SUPLEMEN PJJ GBKP TGL. 18 - 24 OKT. 2026

Pdt. Larena Sinuhadji (Nd. ReyRapha Tarigan)

PUSUH SI MERINCUH NANDAI DIBATA - Jeremia 24:4-7

(Evaluasi Sasaran Alu Fokus Engkelengi Dibata)

Penaruh

Lit peribahasa si ngatakenca, “Bagai pungguk merindukan bulan.” Pungguk e me sejenis perik kitik. Peribahasa e ertina, “mengharapkan atau mencintai sesuatu yang sangat sulit, tidak realistis, atau mustahil untuk dicapai.” Ugapa pe ganjangna perik ndai kabang, la mungkin ia seh ku bulan. Adi sikaitken ras kerincuhenta nandangi Dibata apakah seri bagi peribahasa ndai? I bas sada sisi memang la mungkin kita jumpa ras Dibata petala-tala bagi kita jumpa ras temanta, kecuali enggo mate kita nadingken doni enda, banci kita jumpa ras Dibata. Tapi secara kiniteken, kerincuhenta nandangi Dibata justru ilumbaken gelah reh mbagesna penandaita kerna Dibata si engkelengi kita.

I bas kesempaten enda radu ras kita erlajar kerna pusuh si merincuh nandai Dibata, ikaitken ras evaluasi sasaren pelayanen i bas tahun 2026 enda e me nandai ras engkelengi Dibata.

Mpebagesi Ogen

I bas proses pembuangen ku Babilon, lit dua terpuk i tengah-tengah bangsa Israel. Si pemena eme kelompok si la patuh nandangi perentah Dibata. I bas perikop ogenta sendah andingenna eme raga si isina buah ara si macik-macik dingen sitik pe la terpan. I bas ay. 8 jelas je ikataken maka kelompok enda ipimpin Sedekia. Si peduaken kelompok si nggeluh tutus erkemalangen ras patuh Dibata. I bas perikop ogenta sendah andingenna eme raga si isina buah ara si seh kel jilena, eme buah si tangtangna tasak. Rikutken ay. 1 jelas je ikataken kelompok enda ipimpin Joyakin. Kelompok si ipimpin Joyakin patuh man Dibata janah nggit jadi tabanen ku Babilon. Sedangken kelompok Sedekia la patuh nandangi perentah Dibata, la ia nggit jadi tabanen, janah iandalkenna bangsa si deban guna pulah i bas bangsa Babilon nari.

Si jadi fokus i bas ogenta sendah eme kelompok si nggeluh tutus erkemalangen ras patuh Dibata, alu andingen raga si isina buah ara si seh kel jilena. Kelompok si la patuh enggo pasti dat ukumen i bas Dibata nari. Sedangken kelompok si patuh datken pengkawali ras pasu-pasu i bas Dibata nari, amin pe i bas kondisi sebage tabanen i Babilon. I bas ay. 5-6 bagenda nina Dibata, “Aku kap TUHAN Dibata Israel, kalak si enggo iangkut ku Babilon Kuperseri ras buah si mejilena janah Kuperdiateken ia alu kiniulin. Kujagai ia janah Kubaba ia mulih ku negeri enda. Kupanteki me ia dingen la Kuruntuhken. Kusuan me ia, la Kuruah.” Tapi labo terjeng je saja, ikataken Dibata i bas ay. 7 niNa, “Kupeturah i bas pusuhna maka merincuh ia nandai Aku, maka Aku kap TUHAN. Emaka ia kap jadi bangsaKu dingen Aku jadi Dibatana, sebab mulihken ia man bangKu alu bulat ukurna.”

Ay. 7 enda akap kami si jadi fokus erpalasken tema PJJ-nta sendah. Adi sioge i bas Bhs. Ind., bagenda nina, “Aku akan memberi mereka suatu hati untuk mengenal Aku, yaitu bahwa Akulah TUHAN. Mereka akan menjadi umatKu dan Aku ini akan menjadi Allah mereka, sebab mereka akan bertobat kepadaKu dengan segenap hatinya.” Enda janji Dibata nandangi kalak si tetap erkemalangen man baNa i bas situasi ras kondisi si kugana pe, khususna i bas situasi ras kondisi si la bagi ukur. Pemulihan i bas Dibata nari labo terjeng erkaiten ras hal-hal si sifatna fisik, tapi si pentingna eme pemulihan geluh erkiniteken, eme relasi si semakin mehuli, bage pe semakin mbages ras Dibata. Emaka si niarapken i bas bangsa Israel nari eme pertobaten, mulihken ku Dibata alu bulat ukur, kininggiten guna terus erlajar nggeluh erkiniteken sue ras peraten Dibata i bas situasi ras kondisi si kugana pe. Alu bage, sue ras janji Dibata, lalap iberekenNa kerincuhen guna nandai Dibata. 

Pengkenaina

Ogenta sendah ngajuk kita kerina gelah mengevaluasi relasinta ras Dibata. Khususna sedekah tahun 2026 enda alu fokus nandai Dibata. Arah erbage-bage kegiaten i bas Gerejanta sedekah enda, reh mbagesna entah reh dauhna kita ras Dibata? Adi reh mbagesna penandaita nandangi Dibata, puji Tuhan! Adi lang entah lenga ninta, ertina lit si harus ievaluasi, kai situhuna si jadi kendala i bas kita nandai Dibata, apakah masalahna arah ndarat nari entah arah dirinta nari? Adi enggo sidat kai si jadi kendala, marilah sipekena alu gegeh kuasa Kesah Si Badia. 

Pusuh si merincuh nandai Dibata memang banci siupayaken alu gegeh ras kengasupenta. Tapi selaku manusia tinepa Dibata tentu gegeh ras kengasupenta terbatas, apai ka guna nandai Dibata si la terbatas. Emaka mari radu ras kita erlajar i bas bangsa Israel nari si iandingken alu raga si isina buah ara si seh kel jilena. Buah ara si seh kel jilena eme lambang pengkawali entah pe pemeliharaan Dibata nandangi kalak si tetap erkemalangen man baNa i bas situasi ras kondisi si la bagi ukur sekali pe.

Berserah penuh, entah pe tuhu-tuhu erpengendes man Dibata akap kami harus terus lit i bas dirinta, tek kita maka iteh Dibata si mehuli i bas geluhta. Bagenda janji Dibata nandangi kalak si tetap erkemalangen man baNa i bas Yer. 29:11, “Aku ngenca meteh sura-surangKu nandangi kam, eme gelah kam senang labo gelah cilaka. Rencanangku eme mereken wari si pepagi bagi si iarapkenndu.” Emaka mari radu ras kita ertoto, mindo man Dibata gelah tetap iberekenNa pusuh si merincuh guna nandai IA alu mehuli.