SUPLEMEN PA MORIA GBKP TGL. 18 - 24 OKT. 2026

Pdt. Larena Sinuhadji (Nd. ReyRapha Tarigan)

Kebutuhan Moria: Kesehatan Mental

Si Man Ogen : Masmur 42:1-12

Tema : DIBATA INGAN PENGARAPEN

Tujun : Gelah Moria :

- Meteh kerina kiniseran ras pengarapen Pemasmur

- Netapken pilihen guna erpengarapen man Tuhan

Metode : Curhat

Penaruh

PA-nta sendah lit kaitenna ras kesehatan mental. Kai e kesehatan mental? Rikutken informasi i bas AI nari, “Mental health (kesehatan mental) adalah kondisi kesejahteraan emosional, psikologis, dan sosial yang memengaruhi cara seseorang berpikir, merasa, bertindak, serta berinteraksi dengan lingkungan sekitarnya.” Masalah kesehatan mental i bas paksa si gundari enda penting guna siperdiateken, erkiteken menurut data Kementerian Kesehatan (Kemenkes) berdasarkan estimasi Organisasi Kesehatan Dunia (WHO), diperkirakan sekitar 28 juta penduduk Indonesia mengalami gangguan kesehatan mental, mulai dari kecemasan, depresi, hingga gangguan jiwa berat.

Emaka i bas kesempaten enda radu ras kita erlajar kerna njagai kesehatan mental erpalasken si man ogenta sendah.

Mpebagesi Si Man Ogen

Perikop si man ogenta sendah lit i teruh judul “Pertoton i taneh pembuangen” i bas terj. Bhs. Ind., nina, “Kerinduan kepada Allah.” Ay. 1 entah pe 2 enggo jadi syair lagu pujian si rusur iendeken kita. Secara keseluruhen ayat-ayat i bas perikop enda eme pertoton Pemasmur si lit i bas pelarian, entah pe pengasingan, i daerah utara Palestina, si ndauh i bas Rumah Pertoton i Yerusalem nari. I bas pengasingan enda kondisi mental Pemasmur pe lit i bas keadaan existential vacuum entah pe depresi spiritual.

Ay. 1-2, encidahkenca ketedehen (kehausan jiwa yang mendalam) man Dibata. Keberadaan Dibata labo terjeng pelengkap hidup, tapi memang tuhu-tuhu enggo jadi kebutuhen mutlak guna kegeluhen rohanina. Ay. 3-4, encidahken perbeben si mberat suari ras berngi. Perbeben e itambahi alu pengerana imbang-imbangna si nungkuni, “Ija kin Dibatandu?” I bas ay. 5 iinget Pemasmur mulihi sanga radu ras erdalan mabai perpulungen lawes ku Rumah Dibata alu ersurak-surak muji Dibata. Ingeten e erbahanca tedeh atena sekaligus getem pusuhna. Tapi i bas ay. 6 teridah maka la nggit Pemasmur ikuasai perbebenna si mberat. Ipersingetina dirina sendiri gelah sedar ras mulihken erpengarapen man Dibata. I bas ay. 7-12 iingetna mulihi kerna pengalamenna ngaloken keleng ate Dibata si luar biasa i bas kegeluhenna, janah ipindokenna gelah iinget Dibata ia. I jenda teridah pengakun kiniteken Pemasmur, tek Pemasmur maka pasti ipulahi Dibata ia i bas kiniseranna nari. Emaka tetap ipujina Dibata janah tetap erpengarapen ia man Dibata.

Hal si penting i jenda akap kami, i bas perbeben si mberat si ialami Pemasmur, labo ia ndarami gegeh, kepentaren, entah pe penampat i bas doni enda nari, tapi reh ia ku Dibata. Sebab tek Pemasmur maka Dibata ngenca si ngasup mereken dalan pulah ras pengapul si tuhu-tuhu. 

Pengkenaina

Bahan PA-nta paksa enda mulihi mpersingeti kita gelah tetap erpengarapen man Dibata. Bagi si enggo isingetken i bas bagin penaruh i datas, melala perbeben si harus ihadapi kita i bas jaman si gundari enda. Apai ka i bas situasi ras kondisi bangsa ras negaranta sendah, bencana di mana-mana, krisis energi, kelangkaan BBM, mesera ndarami dahin, erga-erga kebutuhen pokok semakin mahal, konflik politik, rsd.-na. Si e kerina nambahi perbeben si enggo lit i bas rumah tangga masing-masing. Emaka payo informasi arah Kemenkes ras WHO si ngatakenca maka lit sekitar 28 juta penduduk Indonesia si mengalami gangguan kesehatan mental, mulai dari kecemasan, depresi, hingga gangguan jiwa berat. Mungkin reh lalana i bas situasi ras kondisi si sendah.

Tapi Kata Dibata i bas ogenta sendah ngajuk kita gelah ngusih Pemasmur si ndarami penampat i bas Dibata nari. Tetap erpengendes ras erpengarapen man Dibata. Tapi amin bage gia, Dibata pe banci erdahin arah pengobaten-pengobaten medis entah pe psikis. Ertina sinenlah kondisinta, adina memang harus sitambari secara medis entah pe psikis, rehlah ertambar. I bas kita ertambar e tetap kita erpengendes ras erpengarapen man Dibata arah pertotonta si ipenangkih kita setiap saat. Emaka teruslah ertoto man Dibata. Alokenlah kerina si enggo ipercayaken Dibata man banta uga litna, janah kataken bujurlah man baNa. Sebab melala kita i bas jaman si gundari enda terganggu kesehaten mentalna erkiteken la ngasup ngaloken kinata geluh. Terpengaruh media sosial. Sibandingken keadaan geluhta ras kalak si deban. Ras si debanna. Dibata si mpegegehi kita kerina Moria GBKP.