SUPLEMEN PA MAMRE GBKP TGL. 15 - 21 FEBRUARI 2026

Pdt. Larena Sinuhadji (Nd. ReyRapha Tarigan)

Kekerabatan

Ogen : Matius 12:46-50

Tema : JABU SI NDALANKEN SI NGENA ATE DIBATA

Tujun : Gelah Mamre :

1) Banci ngertiken keluarga rikutken teks

2) Ngasup engkelengi kerina kade-kadena salu kekelengen Dibata

Penaruh

I bas Gereja Katolik, lit istilah “Ecclesia domestica,” rikutken informasi AI nari bagenda nina, “Ecclesia domestica” atau “Gereja rumah tangga” adalah konsep dalam kekristenan yang menempatkan keluarga sebagai pusat iman, komunitas pertama, dan sekolah pendidikan rohani. Di rumah, orang tua dan anak bersekutu, berdoa, dan menghidupi nilai-nilai injil dalam keseharian.” Enda akap kami sue ras kegeluhen “Jemaat mula-mula” i ja ibadah-ibadah ilakoken i rumah-rumah perpulungen, janah keluarga-keluarga Kristen paksa si e, tuhu-tuhu jadi ujung tombak perkembangen Kekristenan. Ertina keluarga-keluarga Kristen paksa si e labo terjeng pegancih-gancih erbahan kebaktin-kebaktin i bas rumahna, tapi tuhu-tuhu jadi saksi Kristus i bas kegeluhenna si tep-tep wari (bdk. Perb. Rasul 2:43-47; 4:32-37).

I bas kesempaten enda radu ras kita mulihi erlajar kerna jabu kalak Kristen si nggeluh sue ras Kata Dibata erpalasken ogenta sendah.

Mpebagesi Ogen

Ogenta sendah lit i teruh judul perikop “Nande ras senina-senina Yesus.” Perikop enda labo berdiri sendiri, ertina lit kaitenna ras perikop-perikop sebelumna. I bas ay. 1-8 ituriken kerna ajar-ajar Yesus si mutiki ras man gandum erkiteken melihe i bas wari Sabat. Kai si ilakoken ajar-ajar Yesus enda erbahanca merawa kalak Parisi. I bas ay. 9-14 ituriken kerna Yesus si mpepalem sekalak si mate serapen tanna sembelah i bas wari Sabat. Si e pe erbahanca kalak Parisi nembeh ras ersura-sura guna munuh Yesus. I bas ay. 22-32 Yesus dat tuduhen maka kuasa si ipakeNa guna mpelawes setan si lit i bas sekalak pentang dingen lanai beluh ngerana, labo kuasa Kesah Dibata tapi kuasa Balsebul pengulu setan. I bas ay. 38-42 ituriken maka itulak Yesus piga-piga Guru Agama si mindo tanda-tanda sengget man baNa. Tentu enda pe erbahanca Guru-guru Agama ndai nembeh man Yesus. Arah kerina peristiwa si terjadi sope perikop ogenta sendah, teridah maka kerina si ilakoken Yesus e kontroversial, memicu kemarahan pihak-pihak si la senang man baNa, bahkan banci memicu konflik sosial. Si jadi penungkunen, uga nge kira-kira perasaan keluarga Yesus (nandeNa ras senina-seninaNa) ngenen kerina si enggo ilakoken Yesus?

I bas tradisi kalak Yahudi paksa si e, iketen keluarga biologis (oikos) tuhu-tuhu penting. Emaka loyalitas nandangi nama baik entah pe kehormatan keluarga harus ilakoken kerina anggota keluarga. Iketen si lit i bas keluarga biologis i bas Bhs. Yunani isebut “storge” entah pe kasih persaudaraan. Kasih persaudaraan enda sifatna alami, naluriah, keleng ate si lit erkiteken iketen dareh, kedekatan domestik antara: orang tua ras anak, turang ras senina, bage pe kade-kade si deban si tading i bas sada rumah. Keleng ate storge enda sifatna eksklusif ras protektif. Lit kecenderungan i bas storge enda guna melindungi ras mengkoreksi tindaken-tindaken si ianggap banci mencemarkan kehormatan entah pe nama baik keluarga. Enda nge sebagin nilai-nilai kekerabatan si lit i bas konteks kalak Yahudi. I bas si e enggo banci terbayangken kai si lit i bas pusuh perukuren nande Yesus bage pe senina-seninaNa.

  

I bas ogenta sendah, ituriken asum Yesus ngerana denga, reh nandeNa ras senina-seninaNa, tedis i darat, jumpa ate kalak enda ras Yesus. Kai nge kira-kira maksud tujun kerehen nande Yesus ras senina-seninaNa? Memang i bas ogenta sendah la ituriken kai maksud tujunna njumpa ras Yesus. Tapi arah perspektif storge ndai, kerehen nande ras senina-senina Yesus enggo pasti guna melindungi ras mengkoreksi tindaken-tindaken Yesus si iakap keluarga e kontroversial. Banci terbayangken adi tuhu kalak enda jumpa ras Yesus, mungkin enggo mis irawai nande ras senina-seninaNa Yesus, ipersingeti, ola sempat erbahan ceda kehormaten keluarga. I bas si e kai si ilakoken nande ras senina-senina Yesus sangat wajar i bas perspektif storge, tapi situhuna lenga tuhu-tuhu iangkai keluargaNa, maka kerina si ilakoken Yesus e perentah Dibata BapaNa. E maka i bas si e Yesus mereken makna si mbaru i bas nilai-nilai kekerabatan i tengah-tengah keluarga kalak Yahudi. Ikataken Yesus, “Ise ndalanken kai si ngena ate Dibata, BapangKu, ia kap seninangKu, turangKu, ras nandengKu.” Jabu-jabu kalak si tek labo terjeng mempertahankan kehormatan ras nama baik keluarga, tapi njadiken Kata Dibata sebage palas kehormatan ras nama baik keluarga ndai. Alu bage terjadi transformasi nilai-nilai kekerabatan, jabu-jabu kalak si tek tuhu-tuhu jadi alat Dibata guna nehken sura-suraNa i tengah-tengah doni enda.

Pengkenaina

Tema bage pe tujun PA-ta sendah, sekali nari ngajuk kita kerina, khususna kam kerina Mamre, gelah mabai keluargana erkemalangen man Dibata, ndalanken kerina si ngena ate Dibata, engkelengi kerina kade-kade salu kekelengen Dibata. I bas si e tentu harus leben inanami Mamre uga kin keleng ate Dibata e? Adi enggo tuhu-tuhu tergejap keleng ate Dibata i bas kegeluhen Mamre, maka enggo banci keleng ate Dibata e sibagiken ku tengah-tengah jabu masing-masing. Keleng ate Dibata i jenda tentu labo keleng ate si pasif, tapi si proaktif. Umpamana, berinisiatif mediate nandangi kebutuhen isi jabu, aktif berkomunikasi alu mehuli, rsd.-na. Keleng ate Dibata i jenda tentu labo permisif, tapi korektif-konstruktif. Umpamana, melindungi, mpersingeti, memotivasi, mabai ku si mehuli, mereken teladan i bas kai pe, mpegegehi, tetap megenggeng i bas erbage-bage tantangen, ras melala denga si deban. Ertina engkelengi i jenda labo terjeng berkaiten ras pemere-pemere si sifatna materi, tapi si utamana nehken teladan si mehuli erpalasken Kata Dibata. Emaka mari radu ras kita ertekad mewujudkan jabu si ndalanken si ngena ate Dibata. Jabu-jabu si ndalanken nilai-nilai kekerabatan Kristus. Sipindo gegeh i bas totonta gelah ipengasup Dibata kita, khususna kam Mamre jadi imam si patuh ras erkemalangen man Dibata.