SUPLEMEN PA MORIA GBKP TGL. 15 - 21 FEBRUARI 2026

Pdt. Larena Sinuhadji (Nd. ReyRapha Tarigan)

Penyataan Umum : Ciptaan

Si Man Ogen : Mazmur 19:1-7

Tema : DIBATA ERMULIA I BAS TINEPA-NA

Tujun : Gelah Moria :

- Meteh maka kerina tinepa ncidahken kemulian Dibata

- Muji ras ngataken bujur man Dibata arah ende-enden

Metode : Aksi

Penaruh

Rikutken informasi i bas AI nari, “Bencana alam di Indonesia belakangan ini (akhir 2024 hingga awal 2026) didominasi oleh fenomena hidrometeorologi seperti banjir, tanah longsor, dan angin kencang. Berdasarkan data terbaru dari BMKG dan BNPB, salah satu penyebab utamanya adalah kerusakan lingkungan sebagai dampak dari aktivitas manusia, seperti: penggundulan hutan di hulu Daerah Aliran Sungai (DAS), konversi hutan menjadi perkebunan atau pemukiman yang mengurangi kemampuan tanah menyerap air, serta budaya membuang sampah sembarangan.” Arah informasi enda teridah maka tempa-tempa enggo lanai lit kemulian Dibata i bas tinepaNa, erkiteken enggo ceda ibahan manusia.

I bas kesempaten enda radu ras mulihi kita erlajar kerna ngergaken janah njagai tinepa Dibata erpalasken si man ogenta sendah.

Mpebagesi Si Man Ogen

Masmur 19:1-7 ibere judul “Dibata ermulia i bas tinepaNa” (bhs. Ind. : “Kemulaian Tuhan dalam pekerjaan tanganNya dan dalam tauratNya”). I bas Alkitab Bhs. Indonesia, bindu 19 kerina igabung. Pemasmur ngakukenca maka alam semesta bekas tan Dibata nepasa, ipake Dibata guna ncidahken kemulianNa. Langit ncidahken kemulian Dibata, awang-awang (cakrawala) erberita kerna perbahanenNa. Langit jadi ingan Dibata guna ngeleketken matawari, bulan ras bintang. Teluna erfungsi sebage benda-benda penerang man doni enda, ras guna mbedaken terang ras gelap. Aminna benda-benda penerang e la lit sorana (ay. 4, “Tidak ada kata, suara mereka tidak terdengar”) tapi kemulian Dibata terpancar arah fungsi (karya) benda-benda penerang enda ndai. 

Matawari, bulan ras bintang-bintang si banci menerangi gelap khususna berngi wari terlebih i daerah si lenga banci masuk lampu listrik, kehadiren bulan ras bintang tuhu-tuhu berfungsi sebage penerang. Adi Pemasmur ngatakenca, “Gema mereka terpencar ke seluruh dunia, dan perkataan mereka sampai ke ujung bumi” (ay. 5). Pemasmur pe secara sederhana nuriken pengamatenna kerna fungsi tinepa Dibata ndai i bas keseharianna (ay. 6-7): erpagi-pagi putlak matawari ras terbenam ka, siang malam silih berganti. Wari-wari e berputar i bas otoritas Dibata. Alu bage jelas, kasa kai si lit i langit ncidakhen kemulian Dibata. Arah fungsina si banci denga igejapken kerina makhluk hidup seh asa gundari. Dingen arah si e tercipta kenyamanan, semangat manusia guna beraktivitas dingen terpuji gelar Dibata.

Pengkenaina

I bas iman Kristen, radu ras siakuken maka Dibata mpetandaken diriNa arah dua cara, penyataan umum ras penyataan khusus. Penyataan umum maksudna, Dibata mpetandaken diriNa man kerina kalak arah alam semesta ras hati nurani manusia. Penyataan khusus maksudna, Dibata mpetandaken diriNa man kerina kalak si tek arah Pustaka Si Badia ras Yesus Kristus sebage dalan keselamaten. Penyataan umum ras khusus enda saling melengkapi guna encidahken peraten ras sifat Dibata. Alu bage enggo tangkas man banta maka alam semesta e me bentuk konkrit penyataan Dibata secara umum man kerina manusia, labo terjeng man banta kalak si tek man baNa.

Pemasmur enggo naksiken maka kerina tinepa Dibata encidahken kemulian Dibata. Kemulian Dibata e secara tanpa kita sadari enggo erbahanca kita nggeluh alu mehuli. Kerina tinepa Dibata si enggo isebutken Pemasmur ndai tuhu-tuhu maba pasu-pasu man kita manusia. Ertina kemulian Dibata e labo terjeng i bas pengidahta saja luar biasa, ajaib, spektakuler, rsd.-na, tapi tuhu-tuhu banci sigejapken manfaatna i bas kegeluhenta si tep-tep wari. Si jadi penungkunen, apakah tugasta hanya menikmati bage-bage saja? Tentu lang! I bas Kej. 2:15 enggo radu ras siteh maka lit tugas tanggung jawabta selaku manusia, e me ngusahai ras njagaisa. Manusia ijadiken Dibata sentudu ras tempas Dibata, si menam seri ras Dibata, ertina lit kemulian i bas dirinta manusia. Saja erkiteken dosa maka kemulian e sempat bene i bas dirinta (Roma 3:23), tapi erkelangken Yesus Kristus, kemulian e enggo idatken kita mulihi. I bas si e tentuna lit tugas tanggung jawabta guna encidahken kemulian Dibata e i bas kegeluhenta si tep-tep wari, secara khusus arah kepedulianta nandangi alam semesta si enggo ceda. Kai si banci silakoken kita?

I bas PA-ta sendah lit aksi si harus ilakoken kita, e me mpersembahken ende-enden pujin man Dibata erkiteken tinepaNa si luar biasa. Tapi akap kami mehuli adi labo terjeng rende muji Tuhan. Radu ras kita mediate nandangi alam sekelewetta. I bas tahun 2022 sasaren pelayanenta e me “Kreatif Merawat Lingkungan” harus terus ilakoken, ibenaken i bas dirinta. Mengurangi penggunaan plastik alu maba tumbler-ta masing-masing. Melala denga kita alu alasen praktis ekonomis, mengkonsumsi minuman kemasan i bas kegiaten-kegiaten Gerejanta. Membudayaken membuang sampah pada tempatnya. Melala denga Gerejanta si melket alu sampah-sampah si berserakan, lenga turah kesadaren i bas dirinta guna menjaga kebersihen Gerejanta. Kebersihen Gereja hanya menjadi tanggung jawab Koster Gereja, labo tanggung jawabta. Melala denga contoh-contoh si deban si labo encidahken maka lit kemulian Dibata i bas dirinta. Alu bage mari radu ras kita ertekad mulihi guna mediate nandangi kelestarian lingkungan alam si lit i sekelewetta, gelah kemulian Dibata arah alam semesta enda banci denga sigejapken. Janah kita pe selaku manusia si enggo ngaloken keselamaten i bas Yesus Kristus, encidahken kemulian Dibata arah kerina pengkebet geluhta. Dibata si mpengasup kita kerina.