Khotbah GBKP Minggu Tgl. 19 Juni 2016

KHOTBAH GBKP MINGGU TGL. 19 JUNI 2016

Minggu Pendidikan

Pdt. Larena br. Sinuhadji (Nd. Reynard Tarigan)

Invocatio : “Tamakenlah pasangenKu ku kudukndu janah erlajarlah i bas Aku nari. Sabab Aku melias janah meteruk ukurKu; alu bage idatndu me kemalemen ate” (Matius 11:29)

Ogen : Masmur 94:8-16 (Responsoria)

Khotbah : Kuan-kuanen 23:12-16 (Tunggal)

Tema : TETAPLAH ERLAJAR

Penjelasen Bahan Pustaka Si Badia & Aplikasi

Bahan kotbahta lit i bas bagin Telu Puluh Petuah Kalak Pentar (Kuan-kuanen 22:17-24:22), janah si jadi renungenta e me kap petuah si pe-11-ken seh si pe-13-ken. Piga-piga hal si penting si berkaiten ras pengajaren e me kap :

1. Sikap si payo i bas ngaloken pengajaren e me kap fokus, mediate, serius i bas ngaloken pengajaren subuk i bas guru nari (pendidikan formal), orang tua, ras kalak si ituaken. Janah arus tetap semangat, pekeri gegeh i bas erlajar. Aminna pe mbue tantangen i bas proses guna berkembang tapi ula murah putus asa, asa gegeh ras kegasupen si lit tetap berjuang. Sabab lit deba, enggo gagal sekali entah dua kali, minter putus asa padahal lenga bo kerina kel gegehna berjuang guna ndatken si nisurakenna.
2. Peran orang tua sebage perwakilen Tuhan e me kap mendidik ras mendampingi anak-anakna alu dem kekelengen. Termasuk ngelakoken disiplin si keras berupa ipek-pek pe si e kerina dalam rangka ngkelengi anakna. Tujunna kita ngelakoken disiplin ras pengajaren man anak-anakta gelah banci ia selamat. Ertina, la ate-atena nggeluh enda. Sabab terkadang lit ka orang tua, uga pe gutulna anakna e, pediatna, piah dungna enggo menjadi-jadi anak e, la nari banci terkataken. Enggo mbiaren orang tua nandangi anakna. Peran orang tua mendidik, mengajarken hal-hal si mehuli benaken kitik-kitik nari.
3. Lit upah (ulih) i bas erlajar alu tutus bage pe peran orang tua si idalanken alu mehuli, subuk man anak sendiri tambah-tambah kepentaren, geluhna erguna (rananna dem alu pemeteh), e me kap meriah ukur orang tua, ersurak pusuhna. Malem ate orang tua bage pe kalak si jumpa (berelasi) ras kita. Kehadirenta tuhu-tuhu jadi pasu-pasu (berkat), sabab ngasup ngerana alu mehuli, tata kramana sopan, beretika, rsd., si erbahanca malem ate kalak. Kebalikenna, ‘di kenca anak-anak e erbahan ulah, keonaren, tentu erbahan ceda ate orang tua.

I bas pengogenta, Pemasmur ncidahken kekecewaan bahkan kinirawan Tuhan nandangi bangsaNa si bebal (la terajarken). Pengajaren Tuhan tuhu-tuhu erguna man manusia, maba kesangapen ras mabai kalak nggeluh alu pentar sekali pe mbue perbeben, tantangen, megegeh ras alu teneng ia ngalakenca (ay. 12-13). Tuhan ngasup ngajari umatNa alu erbage-bage dalan sabab Dibatanta e ulu pemeteh. E maka manusia si enggo itepa Dibata alu mehuli, ngasup makeken kerina ring-ring (cuping, mata) guna ngaloken pengajaren i bas Dibata nari.

Tema khotbahta sendah e me “Tetaplah Erlajar”. Proses erlajar e segedang geluh (long life education), la pernah lit kata tamat, walaupe secara pendidiken formal banci jadi enggo tamat. Sabab erlajar banci sidatken kita arah erbage-bage hal, subuk pendidiken formal, non-formal, pengalamen geluhta, pengalamen geluh kalak, erlajar arah anak-anak entah kalak dewasa, arah pengalamen sukses entah gagal ras melala si deban. Adi sibandingken ras Ul. 6:4-9 i je ilumbakenna banta sebage orang tua gelah katawari paksa pe, mereken pengajaren alu la ermedu-medu. Persingeti rusur subuk sangana i rumah, i bas perdalanen, sangana ngadi-ngadi entah pe sangana erdahin. Setiap saat ras i japa pe banci kita mereken pengajaren man anakta alu cara si tepat rikutken kategori umurna. Janah labo hanya kata-kata pedah sibereken man anakta, sekaligus kita mereken contoh (teladan) si mehuli nandangi anakta. Teruslah erlajar gelah banci kita jadi pentar. Kepentaren e sidatken kita arah kita nggit erlajar ras erkemalangen man Tuhan Dibata. Invocatio pe mpersingeti ras ndilo kita guna erlajar i bas IA nari sabab Yesus melias ras meteruk ukurNa. Kesetianta erlajar bas IA nari mabai kita nggeluh i bas ermalem ate.