PJJ GBKP Tgl. 19 - 25 Juni 2016

 PJJ GBKP TGL. 19 - 25 JUNI 2016

Pdt. Larena br. Sinuhadji (Nd. Rey Tarigan)

Tema : MPELIMBARUI BUDAYA (Matius 12:1-8)

Penjelasen Bahan Ogen & Perenungen

Perikopta merupaken perdebaten antara kalak Farisi ras Tuhan Yesus berkaiten ras pelanggaraan si iakap kalak Farisi enggo ibahan ajar-ajar Yesus. Asum wari Sabat kalak Jahudi mentas Yesus ras ajar-ajarNa arah perjuman gandum ras iputikken ajar-ajarNa gandum e je nari igugutna sabab melihe ia. Kai si ibahan ajar-ajar Yesus minter iprotes kalak Farisi, sabab pengakap kalak Farisi adi wari Sabat la banci erkai pe. Padahal jelas wari Sabat e me wari pekesahken i bas kegiaten erdahin si enam wari guna banci muji Tuhan ras pekesahken i bas erdahin. Tapi kalak Farisi sendiri enggo iubahna aturen wari Sabat e alu ibahanna peraturen-peraturen si lebih rinci (lit kurang lebih 39 item larangen si arus ilakoken asum wari Sabat).

Si ipandangi kalak Farisi labo erkiteken ibuat ajar-ajar e gandum kalak (bdk. Ul. 23:25, “Adi kam mentas arah dalan i bas juma kalak, banci iputikindu pagena man gugutenndu, tapi la banci sada ngkebena pe isabindu”), tapi erkiteken si e ilakokenna i bas wari Sabat. Tuhan Yesus tidak tinggal diam. Ijabab kritik kalak Farisi alu contoh nyata i bas Padan si Ndekah kerna kai si ilakoken Daud ras teman-temanna si bengket ku Rumah Dibata ras ibuatna roti si enggo ipersembahken man Dibata, je nari ipanna ras teman-temanna. Padahal rikutken undang-undang agama, imam-imam ngenca banci man roti e (Im. 24:9, “Roti e jadi sikerajangen Harun ras kesusurenna, janah arus ipanna i bas ingan si badia, erkiteken bagin e badia kal sabap pangan e ibuat i bas bagin si ipersembahken man TUHAN guna imam-imam”). Bdk. 1 Sam. 21:1-6, asum Daud njumpai imam Ahimelek i Nop ras mindo gelah iberekenna roti man bana ras teman-temanna. Kepeken la lit roti si biasa, roti si badia ngenca lit. E maka ibereken imam ndai roti si badia e man Daud ras teman-temanna erkiteken situasi paksa si e la lit nari roti si biasa sedangken Daud ras teman-temanna butuh. Bahkan situhuna pe nina Yesus imam-imam pe nggelanggar undang-undang wari Sabat i bas Rumah Pertoton tapi la ia ersalah (bdk. Bil 28:9-10).

E maka nina Yesus lit si lebihen asa Rumah Pertoton, e me kap ate keleng. Ate keleng nge si Kuperluken labo asuh-asuhen si ipersembahkenndu. Janah anak Manusia si isuruh Dibata IA kap Tuhan si ngkuasai wari Sabat. Arah kai si itegasken Yesus maka jelas ukum si utama labo ukum tertulis tapi kekelengen. I bas contoh si ibahan Yesus jelas, maka ajar-ajar i bas kondisi kelaparen, bage pe Daud ras teman-temanna. Walaupe roti si badia rikutken undang-undang hanya iperuntuken man imam-imam tapi banci paksa si e ibereken man Daud ras teman-temanna, sabab ate keleng nge si iperluken Tuhan labo kai si enggo ipersembahenken. Ertina, kekelengen man Dibata ras kekelengen man manusia si menjadi inti Hukum Tuhan.

Temanta i bas PJJ sekali enda mpelimbarui budaya. Budaya luhur selaku kita kalak Karo si tetap sipelihara khsususna kita jemaat GBKP (ertutur, make uis adat, barang-barang tradisi luhur, dahin-dahin kerja kalak Karo mulai kin i bas bertin nari seh mate tetap sipelihara), ras kerina budaya e tetap iterangi alu Kata Dibata. Ertina, si enggo menyimpang la nari mpermuliaken Tuhan enggo pasti situlak. Bage pe budaya modern (teknologi komunikasi, rsd.) si mempengaruhi kegeluhenta i bas paksa gundari pe kerina arus iterangi alu Kata Dibata. Artina, budaya kai pe sipake kita labo terjeng kebiasan entah pe rutinitas, tapi silakoken alu dem kekelengen.