu langkah ndeharana ras e merupaken bagin i bas kepatuhen sekalak ndehara man perbulangenna, walaupe lenga tek perbulangenna man Tuhan.

Janah i jenda pe Petrus mpersingeti maka si lebih ipentingken e me kap kinijelen pusuh asangken kinijilen darat nari si murah masap dingen “mengelabui”. Kinijelen pusuh e me kap kesabaren, kekelengen, kiniteruken ukur, kelemahlembuten, ukur si teneng, rsd., e me kinijelen si meherga kal i lebe-lebe Dibata. Ras e nggeluh i bas kita erkiteken kerembakenta man Tuhan, i ja Kesah si Badia mpengasup kita nggeluh sentudu bagi si ngena ate Dibata. I jenda labo berarti la banci jile-jile secara lahiriah entah pe cantik jasmani (BIMK-BIS : “janganlah kencantikanmu hanya kencantikan luar”), tapi labo e si utamana ras jadi perayaken sekalak ndehara, sabab e banci luntur erkiteken waktu (tradisi diberu kalak Yunani ras Romawi bukna rusur ijalin ras isanggul meganjang ras itamaken emas entah mutiara-menata rambut secara berlebihan, ras make uis si meherga).

Ibandingken Petrus ras diberu-diberu bas jaman si nai, khususna Sara i ja tetap erpengarapen man Tuhan ras iperjilena dirina alu patuh man perbulangenna. Ipersada Dibata dilaki ras diberu i bas geluh perjabun, ras ndehara sebage penolong man perbulangenna (Kej. 2:18). Ras secara khusus tema-nta memotivasi Moria khususna si perbulangenna lenga ncidahken tempas Dibata i bas kegeluhenna, lenga jadi Mamre si tutus, imam i tengah-tengah jabuna. Sebage contoh, lenga nggit ku Gereja ras ikut muat bagin i bas kegiaten Gereja, ringan tangan, erjudi, la lit kerja sama i bas jabu, egois, rsd. Firman Tuhan arah surat Petrus i bas Ulang Tahun Mamre si pe-22-ken gelah Moria jadi penampat man perbulangenna e gelah tempas Dibata pe nggeluh i bas ia (terjadi perubahen si mehuli). La banci lang, Moria entah ndehara lebe arus icidahkenna tempas Dibata i bas kegeluhenna si tep-tep wari. Moria tetap ncidahken biak-biak si mehuli si rehna i bas pusuh nari, si la ermasap-masap dingen la pekulah-kulah.

Kinijilen pusuh ras ukur e me si perlu ipekena-kena Moria sabab arah si e banci terpancar ku ayonta. Umpamana, melala siidah kalak, potongen ayona biasa-biasa saja, tapi la bosan kita natapsa erkiteken kinijelen pusuhna si terpancar i bas ayona. Bahkan i bas Liturgi Pemasu-masun pe enggo isingetken, “Pemetikndu sebo arah darat ... bagi ngelayamken buk, make barang emas, ruwisken uis mejile tapi manusia sini bas ate alu pemetikna si la ermasap-masap, e me kap ate lemah dingen ukur saber, si meherga i bas pengakap Dibata ras manusia”. E maka kinijelen pusuh : kesabaren, kekelengen, lemah lembut, kepentaren, kinijingkaten, rsd., e me si perlu sipekena i bas dirinta arah kerembakenta ras Tuhan. Daging kula banci luntur, la nari mejile bagi si gel-gel erkiteken usia si lanjut, tapi pusuh perukuren reh ulina erkiteken kerembaken ras Tuhan. Ras e merupaken senjata guna banci memenangken sekalak perbulangen si lenga nggeluh sentudu bagi si ngena ate Dibata.