Khotbah GBKP Minggu Tgl. 26 Juni 2016

KHOTBAH GBKP MINGGU TGL. 26 JUNI 2016

Pdt. Larena br. Sinuhadji (Nd. Reynard Tarigan)

Invocatio : “Bahan maka kalak si merdang dingenna tangis banci rani alu ersurak” (Masmur 126:5)

Ogen : Galati 6:7-10 (Tunggal)

Khotbah : Pengerana 11:1-8 (Tunggal)

Tema : ERDANGKENLAH, DIBATA SI MASU-MASU

Penjelasen Bahan Pustaka Si Badia

Kitab Pengerana (Pengkhotbah) itulis sekalak si enggo lanjut umurna ras berhasil i bas geluhna. Ia ngerenungken kerna kai ertina geluh enda. Erbage-bage pengalamen ialamina, subuk si bagi ukur bage pe si lang. Aminna lit sikap pesimis i bas ndalani geluh enda, sabab usur ikatakenna, “Sia-sia geluh enda”, iajarkenna manusia gelah tutus ras ergiah-giah i bas erdahin, janah nggeluh alu dem keriahen ukur ngaloken pemere-pemere Dibata asa bancina. Khususna bas renungenta sekali enda mabai kita gelah tetap erdahin, bahkan asa bancina lit usaha (dahin) si deban sidahiken kita, sabab di kune gagal, entah la menghasilken dahinta si utama, banci ka tersampati arah usaha si deban.

I bas Pustaka si Badia ikataken, “Berekenlah ertandu man kalak si ndauh i kepar lawit”, sedangken i bas Alkitab Terjemahan Baru (TB-LAI), “Lemparkanlah rotimu ke air, maka engkau akan mendapatnya kembali lama setelah itu”. I bas terjemahen Bahasa Indonesia Masa Kini (BIMK), “Tanamlah uangmu dalam usah di luar negeri. Pasti kau dapat untung di kemudian hari”. Para penafsir mengartiken roti sebage metafor. Roti (gandum) merupakan barang ekspor si biasa iangkut alu kapal i Palestina. Ertina, enda merupkan saran gelah manusia banci mengembangken usahana. Tantangna memang lenga idah asilna, tapi kedungenna banci lit ulihna entah pe lit untungna. Lit pepatah ngatakenca, “Hari kemarin tidak dapat ditarik kembali, hari esok tidak dapat diprediksi”. Ertina kegeluhenta enda la banci terantusi kita 100%, siakap mulus, mejile, berhasil tapi banci ka gagal. E maka arus metenget, waspada ras siap sedia katawari paksa pe.

I jenda alam ipake sebage gambaren guna ncidahken bencana si bakal reh, si la banci iolangi adi kin reh atena. Adi kin enggo mendung (embun enggo dem lau), reh me atena udan. Bage pe i bas batang kayu si mbulak, la banci siolangi bahkan la banci sitentuken ku ja perbulkan. Adi sibandingken ku bas bencana-bencana si mekatep terjadi i bas paksa enda, umpamana: banjir bandang, deleng Sinabung meletus, taneh longsong, rsd., banci saja ngkenai usahanta. Tentu enggo pasti kita kecewa, asum mejile siniuan-sinuanta reh banjir, taneh longsong entah erupsi deleng si erbahanca ceda kerina sinuan-sinuanta. E maka i bas kerina situasi, subuk bagi ukur la bagi ukur arus tetap kita erdahin. Adi soal resiko, pasti nge lit lalap resikona i bas kita erdahin. “Kalak si lalap nimai wari mehuli, lalap la kari ia merdang, la kari ia rani”. Enda kerina soal niat, ketutusen, ras ula tertaren-taren i bas kita banci ndahinken dahin si mehuli. Kita arus pentar menatalayanken waktu ras ngergai waktu si erpaksa-paksa i bas kegeluhenta enda.

I bas ogenta, Paulus mereken pejemba man perpulungen Galati gelah tetap ngelumbaken geluh si mehuli. Judul periop enda “Sisampat-sampatenlah i bas maba baban nggeluh enda”. Hukum tabur tuai i jenda berlaku. Kai si isun manusia e ka nge si iperanina nina Paulus. Adi sisuan (merdang) i bas juma perukuren secara manusia (kedangingen) entah pe biak-biak si la mehuli tentu asilna pe la mehuli (“Menuai kebinasaan dari dagingnya”). Tapi adi nuan (merdang) ia i bas juma Kesah si Badia, iperanina me kegeluhen si rasa lalap i bas Kesah si Badia nari. E maka ula kita erleja-leja i bas kita erbahan si mehuli, sabab adi tutus ateta ndalanken si e, seh me paksana siperani ulihna. E maka i bas tep-tep kesempaten (selama masih ada kesempaten) tetaplah kita erbahan si mehuli man kerina manusia, terlebih man teman-temanta si sada kiniteken.

Pengkenaina

Minggu enda igelari Minggu Merdang, kenca enggo ka kita rani, meriah ukurta, tapi ula lupa maka waktuna ka kita merdang. Ertina, ngerdangken benih guna isuanken gelah i bas waktuna ka kita banci rani. Tentuna, rikutken konteksta labo hanya perjuma tapi erbage-bage pendahin si idahiken perpulungen rikutken ingan tading masing-masing. E maka ngataken bujur kita enggo ibereken Tuhan dahin guna banci sidahiken. Si paling penting rikutken perikopta, tetap kita tutus, makeken waktu ras kesempaten alu mehuli. Soal resiko i bas berusaha adalah hal si biasa, si paling penting bagianta e me ndahiken dahin e alu tutus ras mehuli. Enggo pasti dengan kerja keras ras pengorbanen. Tapi la pernah sia-sia dahin si idahiken kita, ipasu-pasu Dibata dahinta. Invocatio ngatakenca, “Kalak si merdang alu tangis, banci rani alu ersurak”. Lit ungkapen sukacita, meriah ukur asum kita rani. Bahkan banci jadi enggo lupa pe kita latihta tupung kita merdang dingen siarah-arah page si enggo isuan adi sibandingken ras kai sinialoken kita. Dibata la pernah tertunduh guna masu-masu kegeluhenta, bahkan asum kita tunduh pe i je Dibata erdahin masu-masu kerina pendahinta (bdk. Masmur 127:2, “Percuma kap encari alu latih erdahin, lampas medak dingen melawen tunduh. Sabap TUHAN mereken rejeki man kalak si ikelengiNa, tupung si ikeliniNa sangana tunduh”). Ertina, i bas kita erdahin pe ingat waktu guna pekesahken ras muji Tuhan, sabab Dibata pe banci erdahin asum kita tunduh.

Janah rikutken Firman Tuhan enda pe erlumba kita guna sisuan hal-hal si mehuli arah kerina pengkebet geluhta. Tupung ibere Tuhan kesempaten man banta mari tetap kita erbahan si mehuli i bas kegeluhenta.