PJJ GBKP Tgl. 5 - 11 Juni 2016

PJJ GBKP TGL. 5 - 11 JUNI 2016

Pdt. Larena br. Sinuhadji (Nd. Rey Tarigan)

Tema : PERSEPULUHEN (Ulangen 14:22-29)

Penjelasen Bahan Ogen & Perenungen

Lit denga rusur perdebaten kerna persepuluhen enda, umpamana: 1) Relevan denga kin kita nehken persepuluhen e sabab i bas Padan si Mbaru labo lit kel secara langsung perentah Tuhan Yesus kerna si e (walau pe secara implisit tetap denga ilumbaken Yesus kerna persepuluhen, bdk. Mat. 23:23, “Andiko, cilaka kal kam o, guru-guru agama, janah kam pe o, kalak Parisi! O, kalak pekulah-kulah. Ipersembahkenndu man Dibata sepersepuluh i bas ulihndu nuan-nuan nari, seh maka jera, lenga ras serei pe ipersembahkenndu. Tapi si pentingna i bas Undang-undang la iperdiatekenndu, e me kap keadilen, keleng ate, ras kinibujuren. Si enda arus idalankenndu alu la ngelupaken si debanna”). 2) Apakah arus paskel nominalna i bas kita nehken persepuluhenta rikutken gaji sialoken kita, rsd. Situhuna, adi enggo tangkas man banta maka kerina si lit bas kita rehna i bas Dibata nari, bahkan geluhta enda enggo lunas igalari Tuhan alu darehNa si meherga la nari kita mperdebatken soal persepuluhen ras persembahen-persembahen si deban (1 Kor. 6:20, “Sabap kam enggo itukur Dibata meherga kal. Dage muliakenlah Dibata arah kulandu”). Kerina i bas geluhta enda Dibata kap si empuna, e maka situhuna, la perlu nari kita perhitungen ras Tuhan. Kristus Yesus enggo ngkorbanken diriNa guna kita manusia, ras seh ngayak genduari geluhta ipeliharaNa, uga makana kita ertak-tak ras Tuhan alu perhitungen sepersepuluh, dua puluh persen, rsd. I bas salah sada gereja si ieteh kami la lit nari istilah “persepuluhen” tapi “persembahen bulanen” alu alasen, persepuluhen membatasi jemaat guna mere lebih asangken sepersepuluh.  Hal si biasa i bas gereja enda nehken persembahen perduapuluhen, pertelupuluhen, rsd.

Konteks perikopta i bas Ul. 14:22-29, merupaken perentah Tuhan man bangsa Israel nehken persepuluhen (iserapken) i bas ulih jumana nari tep-tep tahun, sabab paksa si e setahun sekali rani gandum. Si e ilakoken bangsa enda gelah banci bangsa enda erlajar rusur mehamat man Tuhan, ertina tetap pehageken Tuhan sabab Tuhan si masu-masu geluhta (ay. 23d). Janah tetap i bas nehken persepuluhen lit i je tanggungjawabta nandangi kalak musil, diberu mbalu-mbalu, anak melumang, kalak tandang-tandang dingen medanggel, rikut ras kalak Lewi si la lit jumana (ertana). Arah kita setia nehken persepuluhenta labo e erbahanca geluhta kekurangen sabab rejeki rehna i bas Dibata nari, i ja Dibata tetap masu-masu kita arah dahin si idahiken kita (ay. 29c).

Persembahenta man Tuhan termasuk persepuluhenta labo “sesajen”. Persembahen e murni sebage pengataken bujurta man Tuhan arah keselamaten ras pasu-pasuNa i bas geluhta. Adi “sesajen” mekatep ipalasi pemindon-pemindon tertentu man si merekenca. Tuhan enggo leben masu-masu geluhta, e maka tetaplah alu dem keriahen ukur sisehken persembahenta man Tuhan, sebage pengataken bujurta man baNa.