SUPLEMEN PA MAMRE GBKP TGL. 18 - 24 OKT. 2026

Pdt. Larena Sinuhadji (Nd. ReyRapha Tarigan)

Evaluasi & Tekad Mamre

Ogen : 2 Korinti 13:1-10

Tema : MEREKSA RAS NGUJI DIRI

Tujun : Gelah Mamre :

1) Meteh maka Paulus mpersingeti Perp. Korinti i bas mereksa dirina man Tuhan

2) Mengevaluasi perdalanen Mamre bagepe erbahan tekad gelah reh ulina persadan Mamre

Penaruh

Mungkin pernah sibegi istilah “otokritik.” Rikutken informasi AI nari, “Otokritik (atau autokritik) adalah kritik, penilaian, atau teguran yang ditujukan kepada diri sendiri, baik secara individu maupun kelompok (kelembagaan). Otokritik sangat penting dalam kehidupan seseorang. Tanpa kemampuan menilai diri sendiri, seseorang akan sulit berkembang dan rentan mengulangi kesalahan yang sama.” Proses otokritik enda pe enggo ilumbaken Paulus man Perp. Korinti. Emaka i bas PA-nta sendah radu ras kita erlajar kerna mereksa ras nguji diri erpalasken Kata Dibata si jadi ogenta sendah. 

Mpebagesi Ogen

Surat man Perp. Korinti isehken Paulus labo terjeng guna mpeteguhi kiniteken perpulungen, entah pe guna ndungi persoalen-persoalen si turah i tengah-tengah perpulungen, tapi pe guna mpeteguhi otoritasna selaku gembala, entah pe pemimpin jemaat, si fungsi utamana eme ngajari ras mabai perpulungen ku kiniteken si paguh man Dibata i bas Yesus Kristus. Emaka iajuk Paulus perpulungen gelah ngergaken otoritasna selaku gembala, entah pe pemimpin rohani. Kiniteken si paguh enda labo cukup terjeng isingetken arah surat ngenca, emaka lit rencana Paulus guna reh ndahi perpulungen kalak si tek i Kota Korinti. I bas si e perpulungen harus ersikap, sebab i bas bindu 12:21 teridah maka lit denga perpulungen si la nggit jera erlagu la mehuli, erlua-lua, dingen ndalanken perbahanen si la meteh mela. Selain si e, enggo radu ras siteh maka rusur turah konflik i tengah-tengah Perp. Korinti si banci encedai kiniersadan sapih-sapih ia selaku anggota kula ni Kristus. Situasi si bagenda rupana tentu harus iantisipasi.

Ogenta eme bagin terakhir surat, alu judul perikop “Kata persinget si perpudi dingen salam.” I bas terj. Bhs. Ind., nina “Nasihat-nasihat terakhir.” Si jadi fokus i bas PA-nta sendah rikutken tema, akap kami lit i bas ay. 5, “Pereksalah man bandu: tuhu-tuhu kin kam erkiniteken? Ujilah man bandu! Entah la kin ietehndu maka Yesus Kristus ringan i tengah-tengahNdu? Pala la kin kam menang i bas ujian e.” I bas terj. Bhs. Ind., nina, “Ujilah dirimu sendiri, apakah kamu tetap tegak di dalam iman. Selidikilah dirimu! Apakah kamu tidak yakin akan dirimu bahwa Yesus ada di dalam diri kamu? Sebab jika tidak demikian, kamu tidak tahan uji.” Kai enda antusenna?

Mereksa ras nguji diri eme hal si penting i bas geluh erkiniteken. Apai ka i tengah-tengah perpulungen si rawan konflik bagi Perp. Korinti. Konflik terjadi umumna erkiteken kerina pihak si berkonflik la nggit mengkoreksi diri, lebih cenderung guna menyalahken pihak si deban janah membenarken diri sendiri. Emaka lit telu hal si penting i bas mereksa ras nguji diri enda. Si pemena, introspeksi diri, mengkoreksi diri, eme satu-satunya cara i bas kita meteh kualitas kinitekenta. Ise si tuhu-tuhu meteh kinitekenta? Tuhan ras diri sendiri. Kalak si deban banci tertipu arah penampilenta nari. Arah darat teridah bagi si mehuli, rohani, tutus, rsd.-na, tapi arah pudi dem alu niat jahat, umpamana. Emaka penting kel perpulungen kalak si tek paksa si e guna meteh enggo seh i ja kinitekenna man Dibata i bas Yesus Kristus, apakah tuhu Yesus Kristus ringan ras erkuasa i bas dirina?

Si peduaken, proses otokritik erbahanca kalak si tek nggeluh i bas pertobaten. Pertobaten labo terjadi sekali i bas kegeluhen kalak si tek, tapi terjadi berkali-kali seh ku kesempurnaan i bas Kristus. Ertina arah proses otokritik nari, perpulungen ikondisiken gelah mengevaluasi kerina si enggo ibelaskenna ras kerina si enggo ilakokenna i bas kegeluhen si tep-tep wari. Alu bage terjadi pertumbuhan si mehuli ku kesempurnaan Kristus. Si peteluken, gelah perpulungen fokus ku diri sendiri, bage pe sibuk guna memperbaiki diri sendiri. Alu bage enggo lanai lit waktu guna mandangi kalak si deban. Enda penting i bas konteks Perp. Korinti si rusur terjadi konflik. 

Pengkenaina

Sue ras tema bage pe tujun PA-nta sendah, iajuk kita kerina, khususna kam kerina Mamre kami, gelah nggit mereksa ras nguji diri, khususna i bas erkiniteken man Dibata i bas Yesus Kristus. Enggo nge kinitekenta semakin bertumbuh sedekah tahun enda? Karakter Kristus kai saja si enggo banci silakoken i bas kegeluhenta? Biak-biak si la mehuli kai saja si enggo banci sibeneken entah sikurangi? Enda tentu hanya kita secara pribadi si banci njababsa, entah pe kalak si lit i sekelewetta si rusur ras kita setiap wari. Tapi si pentingna kel i jenda, iajuk kita gelah nggit mengintrospeksi diri, mengkoreksi diri, entah pe ngelakoken proses otokritik, gelah tuhu-tuhu lit pertumbuhen ku si mehuli i bas erkiniteken man Dibata.

Hal si deban sue ras tujun si peduaken i bas PA-nta sendah, iajuk kam kerina Mamre gelah mengevaluasi perdalanen Mamre bagepe erbahan tekad gelah reh ulina persadan Mamre. Enda mungkin maksudna ngelakoken evaluasi kerna program-program si enggo ilakoken Mamre sedekah tahun 2026, sebab kentisik nari bengket kita ku tahun si mbaru alu fokus pelayanen si berbeda. I bas si e tentu lit pergumulen masing-masing sue ras konteks Mamre sebelang-belang GBKP si malem enda. Tapi intina setiap kegiaten si erkaiten ras koinonia, marturia, ras diakonia, harus lit evaluasina gelah reh ulina kualitas ras kuantitas persadan Mamre i japa pe kam ringan. Arah litna evaluasi tentu teridah kelebihen ras kekurangen si lit, alu bage turah tekad i bas kita guna semakin mehuli ku wari-wari si reh enda guna kemulian gelar Dibata.