PA Kategorial GBKP Tgl. 19 - 25 Juni 2016

PA MAMRE GBKP TGL. 19 - 25 JUNI 2016

Pdt. Larena br. Sinuhadji (Nd. Rey Tarigan)

Ogen : 1 Korinti 14:40; Epesus 5:1-2

Tema : MAMRE SI METEH ATUREN

Tujun :

1) Nuriken aturen geluh badia selaku Mamre

2) Ncidahken aturen nggeluh badia i tengah-tengah kegeluhen si tep-tep wari i bas keluarga, gereja ras masyarakat

Penjelasen Bahan Ogen & Pengkenaina

I bas PA Mamrenta sendah lit 2 bahan si man ogen. Si pemena e me 1 Kor. 14:40. Konteks i bas rasul Paulus nehken pedahna enda e me kerna pemere Kesah si Badia. Pemere Kesah si Badia merupaken salah sada kelebihen si lit i bas perpulungen Korinti. Ialoken perpulungen Korinti piga-piga bentuk pemere (karunia) i bas Kesah si Badia nari. Tapi amin pe enggo ialokenna pemere-pemere i bas Kesah si Badia nari, la iteh perpulungen e kai gunana pemere-pemere Kesah e, si kedungenna mpeturah perubaten i tengah-tengah perpulungen bage pe kinilaraturen i bas beribadah. Kelompok si sada ngatakenca ngerana i bas cakap Kesah e me si pentingna. Kelompok si deban ngatakenca ernubuat si pentingna rsd., seh rasul Paulus ngatakenca i bas ay. 20, “Ula medanak perukurenndu”. E maka i bas ay. 12 ipedahken rasul Paulus man perpulungen Korinti bahwasana pemere-pemere Kesah si Badia e arus ipindoken ras ipergunaken alu tujun mbangun kiniteken perpulungen. Janah i bas si e kerina, arus silakoken alu metunggung dingen ratur (ay. 40) sebab Dibata e me Dibata kiniraturen labo Dibata kinilaraturen (ay. 33).

Si peduaken e me Epesus 5:1-2, pedah-pedah enda isehken rasul Paulus man perpulungen Epesus i bas konteks kiniersadaan kula ni Kristus amin pe melala pemere Kesah si lit i bas perpulungen (ps. 4:1-16), bage pe kerna kegeluhen si mbaru i bas Kristus (ps. 4:17-32). I bas ps. 4:16 ipedahken rasul Paulus, i bas bhs. Indonesia nina, “Dari pada-Nyalah seluruh tubuh, -- yang rapi tersusun dan diikat menjadi satu oleh pelayanan semua bagiannya, sesuai dengan kadar pekerjaan tiap-tiap anggota -- menerima pertumbuhannya dan membangun dirinya dalam kasih”. Janah i bas ps. 4:22-24 ipedahken rasul Paulus, “Dage tangtangilah manusia si male, si erbahanca kam nggeluh bagi si nggo-nggona. Manusia si male si meneken bana alu sura-surana si nipu. Pusuh peratenndu ras perukurenndu kerina arus ipelimbarui. Pakelah manusia si mbaru si itepa rikutken tempas Dibata, dingen encidahken bana i bas kegeluhen si tuhu-tuhu adil dingen badia”. I bas konteks enda jelas kai si nimaksudken rasul Paulus i bas ps. 5:1-2, gelah perpulungen ngusih Dibata si ratur bage pe nggeluh erpalasken erkeleng ate bagi Kristus enggo ngkelengi perpulungen, sebage bukti nyata kegeluhen si mbaru i bas Kristus.

Duana bahan ogenta sendah isehken rasul Paulus ku tengah-tengah perpulungen i bas rangka disiplin nggeluh rohani si tujunna mbangun ras mpeteguhi kiniteken, baik secara pribadi bage pe secara komunal i bas perpulungen.   

Sue ras bahan ogenta sendah bage pe i bas tema ras tujun PA-nta, iajuk Mamre gelah meteh aturen, nggeluh ratur, ras ngasup nggeluh badia i bas geluhna si tep-tep wari i tengah-tengah keluarga, gereja, ras masyarakat. Adi pemeteh kerna aturen-aturen si lit i bas keluarga, gereja ras masyarakat, mungkin enggo iteh ras iangkai kita kerina. Adi sisungkun pe kai manfaat kerina aturen si lit, iakap kami, kita kerina pe enggo metehsa. Tapi adi isungkun soal nggeluh ratur ras ngasup nggeluh badia, mungkin je persoalenna. E maka stressing point i bas PA-nta sendah, uga makana Mamre ngasup nggeluh ratur ras badia. Si e kerina la banci lang perlu kedisiplinen i bas dirinta.

Guna nggeluh alu disiplin si niperluken e me ketutusen, saber ate (ketekunan), kinigenggengen, ras pembiasaan entah pe pengkondisian i bas dirinta. Sebage contoh, sekolah si menghasilken siswa-siswi terbaik e me sekolah si menerapken kiniraturern ras disiplin i bas sistem pendidikenna. Biasana sekolah si bage e me sekolah unggulen ras favorit. Ma keleng ateta man anak-anakta? Adi keleng kita man anak-anakta tentuna lit arapen bas dirinta gelah anak-anakta sukses i bas geluhna. E maka sitamaken anak-anakta ku bas sekolah-sekolah unggulen ras favorit ndai. Amin pe nilai anakta kurang guna banci bengket ku bas sekolah unggulen, umpamana, biasana sipala-palai nge uga makana anak-anakta banci bengket ku bas sekolah favorit ndai. Engkai maka bage ban kita? Erkiteken iteh kita kai si terbaik guna masa depan anak-anakta. Em contoh si konkrit bahwasana nggeluh ratur ras disiplin banci mabai kita ku bas erbage-bage keberhasilen. La lit kiniraturen ras disiplin si ntabeh, pasti mberat, mesera, tapi hasilna mabai kita ku bas kemalemen ate.

E maka, adi nggit kita ndatken erbage-bage keberhasilen bage pe ndatken kemalemen ate i bas geluhta, lit erga si arus igalari kita, e me nggeluh ratur, badia, ras disiplin. Mari radu ras siupayaken gelah geluhta ratur ras badia alu la lupa kita ertoto, mindo pergegeh ras kengasupen i bas Kesah si Badia nari.