PA Kategorial GBKP Tgl. 12 - 18 Juni 2016

PA MORIA GBKP TGL. 12 - 18 JUNI 2016

Pdt. Larena br. Sinuhadji (Nd. Reynard Tarigan)

Si Man Ogen : Jakup 3:1-12

Tema : RANAN SI MABA PASU-PASU

Tujun : Gelah Moria :

1) Mpelajari ranan si banci mpeturah si mehuli ras si la mehuli

2) Semal makeken ranan si mehuli (ranan/perbelas si positif)

Metode PA : Pengekspresin Diri

Penjelasen Bahan Ogen

Bahan ogen i bas Alkitab Terjemahan Baru (TB-LAI) ibere judul “Dosa karena lidah”, i bas Pustaka si Badia i bere judul “Dilah”. Si pemena lebe, rasul Jakup mereken persinget man pengajar-pengajar si ngajari perpulungen-perpulungen kalak Kristen Yahudi si enggo tersebar i darat Israel paksa si e, gelah nehken pengajaren si payo sue ras Kata Dibata. Janah kai si iajarken e arus sue ras pengeranana ras perbahanenna (ay. 1-2). Sebab ngajari e me salah sada karunia Kesah si Badia si lit guna mbangun kiniteken perpulungen (bdk. Roma 12:6-7; 1 Kor. 12:27-31). Lebih lanjut rasul Jakup mereken penjelasen kerna dilah si arus banci ikendaliken alu payo sue ras Kata Dibata bage pe kiniteken man Yesus Kristus, gelah kai pe si iajarken banci mpeturah si mehuli i bas perpulungen bage pe mbangun kiniteken perpulungen.

Si peduaken, adi sioge bahan ogenta sendah seh ay. 18, maka teridah lit denga biak-biak cian ate ras ngukurken kepentingen diri sendiri i bas perpulungen-perpulungen paksa si e. Biak-biak si la mehuli enda banci ka mpeturah ranan-ranan si la payo si kedungenna banci mabai perpulungen ku bas erbage-bage perubaten ras perjengilen (ay. 16). E maka persinget kerna dilah enda pe itujuken man perpulungen si lit denga i bas ia biak-biak cian ate ras ngukurken kepentingen diri sendiri, gelah perpulungen e pe banci menyadari bahwasana kiniteken man Kristus arus mabai perobahen i bas pengerana bage pe perbahanen. Sebab arah pusuh ras perukuren si bersih si ipalasi Kata Dibata ras kiniteken man Kristus turah pengerana bage pe perbahanen si mehuli sue ras peraten Dibata.  

Pengkenaina

Tema PA Moria sendah e me “Ranan si maba pasu-pasu” alu tujun gelah Moria banci mpelajari ranan si banci mpeturah si mehuli ras si la mehuli, bage pe semal makeken ranan si mehuli (ranan/perbelas si positif). I bas bahan ogen enggo ijelasken rasul Jakup bahwa dilah e banci mabai kita ku hal-hal si negatif bage pe si positif. Si paling penting e me palas i bas pusuh ras perukurenta. Adi palasna Kata Dibata bage pe kiniteken si payo i bas Kristus e maka kai pe si ibelasken kita e me si positif ras membangun. Sebalikna adi palasna cian ate ras ngukurken kepentingen diri sendiri e maka si turah e me ranan-ranan si la payo si banci mabai kita ku erbage-bage perubaten ras perjengilen. Pusuh ras perukuren si ipalasi Kata Dibata ras kiniteken si payo i bas Kristus pe banci berfungsi sebage alat penyaring kerina si iukurken kita guna irananken entah pe ibelasken. E maka bahan PA sekali enda mabai kita guna njadiken Kata Dibata ras kiniteken si payo i bas Kristus sebage palas pusuh ras perukurenta gelah banci mabai kita ku bas pengerana si positif, membangun, ras maba pasu-pasu man kalak si deban.

PA MAMRE GBKP TGL. 12 - 18 JUNI 2016

Pdt. Larena br. Sinuhadji (Nd. Reynard Tarigan)

Mudah tersinggung, harga diri tinggi dan sakit hati

Ogen : Kejadin 37:18-20

Tema : NGASUP MBALENGI PUSUH

Tujun :

1) Nuriken biak-biak si la mehuli i bas pusuhna si banci ncedai kegeluhenna

2) Nuriken cara-cara si ibahan Mamre gelah la mesunah megelut, meganjang ukur ras sakit hati.

Penjelasen Bahan Ogen

I bas bahan ogenta sendah teridah lit biak-biak si la mehuli i bas senina-senina Jusup. Biak-biak si la mehuli enda enggo teridah i bas ay. 4, nembeh ate senina-senina Jusup erkiteken ngenan ate Jakup bapana man Jusup asangken anak-anakna si deban bage pe si Jusup enda erkiteken kepolosenna usur ilaporkenna man bapana kerina perbahanen-perbahanen senina-seninana si la mehuli (ay. 2). I bas ay. 11, nembeh ate senina-senina Jusup enda itambahi alu cian ate man Jusup kenca ituriken Jusup nipina man senina-seninana. Nembeh ras cian ate senina-senina Jusup enda meningkat jadi niat ras rencana guna munuh Jusup i bas bahan ogenta sendah. Tapi erkiteken Ruben e maka niat la mehuli senina-senina Jusup enda la surung ilaksanaken igantiken alu ndayaken Jusup man rombongen kalak Ismael si sangana mentas (ay. 27).

Pengkenaina

Tema PA Mamre sendah e me “Ngasup mbalengi pusuh” alu tujun gelah Mamre ngasup nuriken biak-biak si la mehuli i bas pusuhna si banci ncedai kegeluhenna, ras ngasup nuriken cara-cara si ibahan Mamre gelah la mesunah megelut, meganjang ukur ras sakit hati. I bas bahan ogenta sendah enggo jelas ituriken bahwa nembeh ate bage pe cian ate banci mabai kita ku bas erbage-bage niat ras perbahanen si la mehuli. Niat ras perbahanen si la mehuli enda banci ncedai kegeluhenta sebage Mamre si erkiniteken man Yesus Kristus. Kerna si e tentuna kita arus waspada gelah ula nggit ikuasai nembeh ate bage pe cian ate man kalak si deban apai ka man senina entah pe turangta sada perpulungen. Sebage Mamre si enggo erkiniteken man Kristus tentuna biak-biak si la mehuli bagi nembeh ate, cian ate, murah megelut, meganjang ukur, sakit hati, seharusna enggo la nai lit i bas pusuh perukurenta. Tapi i bas kinatana tentu saja labo hal si murah guna masapken kerina biak-biak si la mehuli e. E maka i bas PA-nta sendah, iajuk kita Mamre gelah mpalasi pusuh perukurenta alu Kata Dibata, bage pe mindo gelah kuasa Kesah si Badia ngkuasai pusuh perukurenta i bas pertotonta. Sebab kuasa Kesah si Badia mpengasup kita guna mbalengi pusuh perukurenta i bas biak-biak si la mehuli nari.