SUPLEMEN PA MORIA GBKP TGL. 6 - 12 JULI 2025

Pdt. Larena Sinuhadji (Nd. ReyRapha Tarigan)

Radikalisme (Menganggap Diri Paling Benar - Selfies)

Si Man Ogen : Lukas 18:9-14

Tema : KAM KIN SI PAYONA?

Tujun : Gelah Moria :

- Nuriken ise kin kalak si payo erpalasken perumpamaan Yesus

- Ncidahken perbahanen si payo arah pengerana

Penaruh 

Rikutken informasi i bas AI nari, “Radikalisme merujuk pada paham atau sikap yang cenderung menginginkan perubahan mendasar dalam struktur sosial, politik atau ekonomi dengan cara yang ekstrem. Dalam konteks keagamaan, radikalisme sering kali melibatkan interpretasi yang sangat ketat atau ekstrem dari ajaran suatu agama, yang dapat mendorong individu atau kelompok untuk mengambil tindakan yang dianggap ekstrem atau kekerasan. Dalam banyak kasus, radikalisme dapat mengarah pada terorisme atau kekerasan dalam nama ideologi tertentu.” I bas bahan PA Moria sekali enda Moria GBKP ijemba guna tetap mengedepankan sikap meteruk ukur ras nggeluh i bas keleng ate Dibata.

Mpebagesi Si Man Ogen

Perikop si man ogenta sendah ibere judul “Perumpamaan kerna kalak Parisi ras pengalo cuke.” Ituriken maka ibahan Yesus sada perumpamaan i bas rangka mengkritik kalak si pebujur-bujur bana dingen erpengakap maka kalak si deban la lit ergana (ada beberapa orang yang menganggap dirinya benar dan memandang semua orang lain rendah). Kalak enda lupa maka status bangsa pilihen e erkiteken perkuah ate Tuhan labo erkiteken gegeh beluhna.

Ituriken maka nina Yesus lit dua kalak si lawes ku Rumah Pertoton guna ertoto. Kalak Parisi ras sekalak nari Pengalo Cuke. Reh kalak enda duana ku Rumah Pertoton alu pusuh ukur si berbeda. Kalak Parisi reh alu kiniganjangen ukur, benar akapna bana, janah Pengalo Cuke reh alu ukur meteruk sebab isedarina keberadaan dirina si la metunggung i adep-adepen Dibata.

Kalak Parisi tedis ras ertoto alu tujun gelah teridah kalak si nterem maka ia kalak si bujur. Ikatakenna i bas pertotonna, la ia merangap, la nipu, la erlua-lua bagi kalak si deban. Bahkan ibandingkenna dirina ras sekalak Pengalo Cuke, benaren akapna ia asangken Pengalo Cuke ndai. Sebab erpuasa ia dua kali seminggu, setia nehken persembahen persepuluhen. Kalak Parisi enda gagal memahami maka keselamaten labo tergantung ku bas perbahanen manusia tapi erkiteken perkuah ate Tuhan semata (bdk. Ep. 2:8-9).

Sebalikna Pengalo Cuke tedis ia ndauh-dauh nari dingen la pang ia nare ku langit, sebab isedarina dirina maka kalak perdosa ia seh maka la pang ia nare ku langit. Tentemina bana ncidahken penyesalen dirina kerna kai si sedakah enda ilakokenna. Bahkan kata-kata si ndarat i bas biberna hanya mindo perkuah ate Tuhan, sebab ia kalak perdosa.

Perumpamaan enda iujungi Yesus alu mereken pujin man Pengalo Cuke. Sebab iteh Dibata niat hati kerina kalak i bas ersembah man baNa. Arah darat nari teridah rohani, e lenga bo tentu ngena ate Dibata. Mulih kalak enda ku rumah janah Pengalo Cuke enda nge si ibenarken Dibata labo kalak Parisi. Emaka kai pe si ilakoken kita, sedarilah maka kerinana erkiteken perkuah ate Tuhan labo erkiteken kebeluhen ras kehebaten dirinta. Ula min lit sikap meganjang ukur, kita siakap si benarna ras kalak si deban sipekitik, sirendahken janah si lebih ekstrim lit tindaken kekerasen si ilakoken kita nandangi kalak si deban.

Versi Audio silahkan klik : https://youtu.be/r-A06zLXJXQ

Pengkenaina

Tema si seh man banta, “Kam kin si payona?” Merupaken sada refleksi man banta maka la lit ise pe kita si payo (si benar) tapi kita ibenarken Tuhan arah perkuah ateNa ngenca (bdk. Roma 3:12, “kerina manusia enggo nilah i bas Dibata nari; la lit ise pe si erbahan si mehuli sada pe lang”). Arah tema enda mabai kita tetap mpeteruk dirinta i lebe-lebe Dibata, mengintrospeksi diri guna lebih ndalanken si mehuli si ngena ate Dibata tanpa harus membanding-bandingken dirinta ras kalak si deban.

Rikutken tujun si pemena PA-nta maka enggo jelas kalak si payo erpalasken perumpaman Yesus e me Pengalo Cuke. Ras tujun si peduaken, ngasup kita ncidahken perbahanen si payo arah pengerana ras perbahanenta. Enggo jelas, perbahanen si payo e me perbahanen si mengedepanken sikap kekelengen, saling menghargai ras menghormati sada ras si debanna. Adi sikaitken ku bas radikalisme, bagi enggo ijelasken i bas bagin kata penaruh maka enda paham  si banci mengarah ku terorisme entah pe kekerasaen. Salah sada contoh, e me kai si pernah ilakoken kelompok intoleran si enggo ibubarken piga-piga waktu si lepas. Umpamana ngelakoken intimidasi man kalak si berbeda agama, menutup warung-warung sanga bulan tertentu, ngelakoken pengrusakan rumah ibadah agama si deban, ngelakoken demo anarkis, rsd.

Adi Moria GBKP enggo pasti labo lit pernah ilakokenna tindaken radikalisme, tapi sikap bagi si ibahan kalak Farisi banci jadi lit. Umpamana, pamer erta kebayaken (flexing), entah pe pamer pencapaian pribadi, mbiar kita talu ras kalak si deban emaka ngerana pe tual (sombong), sipekitik kalak si deban, la dewasa menerima perbedaan, bahkan menghakimi, maka kai si ilakoken kita payon asangken kalak si deban. Bahan PA-nta sendah mpersingeti kita maka labo kalak si secara ritual keagamaan ngenca badia, nutus, tapi kalak si meteruk ukur i lebe-lebe Dibata bage pe i lebe-lebe kalak si deban. Kalak si mampu menghargai ras menghormati kalak si deban. Tuhan-lah nampati kita ngasup tetap ndalanken si payo rikutken si ngena ateNa.