SUPLEMEN PJJ GBKP TGL. 22 - 28 PEBRUARI 2026

Pdt. Larena Sinuhadji (Nd. ReyRapha Tarigan)

KULAKOKEN PERENTAH TUHAN - Ulangen 26:12-15

(Persembahen Perpuluhen)

Penaruh

Ngerana kerna persembahen persepuluhen situhuna i bas GBKP enggo lalap icakapken. Setiap tahun pasti masuk ku bas materi bahan PJJ. Bahkan situhuna, persembahen persepuluhen enggo idalanken i bas GBKP nggantiken adangen tahunen mulai tahun 2000. Tapi i bas pelaksanaanna lenga kerina ikut muat bagin. Bahkan serayan sendiri melala lenga jadi contoh i bas nehken perpuluhen.

Mpebagesi Ogen

Ija nari perpuluhen ibenaken?

• Abraham, sebage tindaken syukur. Perpuluhen pertama kali ilakoken asum Abraham mereken sepersepuluh man Melkisedek (Kej. 14:18-20). Labo situhuna, lit i je perentah. Tapi Abraham mere erkiteken iakuina penemani Tuhan i bas kegeluhenna. Terlebih i bas ia banci mbebasken anak seninana Lut.
• Jakub, respon erkiteken perjumpaanna ras Dibata. Jakub ernasar mereken sepersepuluh kenca enggo ia jumpa ras Tuhan arah nipina i Betel (Kej. 28:20-22). I je ersumpah Jakub adi memang tuhu-tuhu ia ikawali Tuhan i bas perdalanenna, janah ibereken Tuhan uis ras pangan, bahkan selamat ia mulih ku rumah bapana, Ishak emaka ijadikenna TUHAN jadi Dibatana. Janah iberekenna pagi sepersepuluh ibas kasa kai si ibereken Tuhan man bana.

Ertina i jenda, perpuluhen sebage pengataken bujur, labo kewajiben hukum.
Sedangken perpuluhen i bas Hukum Musa (PL), termasuk bahanta sekali enda  Ul. 26 :12-15, iatur sebage bagian i bas kegeluhen bangsa Israel.

I bas ay. 12, tiap tahun peteluken, bangsa Israel iwajibken mereken persembahen persepuluhen e me sepersepuluh i bas ulih jumana guna menopang kalak Lewi, kalak pertandang, anak-anak melumang ras man diberu balu-balu. Jadi i bas kegeluhen bangsa Isreal lit siklus (pola) telu tahunen. Perpuluhen tahun I ras II ibaba ku Rumah Dibata (tempat kudus) untuk perayaan, tapi i bas tahun III, isimpan i bas daerahna masing-masing ras ibereken man kalak Lewi (si la lit tanehna), kalak tandang, anak yatim ras diberu balu-balu. Ertina, lit i je tindaken sosial, mperdiateken kalak si kekurangen. Tanda maka penyembahen man Dibata ras keadilen sosial la banci ipisahken.

Alu tegas, bangsa enda ngatakenca maka la isimbakna ras la ia lupa nandangi perentah-perentah Tuhan kerna persepuluhen e. Subuk sanga bangsa enda erceda ate. Ertina, perpuluhen e la ipake guna kebutuhen pribadi termasuk i bas masa perkabungan. Hal enda menekanken maka persembahen e badia, labo ibuat arah dana darurat pribadi. Enggo kin ipersiapkenna. Subuk sangana la bersih rikutken peraturen agama. Ertina, persembahen e la isalahgunaken i bas kondisi si la sesuai ras kebadian hukum Tuhan. Dingen la iberekenna man persembahen kalak mate. Ertina, la ipakeken guna keperlun upacara kematen. 

Kesimpulenna, maka kiniteken bangsa Israel labo hanya ngerana kerna mere, tapi mere alu integritas ras ketaatan man Tuhan. Ras i je pe ay. 15, mindo bangsa enda gelah Tuhan tetap masu-masu kegeluhenna. Igambarken maka Dibata si ringan i surga (transenden) tetap peduli man umatNa. Jadi i jenda labo soal transaksi, tapi pola relasi perjanjian. Dibata si tetap setia masu-masu umatNa. Sekali nari, Persepuluhen i bas PL selalu ikaitken ras ibadah, perentah Tuhan ras keadilen sosial.

Persepuluhen i bas PB. I bas Perjanjian Baru, labo lit i je perentah langsung gelah Gereja wajib mereken perpuluhen. Tapi prinsip mere semakin itingkatken, labo ka menurun.

1. Mere alu meriah ukur ras rela (2 Kor. 9:7). Dibata ngkelengi kalak si mere alu ukur meriah.
2. Gereja Perdana (mula-mula) mere jauh lebih besar asa 10%. Iberekenna sue ras kebutuhen perpulungen (Perb. Rasul 2:45; 4:35).
3. Bahkan Yesus sendiri pe menegasken mere harus isertai keadilen ras kekelengen (Mat. 23:23).

Kesimpulenna, persepuluhan bukan kewajiban hukum dalam Perjanjian Baru, tetapi menjadi pedoman spiritual untuk hidup memberi dengan sukacita dan tanggung jawab.

Versi Audio silahkan klik : https://youtu.be/VH_jQ-MHW2w

Pengkenaina

Persepuluhen enggo iberlakukan ibas GBKP benaken tahun 2000. Ras merupaken salah sada sumber keuangen Gerejanta, selain arah persembahen kolekte umum setiap kebaktin Minggu, persembahen Kerja Rani ras persembahen syukur si deban. Persepuluhen tetap relevan ilakoken seh asa genduari perban nampati kita guna setia (disiplin) ngataken bujur man Tuhan, Sebab sigejapken maka kerina si lit i bas kita rehna bas Dibata nari. Ras mere e me termasuk respon iman. Bage pe Gereja butuh dukungen (partisipasi) arah perpulungen nari. Sebab jelas, i bas GBKP kegunaan perpuluhen, 40% setor ku Moderamen guna kebuhuhen gaji personalia GBKP ras nampati Klasis si defisit denga. 50% setor ku Runggun guna operasional Runggunta, ras 10% mulihken ku Sektor.

Mari kekelengen ni Tuhan, ula mbiar kita mere man Tuhan secara khusus i bas nehken perpuluhenta. Ula mere erkiteken ikut-ikuten, mbiar ikutuk, terpaksa, entah ngarapken iberkati Tuhan ka. Sebab kita enggo leben iberkati Tuhan. Gejapkenlah, adi kin erkiteken kita setia nehken perpuluhenta, reh musilna kita, pengadi kita nehken perpuluhen e, tapi adi tetap geluhta mejuah-juah, mari setia kita nehken perpuluhen bahkan adi banci sitingkatken nominalna. Tuhan masu-masu kita.