SUPLEMEN PJJ GBKP TGL. 15 - 21 FEBRUARI 2026

Pdt. Larena Sinuhadji (Nd. ReyRapha Tarigan)

NGIKUTKEN PEDAH RAS PERENTAH - Imamat 18:1-5

(Tata Gereja)

Penaruh

Adi la lit kiniraturen i bas nggeluh, enggo pasti melala masalah si man hadapen. Contoh, adi man, minem, medem, la teratur, banci erbahanca kita sakit. Adi ate-ateta saja kita i bas berlalu-lintas, enggo pasti lit terjadi kekacauan ras kecelakaan. Selain si e tentu melala masalah sosial si terjadi i tengah-tengah masyarakat adi la lit kiniraturen. Emaka i bas si e tuhu-tuhu ibutuhken hukum, undang-undang, aturen-aturen, tata tertib, rsd. Adi ngerana kita kerna kiniraturen sosial, rikutken informasi i bas AI nari ikataken bagenda nina, “Keteraturan sosial berfungsi menciptakan kehidupan masyarakat yang harmonis, aman, dan tertib melalui kepatuhan terhadap norma. Fungsi utamanya mencakup mengatur perilaku individu, menjaga stabilitas sosial, mencegah konflik, serta memastikan hak dan kewajiban berjalan seimbang.”

PJJ-ta sendah ngerana kerna kiniraturen si iaplikasiken alu ngikutken pedah ras perentah Dibata, janah lit ikaitken ras Tata Gereja.  

Mpebagesi Ogen

Ogenta sendah lit i teruh judul perikop “Persadan kula si ilarang,” i bas terj. TB-LAI Ed. II nina, “Kudusnya perkawinan.” Isina secara garis besar e me perentah Dibata kerna kiniraturen i bas seksualitas. Kiniraturen i bas hal seksualitas enda isehken ku tengah-tengah bangsa Israel alu latar belakang si lit i bas ay. 3, i ja lit pengaruh budaya-budaya Mesir ras Kanaan si mbelin kerna perilaku seksual. Perilaku seksual si lit i bas budaya entah pe kiniteken bangsa Mesir ras Kanaan la sue ras kiniteken bangsa Israel. Melala perilaku seksual si menyimpang. Kai saja perilaku seksual si menyimpang e? Banci sioge i bas ay. 6-23 nari. Piga-piga si itulisken i jenda e me: ersada kula ras nande. Ersada kula ras turang kandung. Ersada kula ras kempu. Ersada kula ras bibi, turang bapa. Ersada kula ras ndehara senina bapa. Ersada kula ras ndehara anak. Ersada kula ras diberu kalak. Ersada kula sesama jenis. Bage pe ersada kula ras asuh-asuhen. Si e kerina ilakoken bangsa Mesir ras Kanaan.

Isuruh Tuhan Musa gelah pesehsa man bangsa Israel maka “Aku kap Tuhan Dibatandu”. Kalimat enda kurang lebih lit 21 kali isingetken bas kitab enda. Hal enda mpertegas identitas bangsa Israel sebage bangsa pilihen Tuhan si ipilih Tuhan labo erkiteken kehebaten bangsa enda tapi perkuah ate Tuhan. Dingen inti i bas kitab enda eme kerna kebadian Dibata bage pe kuga arusna bangsa Israel nembah ras nggeluh i adep-adepenNa, gelah tetap mehuli persadan bangsa enda ras Tuhan. Enda me alasen penting, maka bangsa enda arus setia ngituken pedah-pedah Dibata.

Adi perilaku seks si menyimpang ndai sempat ilakoken bangsa Israel, maka si ceda si pemena lebe relasi ras Dibata. Sebab Dibata si isembah Israel e me Dibata si badia. La ngena ate Dibata nandangi kerina perilaku seks si ilakoken bangsa Mesir ras Kanaan. Kerina perbahanen si menyimpang ndai la maba keselamaten ku tengah-tengah bangsa Israel, sementara misi Dibata e me maba keselamaten ku tengah-tengah bangsa Israel. Si peduaken, perilaku seks si menyimpang ndai banci encedaken relasi antar keluarga i tengah-tengah bangsa Israel. Dibata si isembah Israel e me Dibata si ratur. Enggo ibahan Dibata pola-pola relasi si mehuli i tengah-tengah bangsa e. Kerina pola relasi si mehuli si enggo ibahan Dibata e banci hancur adi silakoken perilaku seks si menyimpang. Orang tua banci ate-atena man anak-anakna. Anak-anak pe pasti la ihamatina orang tuana, banci ate-atena man orang tuana. Kerina kalak banci ate-atena man kalak si deban nandangi hasrat seksualna. Adi pola relasi si mehuli i tengah masyarakat enggo la nai lit enggo pasti terjadi kekacauan. Si peteluken, perilaku seks si menyimpang banci mpeturah pinakit menular si tentuna encedai kesehaten masyarakat. 

Emaka alu tegas Musa nehken Kata Dibata ku tengah-tengah bangsa Israel gelah patuh man Dibata alu ngelakoken kerina perentah-perentahNa, gelah ibereken Tuhan keselamaten. Ise pe si la patuh tentu datken akibatna, kena pinakit, ceda relasina ras kalak si deban, entah pe dat ukumen i bas Dibata nari.

Pengkenaina

Lit piga-piga hal si akap kami banci jadi renungenta i bas PJJ sendah rikutken ogen ras tema. Si pemena, ogenta sendah ngerana secara khusus kerna kiniraturen i bas pola relasi seksual i tengah-tengah masyarakat si ibenaken i bas keluarga. Pendidiken seks akap kami seh kel pentingna i bas jaman genduari enda, khususna man generasi muda. Pendidiken seks labo terjeng meteh kerna jenis kelamin ras alat-alat reproduksi saja. Pendidiken seks mencakup konsekuensi pola-pola relasi si bakal terjadi adi la sipergunaken alu mehuli.

Umpamana kasus MBA, married by accident, erjabu secara terpaksa erkiteken enggo leben mehuli kula si diberu. Tentu lit pola relasi si ceda baik antara si dilaki ras si diberu, antara orang tua ras anak, antara keluarga si dilaki ras keluarga si diberu. Melala arapen orang tua man anak banci jadi la tersehi erkiteken MBA ndai. Bage pe man si bersangkuten (si dilaki ras si diberu), mungkin enggo lit cita-citana, tapi erkiteken MBA ndai, enggo terhambat bahkan enggo la nai banci siwujudken cita-citana. Piah dungna perjabunna pe la sikap perban memang lenga siap guna erjabu. Lenga ka konsekuensi-konsekuensi si deban adi silakoken perilaku seks si menyimpang i bas kegeluhenta si tep-tep wari. Enggo pasti ceda relasi si mehuli si enggo terjalin i tengah-tengah keluarga bage pe masyarakat. Emaka i bas si e, marilah radu ras sijaga gelah ula sempat terjadi perilaku seks si menyimpang.

Si peduaken, PJJ-ta sendah iakitken ras Tata Gereja. Kai kin Tata Gereja e? Rikutken informasi AI nari bagenda nina, “Tata Gereja GBKP (Gereja Batak Karo Protestan) adalah aturan dasar dan tata tertib sistematis yang mengatur kehidupan, pelayanan, dan organisasi GBKP, yang berlandaskan teologi Calvinis. Ini mencakup Tata Dasar, Tata Pelayanan, dan Tata Kerja yang disusun untuk mengatur struktur organisasi (Runggun/Jemaat, Klasis, Sinode) serta prosedur gerejawi. Fungsi utamanya sebagai hukum internal gereja untuk menegakkan keadilan, perdamaian, dan keteraturan dalam pelayanan. Tata Gereja ini memastikan setiap jemaat memahami prosedur gerejawi dan misi GBKP, yaitu melaksanakan persekutuan, kesaksian, dan pelayanan.”

Kai enda antusenna? Si pemena lebe, tentu kerina kita ngawan ni perpulungen GBKP wajib ngataken bujur man Dibata erkiteken enggo lit Tata Gereja GBKP bahkan enggo lit pembaharuan Tata Gereja GBKP. Adi enggo lit pembaharuan Tata Gereja, ertina enggo melala perobahen-perobahen rikutken konteks kegeluhen Gerejanta si terus berkembang. Arapenta tentuna kerina perobahen enda mabai kita kerina ku si mehuli sue ras Kata Dibata. Si peduaken, tentu kerina kita Serayan Tuhan (Pdt./Pt./Dk./Em), Pengurus Kategorial, Pengurus PJJ, rikut perpulungen harus memiliki Tata Gereja. Uga makana kita banci meteh aturen i bas Gerejanta adi bukuna saja la lit i bas kita. Si peteluken, kerina kita wajib meteh ras makeken Tata Gereja si enggo isepakati bersama i bas Keputusen Sidang Sinode Gerejanta. Enda menjadi pergumulenta ras, erkiteken rikutken pengalamen si enggona, enterem kita, bahkan Serayan (Pdt./Pt./Dk./Em.), si la itehna kai-kai saja si enggo jadi keputusen-keputusen i bas Sidang Sinode. I bas si e tentu harus terus isosialisasiken kerina hal si enggo jadi keputusen i bas Sidang Sinode Gerejanta, khususna kerna Tata Gereja GBKP.

Terakhir, PJJ-ta sendah ngajuk kita kerina gelah ngikutken pedah ras perentah Dibata, alu bage geluh erkiniteken, bage pe kegeluhenta si tep-tep wari banci erdalam alu ratur, si mabai kita ku keselamaten. Dibata si isembah kita e me Dibata kiniraturen. Itepa Dibata alam semesta ras kerina isina alu ratur, sistematis ras tuhu-tuhu terprogram, seh makana kerinana banci erdalan alu mehuli. Raja Daud ngakukenca maka Dibata e me Dibata si ratur, nina, “Sebab IA menegakkan bagiku suatu perjanjian kekal, teratur dalam segala-galanya dan terjamin” (2 Sam. 23:5b). Rasul Paulus pe ngajarkenca kerna kiniraturen i tengah-tengah perpulungen, nina, “Tetapi segala sesuatu harus berlangsung dengan sopan dan teratur” (1 Kor. 14:40). Pindolah gegeh i bas Dibata nari gelah ipengasupNa kita ngikutken pedah ras perentah Dibata.