SUPLEMEN PA MAMRE GBKP TGL. 12 - 18 OKTOBER 2025

Pdt. Larena Sinuhadji (Nd. ReyRapha Tarigan)

Teks : 1 Petrus 3:7-10

Tema : NGANGKAI NDEHARA ALU PAYO

Tujun : Gelah Mamre :

1) Mehamat man ndehara ras nggejapken setara i lebe-lebe Dibata

2) Ngasup nggejapken kiniersadaan i bas pasu-pasu Dibata dingen ersada i bas toto

Penaruh

I bas kinitekenta, erpalasken Kej. 2:18-25 ras Mat. 19:5-6, tek kita maka Dibata si enggo mpersadaken dilaki ras diberu ku bas sada lembaga si igelari keluarga entah pe jabu. Alu bage perjabun labo terjeng iketen adat tapi lebih asa si e, perjabun kalak si tek e me iketen perjanjin antara perbulangen ras ndehara i lebe-lebe Dibata si enggo mpersadaken duana. I bas kesempaten enda, mulihi radu ras kita erlajar kerna perjabun kalak si tek, khususna i bas mengenal lebih dalam pasangenta.

Mpebagesi Teks

Surat 1 Petrus itujuken man kalak Kristen, si labo kalak Yahudi, si nggeluh i bas 5 propinsi kerajan Romawi, e me : Pontus, Galatia, Kapadokia, Asia Kitik ras Bitinia (Turki). Tujun surat enda e me mpegegehi ukur perpulungen, si sangana iayak-ayak dingen ngenanami kiniseran erkiteken kinitekenna man Yesus Kristus (1:5-9, 4:12-19). Kalak si tek paksa si e, tading i bas masyarakat si mbue denga nembah man dibata-dibata si deban, ras nggeluh alu cara si la mehuli (2:11-12, 3:13-17, 4:3-4). Si e kerina nai ilakoken kalak si tek, tapi erkiteken kinitekenna man Kristus maka perbahanen si bage enggo itadingkenna. Erkiteken gaya hidup si berbeda e maka mbue ialoken kalak si tek kiniseran. Surat enda itulis Petrus sekalak ajar-ajar Tuhan Yesus, ras isampati Silas i bas terjemahenna ku bahasa Yunani (5:12).

Ogenta sendah lit i teruh dua judul perikop “Ndehara ras Perbulangen” ay. 1-7 ras “Ngenanami kiniseran erkiteken perbahanen si mehuli” ay. 8-22. Secara garis besar perikop si pemena nuriken kerna hubungen ndehara ras perbulangenna. Lit pedah khusus nandangi ndehara, bage pe lit pedah khusus man perbulangen. Si jadi ogenta sendah, ay. 7, e me pengajuk man perbulangen gelah isedarina maka selaku kalak si lebih megegeh secara fisik, nggit nampati ndeharana alu dem pengertin. Selain si e, iajuk perbulangen gelah, selaku kalak si enggo ngaloken keselamaten i bas Dibata nari, nggit ia memperlakukan ndeharana alu mehamat. Alu bage kiniersadan si terjalin antara perbulangen ras ndehara alu sihamaten sada ras si deban, erbahanca la lit si ngolangi pertotonna man Tuhan.

Pedah-pedah Petrus i bas ay. 8-10 banci iantusi secara umum sebage pedah-pedah man kerina kalak si tek i tengah-tengah perpulungen. Banci ka iantusi sebage pedah-pedah khusus nandangi perbulangen ras ndehara i bas jabu-jabu kalak si tek. E me: sada penggejapen (seia sekata dan seperasaan), sikeleng-kelengen, mesayang, meteruk ukur (saling menyayangi, saling berbelaskasihan, bersikap rendah hati), membalas kejahaten alu pasu-pasu, la erbual bage pe la melasken si jahat. Alu bage perbulangen ras ndehara banci nggeluh cawir metua dingen senang.

Versi Audio silahkan klik : https://youtu.be/HLdzV1GfnWU

Pengkenaina

Tema ras tujun PA-ta sendah ngajuk kam kerina Mamre GBKP gelah nggit ngangkai ndehara alu payo, si secara konkrit, sue ras ogenta sendah, iwujudnyataken alu dem pengertin nandangi ndehara. Ertina, nggit kam kerina berusaha memahami ndehara alu mehuli. Ngehamati ndehara, ertina memperlakukan ndehara secara baik dan layak. Rikutken tujun si pemena nina, nggejapken kesetaraan i lebe-lebe Dibata. Enda akap kami lit kaitenna ras bentukan budaya si menganggap dilaki ganjangen asangken diberu.

Kai nari si harus ilakoken secara konkrit? Jelas ndai nina ogenta sendah: sada penggejapen (seia sekata dan seperasaan), sikeleng-kelengen, mesayang, meteruk ukur (saling menyayangi, saling berbelaskasihan, bersikap rendah hati), membalas kejahaten alu pasu-pasu, la erbual, bage pe la melasken si jahat. Gelah alu bage banci sigejapken pasu-pasu i bas Dibata nari erkiteken perbulangen ras ndehara nggeluh ersada, bagi nina tujun si peduaken i bas PA-ta sendah.

Si paling penting akap kami, pindolah gegeh i bas Dibata nari gelah ipengasup Dibata kam kerina Mamre kami, ngangkai ndehara alu payo, janah ipengasup Dibata kam kerina Mamre kami jadi imam si patut iteladani i tengah-tengah jabu-jabu kalak si tek i bas konteks GBKP.