SUPLEMEN PJJ GBKP TGL. 26 OKT. - 01 NOV. 2025

Pdt. Larena Sinuhadji (Nd. ReyRapha Tarigan)

NAMPATI SURUH-SURUHEN TUHAN - Pilipi 4:14-20

(Pengurus PJJ)

Penaruh

Nampati ertina i bas bhs. Ind., e me, menolong. Si nampati ertina penolong. Penolong rikutken informasi i bas AI nari, e me, orang, alat, atau benda yang memberikan bantuan untuk meringankan beban orang lain atau untuk menyelesaikan suatu masalah. Istilah ini merujuk pada sifat atau tindakan suka membantu, seperti yang didefinisikan dalam KBBI sebagai “membantu untuk meringankan beban (penderitaan, kesukaran, dan sebagainya)”. Adi sinen kata kerja “nampati” i bas Alkitab Bhs. Karo, lit 281 kali itulisken. Ertina banci ikataken kata enda penting i bas pengajaren kiniteken erpalasken Kata Dibata. I bas kesempaten enda radu ras kita erlajar kerna nampati rikutken ogenta sendah.

Mpebagesi Ogen

Relasi si terjalin antara Paulus ras perpulungen kalak si tek i Kota Pilipi, banci ikataken sangat dekat. Lit piga-piga sebab si erbahanca hubungen antara Paulus ras Perp. Pilipi sangat dekat. Si pemena, erkiteken Paulus si manteki Perp. Pilipi (Perb. Rasul 16:11-40). Banci ikataken Paulus e me “Bapa Rohani” perpulungen, sebab ia si mabai perpulungen tek man Dibata i bas Yesus Kristus. Si peduaken, di antara kerina perpulungen kalak si tek si ilayani Paulus, Perp. Pilipi ngenca si secara konsisten mendukung pelayanen Paulus (Pil. 2:25; 4:15-18). Si peteluken, sanga Paulus lit i bas perbeben ras kiniseran i penjara, Perp. Pilipi si paling setia mendampingi ras nampati Paulus. Ketutusen i bas mendampingi Paulus e teridah arah iutusna Epafroditus guna nampati Paulus si lit i bas penjara (Pil. 2:25-30; 4:18). Si peempatken, relasi si terjalin antara Paulus ras Perp. Pilipi labo ipalasi alu kepentingen doni enda, tapi tuhu-tuhu ipalasi alu keleng ate Kristus si dem alu sukacita (Pil. 4:1). Alu bage Perp. Pilipi nggit iajari Kata Dibata, janah Paulus pe semangat guna ngajarisa.

Secara khusus si jadi ogenta sendah, ay. 14-16 e me pengakun Paulus kerna kiniulin Perp. Pilipi i bas hal mereken dukungen man Paulus i bas pelayanenna. Bahkan i bas kiniseran Paulus sekali pe, Perp. Pilipi setia mendukung Paulus. Ay. 17 e me kata pergegeh i bas Paulus nari maka Dibata si ersemulih i bas kerina bentuk dukungen si enggo isehken Perp. Pilipi man bana, janah labo sitik pe Paulus mengambil keuntungen arah penampat si isehken Perp. Pilipi man bana. Ay. 18 pe banci ikataken kata motivasi si ibereken man Perp. Pilipi maka kerina bentuk dukungen si enggo ibereken seri ras persembahen si merim si ngena ate Dibata. Antusenna, kerina bentuk dukungen si isehken alu tulus, dem alu sukacita, seri ertina ras ibadah yang sejati. Ay. 19 e me janji pasu-pasu i bas Dibata nari, maka kerina keperlun geluh Perp. Pilipi pasti icukupken Dibata. Ay. 20 e me doksologi (pujian kepada Allah), tek Paulus maka kerina si enggo ilakoken Perp. Pilipi tujunna guna kemulian gelar Dibata.

Pengkenaina

I bas PJJ-ta sendah radu ras kita isingetken mulihi kerna nampati suruh-suruhen Tuhan. Secara khusus si jadi suruh-suruhen i jenda e me Pengurus Perpulungen Jabu-jabu (PJJ). Perp. Pilipi tuhu-tuhu mereken teladan man banta kerna mereken dukungen si maksimal i bas kai pe si banci isehken sebage bentuk nyata dukungen guna pelayanen.

Si pentingna kel i jenda akap kami, si pemena, relasinta ras Dibata. Adi keleng ate Dibata enggo tuhu-tuhu sigejapken i bas geluhta, tentu enggo lanai mesera ngangkai erkeleng ate si iwujudnyataken alu bentuk dukungen guna kemajun pelayanen i bas Gerejanta. Si peduaken, bahanlah keleng ate Kristus jadi palas i bas kita nehken dukungen, alu bage, kai pe si isehken kita tujunna guna kemulian gelar Dibata. Si peteluken, Perp. Pilipi mereken teladan i bas mereken dukungen secara konsisten, i bas si kugana pe situasi ras kondisi Paulus. Ertina, iajuk kita guna mereken dukungen si konsisten, labo wari-warin rikutken perasaanta. Umpamana, adi la cocok siakap Pengurus PJJ-nta, enggo la nari nggit kita reh ku PJJ, apai ka mereken dukungen. Mari radu ras kita saling mendukung i bas pelayanen gelah arah dukungenta, gelar Dibata semakin termulia. Dibata si mpengasup kita kerina.