SUPLEMEN PJJ GBKP TGL. 8 - 14 FEB. 2026

Pdt. Larena Sinuhadji (Nd. ReyRapha Tarigan)

TERANG PENGIDAH JANAH NANDAI YESUS - Lukas 24:13-32

(Sasaren Pelayanen GBKP 2026 - 2030)

Penaruh

Lit sada istilah bhs. Latin nari nina “Deus absconditus” ertina Dibata si la teridah (Allah yang tersembunyi). Rikutken informasi AI nari, “Konsep Allah yang hadir namun tidak disadari atau tersembunyi dalam kehidupan manusia, terutama dalam situasi penderitaan atau keterbatasan manusia untuk memahami Allah, sering disebut sebagai Deus absconditus.” Enda akap kami si nialami ajar-ajar Yesus i bas ogenta sendah.

Mpebagesi Ogen

Ogenta sendah lit i teruh judul perikop “Perdalanen ku Emaus” i bas terj. TB-LAI nina “Yesus menampakkan diri di jalan ke Emaus.” Judul perikop i bas TB-LAI nari akap kami banci melengkapi pengangkanta kerna ogenta sendah. Ituriken lit dua ajar-ajar Yesus si lit i bas perdalanen ku Emaus. I bas perikop sebelumna ituriken maka enggo keke Yesus i bas kematen nari. Ertina dua kalak ajar-ajar ndai lawes ku Emaus wari peteluken kenca kematen Yesus i kayu persilang. I bas si e banci ikataken maka suasana kebatinan kerina ajar-ajar Yesus sangana lit i bas ceda ate denga, megogo, kemamangen, bingung, mbiar, kai nari si harus ilakoken (band.  Luk 24:17B), sebab Mesias si niarapken mbebasken bangsa Israel i bas penjajahen nari, enggo mate i kayu persilang.

Dua ajar-ajar si lawes e gelarna Kleopas, sada nari la lit tersinget gelarna. Lit tafsiren si ngatakenca Simon Petrus, Lukas, entah pe ndehara Kleopas (bdk. Joh. 19:25). La lit si pasti sebab memang la ituriken ise gelarna i bas ogenta. Tentu lit tujun khusus Injil Lukas makana la isingetken gelarna. Tapi enda akap kami antusenna, sekalak nari ajar-ajar e banci mewakili ise saja, termasuk kita si ngoge turi-turin enda. Lit piga-piga hal si akap kami banci jadi renungen i bas PJJ-ta sendah.

Si pemena, Dibata tetap ras ajar-ajarNa janah megiken keluh kesah ajar-ajarNa (ay. 15-24). Enda teridah asum dua ajar-ajar e erdalan ku Emaus, si jarakna kurang lebih 11 Km i Jerusalem nari, Yesus nungkun ras mpediat ajar-ajar e nuntungken isi pusuhna (perbebenna, kekecewaanna). 

Si peduaken, kenca enggo ibegiken Yesus kerina keluh kesah ajar-ajar e, ijelasken Yesus kerna Kata Dibata, maka Mesias harus ngenanami kiniseran sope bengket ku kemulianNa (ay. 25-27). Mesias si ipadanken Dibata i bas Yesus berbeda ras  si nisuraken ajar-ajar (ay. 21, “Enggo iarapken kami, maka IA me si mbebasken bangsa Israel.” Mesias tanpa Salib. Ertina i jenda isingetken mulihi kerna pengajaren-pengajaren Yesus si enggo pernah isehkenNa man kerina ajar-ajarNa.

Si peteluken, Yesus itandai asum ritus, serangkaian tindaken simbolis, ritual keagamaan, si biasa ilakokenNa ras ajar-ajarNa ndube, mulihi ilakakoken Yesus (ay. 30-31). Klimaks kisah enda labo terjadi i dalan, tapi i bas rumah, i meja makan. Bengket Yesus ku rumah ras tading ras kalak ndai. Ibuat Yesus roti, ikatakenNa bujur man Dibata je nari icepik-cepikNa janah iberekeNa man kalak e. Kenca bage, minter terang pengidah si dua kalak e janah itandaina Yesus. Itandai dua kalak ajar-ajar e Yesus labo arah perbahanen si mbelin (dahsyat) tapi arah tindaken si mekatep iidah ajar-ajar e sebelumna. Ironisna, kenca enggo itandai dua kalak Yesus, i je ka minter la nai iidahna Yesus. Antusenna, Injil Lukas mereken penekanen maka kiniteken man Yesus labo bergantung man perjumpan secara fisik (melihat Yesus secara fisik), tapi nandai IA secara pertendin. Labo mata jasmaninta si terbuka tapi mata pertendinta. 

Si peempatken, kiniteken ajar-ajarNa si dua kalak ndai ipelimbarui mulihi entah pe ipulihken (ay. 32). Nina si dua kalak e sapih-sapih ia, “Ma malem kal tuhu ateta dingen ergiah-giah ukurta asum IA ngerana ras kita i gedang-gedang dalan dingen iterangkenna man banta kerna isi Pustaka Si Badia?” Ajar-ajarNa sedar: Tuhan enggo erdahin i bas benaken perdalanen, bahkan asum lenga itandaina temanna erdalan e Yesus. 

Pengkenaina

Tema si seh man banta i bas PJJ sendah, “Terang pengidah janah nandai Yesus,” alu sub tema, Sasaran Pelayanen GBKP 2026-2030 - Penguatan Spiritualitas Personal Berbasis Keluarga. Lit piga-piga hal si banci jadi renungenta sendah erpalasken ogen. Si pemena, nandai Yesus berbeda ras meteh kerna Yesus. Enggo pasti melala kalak meteh kerna Yesus, bolak-balik ngoge Alkitab, mendengar informasi kerna kegeluhen ras karya Yesus, tapi lenga bo tentu itandaina Yesus. Nandai Yesus ertina nggit membangun relasi ras IA, janah ndalanken kai si jadi perentah-perentahNa.

Si peduaken, relasi ras Tuhan (nandai Dibata) tumbuh arah proses kegeluhenta wari lepas wari, labo pengalamen si instan. Bahkan i bas erbage-bage pengalamen kiniseran entah pe ceda ate, mabai kita reh mbagesna nandai Dibata. Dua ajar-ajar Yesus labo minter nandai Yesus i bas awal perdalanen. Tapi leben kurang lebih 11 Km dekahna ibegikenna pengajaren Tuhan Yesus, bage pe ras-ras kundul i meja makan. Pengenalan akan Tuhan adalah proses, bukan momen sekali jadi.

Si peteluken, mata pertendinta terbuka asum nggit kita sipelebeken sura-sura Tuhan labo sura-suranta. Awalna pemahaman ajar-ajar, maka Yesus (Mesias) si ipadanken Dibata reh guna nelamatken bangsa Israel secara fisik saja. Maka Yesus harus ngenanami erbage-bage kiniseran. Pemahamen ajar-ajar ipekena Yesus. Penandaita si payo man Dibata mabai kita nggit ikoreksi bahkan asum Kata Dibata e bertentangen ras sura-suranta. Sura-sura Tuhan-lah si pementas i bas kegeluhenta. Kata Dibata si enggo sipelajari kita harus jadi pedoman (penuntun) i bas perukuren ras perbahanenta.

Si peempatken, penting man banta, firman Tuhan, Kata Dibata, bertumbuh ras berbuah i bas dirinta. Enggo 135 tahun ndekahna Berita Si Meriah reh ku tengah-tengahta, seharusna merubah pola pikir bage pe perilakunta, baik i tengah-tengah keluarganta, Gereja, bage pe masyarakat i sekelewetta. Em tandana maka enggo tuhu-tuhu sitandai Dibata si isembah kita i bas Yesus Kristus. Pindolah gegeh i bas Dibata nari gelah ipengasupNa kita nandai Dibata i bas Yesus Kristus alu tuhu-tuhu.