SUPLEMEN PA MORIA GBKP TGL. 5 - 11 OKTOBER 2025

Pdt. Larena Sinuhadji (Nd. ReyRapha Tarigan)

Hari Ulang Tahun Moria GBKP

Si Man Ogen : Roma 15:7-13

Tema : MUJI DIBATA ARAH NGALOKEN TEMAN

Tujun : Gelah Moria :

1) Ngidah Pengajuk Paulus gelah perpulungen ngasup ngaloken teman si pelain-lain

2) Ngaloken perbedaan si lit i bas Moria

Penaruh

Johanes Calvin ngatakenca, maka doni enda e me panggung guna kita banci KITA mpermuliaken Tuhan (“Dunia adalah panggung kemuliaan Allah”). Hal enda labo erkiteken Dibata gila hormat tapi perban IA memang mulia. Jadi labo terjeng sanga kita ibadah i Gereja, termasuk i japa pe, kai pe si ilakoken kita, kerina guna kemulian Tuhan. Termasuk pe i bas ngaloken teman. Emaka lit ende-enden KAKR (Sekolah Minggu) nina, “Ku kasihi kau dengan kasih Tuhan. Ku kasihi kau dengan kasihi Tuhan. Ku lihat di wajahmu, kemuliaan Raja, ku kasihi kau dengan kasih Tuhan.” I bas diri temanta (kalak si deban) siidah Tuhan, maka e me palas kita ngkelengi ia. Alu bage, pelain-lain pe temanta, labo persoalen man banta, sebab dalanta banci saling melengkapi (ngkuhi) kegeluhenta.

Emaka mulihi i bas PA-ta minggu enda, ibabaina kita gelah banci ngaloken teman. Pelain-lain temanta, subuk karakterna, tingkat ekonomi, tingkat pendidikenna, rsd., si penting banci kita saling bekerja sama.

Mpebagesi Si Man Ogen

Roma 15:7-13 e me bagin penutup i bas pendapat Paulus kerna ngaloken sada ras si debanna i bas persadan kalak si tek. Mari radu ras siperdiateken.

Ay. 7, pendilo guna banci ngaloken teman. Paulus ngelumbaken perpulungen  guna banci kita saling menerima (ngaloken) teman sapih-sapih ia, sebab Kristus enggo leben ngaloken kita gelah arah si e terpuji Tuhan Dibata. Jadi banci siidah, palas kita ngaloken sada ras si debanna labo erkiteken “keseragaman” tapi perbahanen Kristus (karya Kristus) si enggo leben ngaloken kita. Teman si tuhu-tuhu, labo meneken (menghilangkan) perbedaan si lit, tapi banci ngalokenca sebage sada karunia guna kita banci saling melengkapi.

Ay. 8-12, kiniersadan kalak Jahudi ras Non-Jahudi. I jenda Paulus mengutip piga-piga ayat Alkitab (2 Sam. 22:50; Mas. 18:50; Ul. 32:43, Mas. 117:1; ras Jes. 11:10) si nuduhkenca maka keselamaten man bangsa-bangsa enggo ipadanken Tuhan sejak awal nari, ras nubuaten bangsa-bangsa si deban muji dingen menyembah Tuhan. Alu kata si deban, inklusivitas labo pudin itambahken, tapi merupaken bagin i bas rencana Dibata bena-benana nari. Kristus enggo erdahin guna kalak Jahudi lako ncidahken maka Dibata setia i bas nehken padanNa man nininta nai sekaligus gelah bangsa si labo Jahudi pe banci muji Dibata erkiteken perkuah ateNa.

Dibata ulu pengarapenta. Itutup Paulus perikop enda alu doa berkat. Gelah perpulungen idemi alu keriahen ras kemalemen ate. Gelah erkiteken gegeh Kesah Si Badia reh tambahna pengarapenta man Tuhan. I jenda banci siidah dimensi Trinitaris: Dibata sumbul pengarapen, Kristus palas penerimaan si dem keriahen ras kemalemen ate man banta, ras Kesah Badia si nampati kita gelah reh tambahna pengarapenta man baNa.

I tengah-tengah perbedaan, kemajemukan, perikop mpersingeti kita guna banci membangun ruang persahabatan si mampu menembus batas karakter, tingkat ekonomi, tingkat pendidikan, termasuk etnis, denominasi bahkan agama. Ngasup kita ngaloken sada ras si debanna labo terjeng i bas tataran konsep, entah pe perjumpaan ritual sangana lit acara-acara kebersamaan si igagas sada-sada lembaga (yayasan). Tapi perjumpan setiap saat si penuh keramahan, kehangatan cinta kasih, i tengah jabu (keluarga besar) si melala erbagena, perpulungen, inganta erdahin, ras masyarakat i ja kita tading. Palasna jelas, bagi Kristus si enggo ngaloken kita uga kita litna, maka kita pe (gereja) idilo guna banci bersahabat ras si deban. 

Perikop Roma 15:7-13, labo terjeng panggilan etis gelah kita mehuli (ramah) tapi sada visi teologis: Dibata sendiri e me Dibata si ngaloken, merangkul, ras ndilo anak-anakNa ku bas sada persadan lintas batas (la lit nari sekat-sekat), alu pengarapen erkiteken kinitekenta man Dibata si telu sada.

Versi Audio Silahkan Klik : https://youtu.be/Hjkoi6g4XsA

Pengkenaina

Tema i bas PA-nta sendah dalam rangka peringeten HUT Moria GBKP pe-68-ken. Tujun si pemena, enggo tangkas arah penjelasen bahan perikopta. Ras tujun si peduaken ngajuk kita Moria gelah ngasup ngaloken perbedaan si lit i bas Moria. Situhuna, enggo melala bahan PA-nta sebelumna si membahas soal si e (Sinergi; Erbage Kengasupen Nehi Sada Tujun; Sihamaten Ras Siergan, rsd.). Walaupe bage i bas kita tetap ipersingeti Firman Tuhan, maka tek kita Kata Dibata mpelimbarui geluhta ras cara pandangta. Sebab mekatep si terjadi, ras kalak si seri ras kita ngenca kita banci bekerja sama, entah meriah siakap. ‘Di kenca enggo berbeda entah la seri ras kita, minter siakap imbangta. I bas sada kepanitiaan saja, entah kepengurusen, mekatep si terjadi, “darami kalak si kompak, si banci bekerja sama.” Padahal situhuna, ras ise pe kita banci bekerja sama, asal jelas visina e me guna kemuliaan Tuhan ras lit kiniteruken ukur (mau saling menerima dan melengkapi, la jago akapna bana).

Tuhan enggo ngaloken kita uga litna kita, enda me si jadi palas man banta i bas banci ngaloken teman ras bekerja sama ras kalak si deban. Mari sibenaken i bas dirinta sekalak-sekalak. Poin penting si banci silakoken kita: si pemena lebe, pengangkan maka Kristus enggo ngaloken kita, entah ‘aku’, uga pe keberadaan geluhta. Si peduaken, nggit kita membuka diri ras kalak si deban, ngaloken kalak si deban si pelain-lain (ula hanya fokus man si seri bualna, sada frekuensi ras kita, rsd.), si penting kita banci saling melengkapi sada ras si deban. Si peteluken, kebangken budaya (sikap empati), meteruk ukur, mau belajar i bas kalak si deban nari.

Teklah kita, lit sura-sura Tuhan maka kita itamakenNa ku bas lingkungen jabu perbulangenta si banci jadi berbeda kel ras keluarganta ndube. Ku bas Sektorta, ku Runggunta, ku ingan erdahinta, ku inganta tading, ate Dibata gelah kita banci jadi alatNa guna mpermuliaken Dibata. Enda labo hal si murah, tapi kita harus nggit ibentuk (iproses) guna banci jadi alat bas tan Tuhan. I bas gegehta si terbatas, gegeh Tuhan tetap serta nampati kita. Sipindo gegeh Dibata si telu sada guna nampati kita, maka idemiNa kita alu keriahen ras kemalemen ate.