PJJ GBKP Tgl. 12 - 18 Juni 2016

PJJ GBKP TGL. 12-18 JUNI 2016

Pdt. Larena br. Sinuhadji (Nd. Reynard Tarigan)

Tema : MPERSEMBAHKEN SI MEHULINA (Bilangen 28:26-31)

Penjelasen Bahan Ogen & Perenungen

Bahan ogenta sekali enda mulihi mpersingeti kita kerna nehken persembahen si mehulina man Tuhan, sabab si lit bas kita rehna i bas Dibata nari. Janah situhuna, tading evaluasi arah Kerja Rani si enggo silakoken i bas Gerejanta i bas Minggu si nderbih. Perikop ngajari kita piga-piga hal e me kap :

1. Mengutamaken (mpermuliaken) Tuhan, ay. 28, “Endesken persembahen gandum si mbaru iperani man Tuhan”. Mengingat ras mengutamaken Tuhan i bas ulih latih si enggo sialoken merupaken sada latihan labo kita ernalem man erta si la erketentun tapi man Dibata si memelihara kegeluhenta.
2. I bas nehken persembahen asum Kerja Rani la banci erdahin. Kita si ngaturkenca (menatakelola) dahin si enggo ibereken Tuhan banta, labo dahin si ngatur kita seh la lit nari waktu guna istirahat, pulung ras keluarga bahkan ersembah ngataken bujur man Tuhan.
3. Sukat-sukat persembahen si mehulina e me rikutken pasu-pasu si ibereken Dibata man banta, siendesken alu dem pengataken bujur, ukur si meriah ras arus tetap siinget maka kulanta merupaken persembahen si nggeluh man Tuhan (Roma 12:1).

PJJ sekali enda banci sipake guna mengevaluasi dahin Ibadah Pesta Kerja Rani si enggo silakoken gelah reh ulina ka banci silakoken i bas tahun si reh, ras si e kerina silakoken guna kemulian man Tuhan.