Khotbah GBKP Minggu Tgl. 12 Juni 2016

KHOTBAH GBKP MINGGU TGL. 12 JUNI 2016

MINGGU KERJA RANI

Pdt. Larena br. Sinuhadji (Nd. Reynard Tarigan)

Invocatio : “Kenca bage maka bahanlah Kerja Rani, guna pehaga TUHAN Dibatandu, alu maba persembahen ukur meriah man baNa. Buena rikutken pasu-pasu si iberekenNa man bandu” (Ulangen 16:10)

Ogen : Keluaren 23:14-19 (Tunggal)

Khotbah : Rut 2:1-9 (Tunggal)

Tema : I BAS RANI ICIDAHKEN KEKELENGEN

Penjelasen Bahan Pustaka Si Badia

Bahan khotbahta nuriken kerna kekelengen si ialoken Rut i bas Boas nari. I bas pasal sebelumna enggo bulat ukur nadingken keluargana, bangsana guna ngikut-ngikut semetuana Naomi ku Betlehem, sabab enggo ibegi Naomi maka Tuhan enggo masu-masu bangsaNa alu peranin si mbuah. I bas perikop enda icidahken banta maka Rut berinisiatif guna ndarami kebutuhen guna ia ras bibina, i ja iputuskenna guna ku juma mumahi ruhi gandum si tading ibahan kalak rani, sabab rembang kel sangana ibenaken peranin gandum. Ras lit keyakinen i bas diri Rut maka lit nge kari kalak si nggit ngaloken ia erdahin. Janah memang rikutken Undang-undang kalak Jahudi, maka i bas rani, kenca tading deba gandum si enggo isabi kita, ola legi mulihi si tading e, si e jatah man kalak pertadang, anak melumang ras diberu mbalu-mbalu, gelah alu bage tetap ipasu-pasu Tuhan bangsa e i bas kerina pendahinna (bdk. Ul. 24. 19; Im. 19:9,10, “Adi iperanindu jumandu, ola perani seh ku duru, janah ola nai ulihi perani ruhi page si tading-tading. Ola nai ulihi niar-niar peken anggurndu guna pepulung anggur si tading ntah pe mumahi si enggo naktaken; tadingken e man kalak si musil ras man kalak si tandang. Aku kap TUHAN Dibatandu”).

Rembang ka Rut erdahin bas juma Boas, ia me kade-kade Naomi, entah pe biak senina Elimelek ndube. Ia kalak bayak janah mehangke kalak kerina man bana. Labo erkiteken kinibayekenna kalak mehangke bana tapi erkiteken Boas kalak si mehuli, ramah ras dem kekelengen. Hal enda banci siidah rikutken kai si ikateken teks, “Iperkuankenna kerina kalak si erdahin e nina, “mejuah-juah”. Janah banci itadaina kerina sierdahinna si erdahin bas ia. Sabab sungkunna mandurna kerna si Rut, “ise nge diberu enda?” Ertina, Boas aminna pe ia kalak bayak, sangat menghargai kalak si deban termasuk si erdahinna sekali pe. Ibereken mandurna penjelasen kerna ise kin Rut, ras uga Rut mindo gelah banci ngikut-ngikut kalak si rani lako banci mumahi ruhi gandum si tading-tading. Kedungenna, Boas sendiri ngerana man Rut gelah banci Rut tetap i bas jumana enda erdahin pepulung gandum. Erdahin ras diberu-diberu si ngemo. Bahkan enggo iperentahkenna, maka kerina sierdahinna si dilaki la banci nggasgasi Rut. Boas nehken kekelengen man Rut, sabab ietehna maka la lit kai pe si banci iarapken i bas Rut, selain mbalu ia pe tandang-tandang i Betlehem, bahkan Rut ertanggung jawab nandangi semetuana Naomi. Boas, aminna pe ia kalak bayak, tapi patuh nandangi perentah Tuhan, i ja kalak si musil, diberu mbalu-mbalu, kalak tadang arus iperdiateken ras ikelengi.

Pengkenaina

Pesta Kerja Rani, pesta iman i ja radu ras kita ngataken bujur man Tuhan, mpehagaken Tuhan i bas IA enggo masu-masu geluhta, i bas IA enggo masu-masu ulih peraninta, ulih pendahinta masing-masing (perjuma, perbinaga, pengusaha, pegawai, buruh, pdt., pensiunen sekali pe, rsd.).

Tradisi Padan si Ndekah, awalna bangsa Israel nomaden, berpindah-pindah selama 40 tahun. Tapi kenca enggo seh i Kanaan, enggo pajekenna rumahna, ikutina tradisi bangsa sekelewet nuan-nuan gandum, anggur, saitun, rsd. Ipasu-pasu Tuhan. Wari pe-50-ken kenca rani i je me irayakenna Pesta Kerja Rani e. Pulung alu meriah ukur, bapa, nande, anak-anak, kade-kade. Jenari ipersembahkenna persembahen man Tuhan rikut pasu-pasu si enggo ibereken Tuhan. Bahkan i je pe lit unsur diakoniana, sebab pulung ras kerina anak melumang, diberu mbalu-mbalu, kalak tandang-tandang. Inget marenda pe kam tandang nge i Mesir. Inget marenda kam susah i negeri Mesir tapi gundari geluhndu enggo ipasu-pasu Tuhan. Si e kerina Dibata si erbahanca.

Persembahenta man Tuhan labo sumbangenta tapi pengataken bujurta man Tuhan, erkiteken perkuah ateNa si mbelin si enggo isehkenNa man banta, janah kerina si lit bas kita termasuk doni enda ras kerina isina Dibata kap empuna. Bage pe i bas persembahen Kerja Raninta sekali enda, sigejapkenlah maka Dibata si masu-masu kegeluhenta, usahanta, pendahinta, profesinta (perjuma, perbinaga, pengusaha, buruh, pegawai, pdt., rsd.), e maka siendeskenlah rikutken pasu-pasu si enggo ibereken Dibata man banta sekalak-sekalak, alu dem keriahen ukur. Sabab terkadang, adi soal tambah-tambah, kali-kali, pelipatgandaan, senang kita ndatkenca. Tapi dikenca enggo bagi-bagi, terlebih ngataken bujur man Tuhan, bagi si enggo mberat sitik. Bagi-bagi i jenda labo soal sen saja, tapi kerina si lit bas kita si banci sipersembahken man Tuhan (talenta, tenaga, perukuren, rsd.).

Siingetlah maka Dibata si tetap masu-masu kegeluhenta. Dibata si nikapken benih si iperlukenndu, IA ka nge si mpeturah benih e dingen mereken ulih si erlipat ganda i bas kiniulindu e nari (PEE 103, “Benih si isuan kami e pe rehna bas kam nari, kuasaNdu erbahanca turah, kuasaNdu erbahanca erbuah”). E maka Kerja Rani arus silakoken alu dem keriahen, lebihen asa kerja-kerja kalak Karo, erkiteken Tuhan nge si erbahanca maka lit si man peraninta, entah arah juma, sabah, erbinaga, pegawai, pensiun, rsd. Ngataken bujurlah kita man Tuhan, amin sekali mbue perbeben ras tantangen si man alanken seh ngayak gundari Dibata tetap masu-masu kegeluhenta. Sipehagalah Tuhan alu mpersembahken ulih jumanta (pendahinta) si mehulina man Tuhan. Sipersembahken alu dem keriahen ukur, guna pehagaken Tuhan, janah buena rikutken pasu-pasu si ibereken Tuhan man banta sekalak-sekalak (Invocatio). Arah pesta rani ngingetken kita maka i bas rejeki si enggo ibereken Tuhan man banta lit ka i je bagin kalak si deban si perlu man sampaten i bas kita nari. Mari erlajar kita arah Boas si tetap peduli ras mperdiateken kegeluhen kalak si perlu man sampaten.