SUPLEMEN PA MORIA GBKP TGL. 27 JULI - 2 AGT. 2025

Pdt. Larena Sinuhadji (Nd. ReyRapha Tarigan)

Efek Perbedaan Negatif : Bullying, Penolakan, Pindah Agama, Pecah Jemaat, Penyimpangan

Si Man Ogen : Kejadin 37:5-11

Tema : CIAN ATE MPETURAH NEMBEH ATE

Tujun : Gelah Moria :

- Niksiki perbedaan Jusuf ras jabuna

- Ngasup erteman ras kalak si la seri ras ia

Metode : Challenge (posting fotondu ras kalak si sedekah enda la seri ras ia)

Penaruh

Salah sada dosa tertua e me cian ate (bdk. Kej. 4:5, “Asum ngenan ate Tuhan  persembahen Abil asangken Kain. E maka merawa Kain, emaka jutjut ayona perban nembeh atena. Seh kedungenna, lit turah si la mehuli i bas diri Kain, i ja ibunuhna seninana Abil”). Janah dosa cian ate pe, isingetken i bas 10 Hukum Tuhan, “Ola mengga atendu rumah kalak, ola mengga atendu ndeharana, budakna, lembuna, keledena, entah kai gia sikerajangenna” (Kel. 20:17). Cian ate banci turah erkiteken kurang kita memahami maka setiap kita unik (special) itepa Dibata. Maka setiap manusia lit kelebihan ras kekurangenna. Janah mekatep, la kita ngasup ngenehen kelebihen kalak si deban, mbiar kita tersaingi kalak si deban.

Mpebagesi Si Man Ogen

Bahan PA-nta i teruh judul “Jusuf ras seninana.” Jusuf e me sekalak anak Jakub arah ndeharana si Rahel si seh kel ngenana atena. Usia Jusuf ituriken enggo sepuluh pitu tahun, banci kataken, beranjak dewasa. Sada lebe sifat Jusuf si kurang baik, e me pengata-ngata. Ia ras senina-seninana, anak Bilha ras Silpa duana gundik bapana, ermakan biri biri. Janah kerina perbahanen seninana si la mehuli iturikenna man bapana. Si peduaken, ngenan ate Jakub man Jusuf asangken kerina anakna si deban, sebab Jusuf tubuh kenca ia enggo metua, janah Rahel e me ndehara si ikelengi Jakub lebihen asangken si debanna (Kej. 29:18). Melala perbahanen si khusus ilakoken man Jusuf asangken man senina-senina si deban. Salah sadana ibahanna baju jubah si mejile man Jusuf. E me dalan-dalanna nembeh kel ate senina-senina man bana ras ngerana pe lanai ia meriah.

Tambah ka ituriken Jusuf nipina man senina-seninana, si erbahanca ernembehna atena ngenehen Jusuf. Lit dua kali Jusuf ernipi. Sekali kerna berkisen gandum, i ja berkisen gandum senina-seninana ngkeleweti berkisen gandum Jusuf. Bahkan lit sekalak si ngerana i bas senina, “Entah akapndu kam raja janah kam si ngkuasai kami?” Dalanna ka, ernembehna ate senina-seninana man bana. Nipi si peduaken, idahna matawari, bulan ras sepuluh sada bintang mungkuk man Jusuf. Ras man bapana pe iturikenna. Sempat ipandang bapana Jusuf. Nina bapana, “Nipi kai kin e? Akapndu kin, nandendu, senina-seninandu ras aku reh mungkuk man bandu?” Cian ate senina-seninana kerina man Jusuf, tapi bapana rukur kerna si e kerina.

Adi siterusken kisah enda, maka ersura-sura senina-seninana munuh Jusuf (bdk. ay. 20), walaupe kedungenna, Jusuf idayaken ras ibaba ku Mesir.

Versi Audio silahkan klik : https://youtu.be/o7PgFUyBPHA

Pengkenaina

Tema si seh man banta eme “Cian ate mpeturah nembeh ate.” Tujun si pemena, gelah Moria ngasup niksiki perbedaan Jusuf ras jabuna. Situhuna, adi sigargari terdauhen, turah cian ate i bas diri senina-senina Jusuf tidak terlepas i bas peran bapana, si mbeda-bedaken i bas nehken kekelengen man Jusuf ras man anak-anakna si deban (senina-senina Jusuf). Janah hal enda pe, ipebelin alu kurang berhikmatna Jusuf nuriken kerina si ialamina man senina-senina. Termasuk nuriken perbahanen si la mehuli si ilakoken senina-seninana man bapana  (pengadu-ngadu). Sedangken Jusuf enggo banci ikataken mampu berpikir alu lebih bijaksana, sebab ia enggo berusia 17 tahun paksa si e. Ertina, cian ate si peturah nembeh ate senina-senina Jusuf erkiteken lit “pemicuna.”

Umumna, cian ate turah erkiteken la mampu kita menerima kelebihan kalak si deban. E maka selaku Moria si pentar ras nggeluh i bas Kata Dibata lit piga-piga hal si perlu sirenungken. Si pemena, harus lit kesadaren i bas dirinta maka kita itepa Dibata pelain-lain, unik, special, la lit kita si seri. Si peduaken, mampu melihat kekuatan (kelebihen) i bas dirinta si harus terus-menerus ikembangken. Umpamana i bas bidang akademik, seni, olah raga, termasuk beluh erbahan payet baju, beluh erdakan, rsd.-na. Si peteluken, i bas diri kalak pe lit kekuaten (kelebihenna) si banci kita erlajar i bas ia nari. Ula kita gengsi, tapi pebue biak pembelajar. Senang kita belajar i bas temanta nari. Janah adi temanta erlajar atena i bas kita nari pe, alu sukacita nggit kita ngajarisa (ula pelit ilmu). Alu bage, enggo banci kita sisampat-sampaten, saling melengkapi sada ras si debanna, selaku kula ni Kristus.

E maka i bas PA-ta sekali enda marilah kita ertekad, pedauhlah biak cian ate i bas kita nari. Sebab adi lalap siasuhi, merugiken dirinta sendiri. Enggo pasti, pusuhta katawari paksa ipenuhi alu hal si negatif guna bertindak si la mehuli man temanta ndai. Kita sendiri pe banci sakit, erkiteken lalap berpikir negatif.