Pdt. Larena Sinuhadji (Nd. ReyRapha Tarigan)
Misi GBKP
Ogen : Markus 16:14-18
Tema : BERITAKEN BERITA SI MERIAH
Tujun : Gelah Mamre :
1) Meteh sura-sura Dibata (misi) si man dahinken keluarga Dibata i tengah doni enda
2) Muat bagin i bas dahin meritaken Berita Si Meriah
Penaruh
Rikutken informasi i bas AI nari, “Misi GBKP berfokus pada perwujudan kasih Allah melalui persekutuan, pelayanan, dan kesaksian yang holistik. Secara umum, misinya meliputi menumbuhkan spiritualitas jemaat berbasis Alkitab, menegakkan keadilan dan perdamaian, memperkuat gotong royong, serta memberdayakan potensi jemaat untuk bersinergi bagi masyarakat. Visi yang mendasari misi ini adalah “GBKP menjadi kawan sekerja Allah untuk menyatakan rahmat Allah kepada dunia” atau dalam bahasa Karo: “GBKP aron Dibata guna jadi pasu-pasu man isi doni.” Ertina rikutken visi ras misi GBKP enggo jelas maka salah sada tugas tanggung jawab warga GBKP e me meritaken Berita Si Meriah. Si jadi penungkunen, enggo seh i ja dukungenta kerna si e?
Mpebagesi Ogen
Amanat Agung (Great Commission) e me perentah terakhir Tuhan Yesus sope nangkih ku surga. Inti i bas perentahNa gelah ajar-ajarNa pembarken Berita Si Meriah ku kerina bangsa. Amanat Agung biasana hanya ikaitken ras Injil Matius 28:19-20, sedangken i bas Kitab Injil si deban rikut Kitab Perb. Rasul, lit perentah terakhir Tuhan Yesus man ajar-ajarNa. Mari ras-ras siorati.
I bas Injil Matius perentah Yesus lit i bas bindu 28:19-20 e me “Laweslah ku kerina bangsa manusia, bahanlah ia jadi ajar-ajarKu: peridiken ia i bas gelar Bapa, gelar Anak, ras gelar Kesah Si Badia, janah ajari ia ngikutken kerina si enggo Kupedahken man bandu. Janah ingetlah! Aku tetap kap ras kam seh ku kedungen jaman.” Selain mereken perentah, i jenda Yesus erjanji tetap ras ajar-ajarNa seh ku kedungen jaman.
I bas Injil Markus, si jadi ogenta sendah, perentah Yesus lit i bas bindu 16:15-16, niNa, “Laweslah, siari doni enda jenari beritaken Berita Si Mehuli man kerina manusia. Ise si tek dingen iperidiken terkelin kap pagi. Tapi ise si la tek ia pagi iukum”. I bas Alkitab TB-LAI nina, “Pergilah ke seluruh dunia, beritakanlah Injil kepada segala makhluk.” Si menarik i jenda akap kami Berita Si Meriah labo terjeng man manusia tapi pe man kerina tinepa Dibata.
I bas Injil Lukas perentah Yesus lit i bas bindu 24:44-49, khususna ay. 47-48, niNa “Berita kerna jera ras pengalemi dosa arus ipeseh man kerina bangsa, ibenaken i Jerusalem nari. Kam me jadi saksi si enda kerina.”
I bas Injil Johanes perentah Yesus lit i bas bindu 20:19-23, khususna ay. 21-22, niNa, “Tetapkenlah ukurndu. Bagi Aku isuruh Bapa, bage me pe kam Kusuruh. Kenca bage isempulken Yesus KesahNa man ajar-ajar e, jenari nina, “Alokenlah Kesah Si Badia.” I bas ay. bindu 21:15-19, lit perentah Yesus khusus man Petrus niNa, “Permakanilah biri-biringKu” ras “Ikutkenlah Aku.”
I bas Kitab Perb. Rasul si jadi umputen Injil Lukas, perentah Yesus lit i bas bindu 1:4-8, khususna ay. 8, niNa, “Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda.” I bas Kitab Lukas ras Perb. Rasul, Yesus mereken gegeh man ajar-ajarNa arah Kesah Si Badia i bas er-Berita Si Meriah.
Kesimpulen i bas kerina versi Amanat Agung enda, lit dua hal si seri. Si pemena, lit perentah guna meritaken Berita Si Meriah. Si peduaken, labo ipediat Dibata ajar-ajarNa i bas er-Berita Si Meriah, lit kuasa Dibata si nemani ajar-ajar i bas er-Berita Si Meriah.
Perentah Yesus man ajar-ajarNa enggo tangkas. Penungkunenna, kai respon ajar-ajarNa? Adi siterusken sioge ogenta sendah, lit tindak lanjut si konkrit si ilakoken ajar-ajar Yesus, ituriken i bas ay. 20, “Lawes ajar-ajar, janah erberita ia ku japa pe. Tuhan nampati ia i bas dahinna, janah Tuhan pe ikut erdahin ras-ras kalak enda. Ibahan Tuhan maka i japa pe kalak enda meritaken berita si i bas Dibata nari e i je pe jadi tanda kuasa ras tanda sengget.” I bas si e lit dua hal si akap kami seh kel pentingna. Si pemena, lit ketaaten i bas diri ajar-ajarNa guna ngelakoken perentah Tuhan Yesus, e me er-Berita Si Meriah. Si peduaken, Tuhan pe ikut erdahin nemani ras nampati ajar-ajar i bas er-Berita Si Meriah alu kuasa ras tanda sengget.
Pengkenaina
Selaku kalak si enggo ngaloken anugerah keselamaten i bas Yesus Kristus, tek kita maka perentah guna er-Berita Si Meriah labo terjeng itujuken man ajar-ajar saja, tapi man kerina kalak si tek. I bas Konfesi (Pengakun Kiniteken) GBKP memang la lit tersurat secara khusus kerna er-Berita Si Meriah, tapi i bas piga-piga Bab si ngerana kerna Masyarakat, Politik, ras Gereja, iajuk kita kerina, khususna kam Mamre, gelah menjadi terang dan garam, bersaksi tentang keselamatan di dalam Yesus Kristus. Janah rikutken Pokok-pokok Peraturan (P2P) Mamre GBKP, iajuk kerina Mamre guna mewujudkan tri-tugas gereja bage pe menjadi garam dan terang di tengah-tengah keluarga, gereja, masyarakat, bangsa dan negara (Pasal 3 & 4).
Arah ogenta, tema ras tujun PA-ta sendah, mulihi kita isingetken kerna perentah Tuhan Yesus guna er-Berita Si Meriah bage pe tugas tanggung jawabta guna ngelaksanaken perentah er-Berita Si Meriah. Erlajar kita arah ajar-ajar Yesus. Mis ilakokenna kai si jadi perentah Yesus alu tutus. Alu bage kita pe iajuk guna ngelakoken tugas tanggung jawabta guna er-Berita Si Meriah arah pengkebet geluhta. Tek kita maka Kesah Si Badia nemani ras nampati kita i bas er-Berita Si Meriah. Emaka mari radu ras kita er-Berita Si Meriah arah kai pe si banci ilakoken kita. Tek kita maka Dibata si memperlengkapi kita i bas kita er-Berita Si Meriah.
Hal-hal konkrit kai saja si banci ilakoken kita i bas rangka ikut muat bagin er-Berita Si Meriah arah unit-unit si lit i bas GBKP secara umum, bage pe i bas Kategorial Mamre secara khusus? Si pemena, mari radu ras kita megegeh ertoto guna dahin-dahin er-Berita Si Meriah si enggo ilakoken GBKP bage pe Mamre secara kelembagaan. Si peduaken, mari radu ras sidukung dahin-dahin er-Berita Si Meriah arah dukungan dana. Si peteluken, mari sipebue aksi-aksi sosial man senina turangta si kena dampak bencana, bage pe program-program si deban si berkaiten ras bidang marturia, gelah alu bage reh buena media si banci imanfaatken guna er-Berita Si Meriah. Dibata si mpengasup kita kerina, khususna Mamre GBKP i japa pe kam ringan.
Tidak ada komentar:
Posting Komentar