SUPLEMEN PA MAMRE GBKP TGL. 6 - 12 JULI 2025

Pdt. Larena Sinuhadji (Nd. ReyRapha Tarigan)

Teks : Yosua 1:1-9

Tema : TETAP UKUR I BAS TUHAN

Tujun : Gelah Mamre :

1) Meteh Dibata mpetetap ukur Yosua

2) Tetap ukur i bas ndalani erbage-bage kecibal geluh

Penaruh

Tetap ukur i bas Kamus Karo Indonesia ertina: tabah, tidak gentar, tidak takut, tetap hati (pikiran). Mungkin banci ka iertiken “bimbang” entah pe “ragu” erkiteken mbuesa kekhawatiren. I bas kesempaten enda radu ras kita erlajar kerna ketetapen ukur rikutken pengalamen Yosua.

Mpebagesi Teks

Teks ogenta sendah lit i teruh judul perikop, “Perentah Dibata man Yosua lako naluken Kanaan.” Turi-turin enda akap kami enggo rusur sibegi entah pe sioge. Ituriken maka bangsa Israel lit i bas masa transisi kepemimpinen, Musa nari ku Yosua. Musa la banci bengket ku taneh Kanaan, e maka Yosua si sedekah e jadi pembantu Musa, mimpin bangsa Israel bengket ku Kanaan. Emaka kenca enggo mate Musa, isuruh Dibata Yosua guna mimpin bangsa e mengketi Kanaan. Perentah Dibata tangkas maka enggo ibereken Dibata kerina taneh i Kanaan, janah la lit ise pe si ngasup naluken Yosua erkiteken la ndigan pe itadingken Dibata Yosua. Tetap ikawali Dibata Yosua bagi Dibata enggo engkawali Musa.

Lit dua hal si jadi fokus i bas PA-ta sendah. Si pemena, lit telu kali kata-kata “tetap ukur ras tek” (ay. 6, 7, 9). Amin pe la ituriken uga respon Yosua nandangi perentah Dibata, tapi teridah secara tersirat maka lit kebiaren i bas diri Yosua, kuatir, bimbang dan ragu. Ngasup nge aku naluken bangsa Kanaan? Mungkin e nge si jadi kebiaren Yosua. Emaka ipetetap ukur Dibata Yosua seh makana la aru atena, la mbiar ia, tetap ukur, janah tek Yosua maka la lit ise pe si ngasup naluken adi Dibata ras ia. Adi sioge Kitab Yosua seh dung, terbukti maka janji Dibata e ya dan amin!

Si peduaken, adi sioge ay. 8, lit je perentah Dibata gelah terus ipelajari Yosua Kata Dibata suari ras berngi. Labo terjeng sipelajari tapi si pentingna e me patuh nandangi Kata Dibata gelah sangap ras seh sura-sura Yosua. Enda akap kami salah sada hal si penting si erbahanca Yosua tetap ukur i bas ndalanken kerina si iperentahken Dibata man bana selaku ia pemimpin paksa si e. Adi sioge Kitab Yosua seh dung, terbukti maka Yosua enda salah sada pemimpin si mehuli. Labo terjeng ngasup ia mimpin bangsa Israel, ngasup ka ia mimpin keluargana erkiniteken man Dibata.

Versi Audio silahkan klik : https://youtu.be/mZ0X5M9pzbU

Pengkenaina

PA-ta sendah ngajuk kita kerina, khususna kam kerina Mamre, gelah tetap ukur i bas Tuhan. Tetap ukur i bas Tuhan ertina, bagi pengalamen Yosua, yakin i bas menghadapi kai pe si terjadi i bas kegeluhen, sebab Dibata pasti mereken pergegeh, dame sejahtera bage pe kiniulin. Tetap ukur i bas Tuhan banci ka iantusi maka Dibata ngenca andalenta i bas ndalani erbage-bage kecibal geluh. Adi ngerana kita kerna janji Dibata, enggo lanai man sungkunen, sebab enggo melala bukti i bas pengalamen-pengalamen tokoh Alkitab, maka janji Tuhan itu ya dan amin! Adi sirenungken pe situhuna janji Dibata e enggo terbukti i bas pengalamen geluhta. Saja ngenca adi ngerana kita kerna kondisi manusia, apai ka dilaki, rusur sipake logikanta, siakap beluh kita ngalaken kerina perbeben geluh. Tapi kepeken situhuna la kita ngasup ngalaken perbeben geluh, seh makana melala kita si sakit stroke, jantung, tekanan darah tinggi, kelebihan kolestrol, rsd. Si e kerina akap kami salah sada penyebabna e me lit kebiaren, kekhawatiren si berlebihen, la tetap ukur i bas ndalani erbage-bage kecibal geluh si tep-tep wari. Emaka marilah kita ertekad guna tetap ukur i bas Tuhan.

Salah sada cara si banci erbahanca kita tetap ukur rikutken ogenta sendah e me nggit kita tutus erlajar Kata Dibata secara teratur. Labo terjeng nggit erlajar, tapi pe nggit kita patuh, entah pe nggit kita ngelakoken Kata Dibata i bas kegeluhenta si tep-tep wari. Alu bage Kata Dibata nggeluh i bas kita, ipengasup Kesah Si Badia kita guna tetap ukur i bas erkai pe, baik i tengah-tengah keluarga, i tengah-tengah pendahinta, i tengah-tengah masyarakat, bage pe i tengah-tengah Gerejanta. Kenca bage, tugasta e me mpetetap ukur senina turangta si butuh support, dukungen, entah pe penampat i bas ia ngadapi erbage-bage tantangen entah pe perbeben i bas kegeluhenna. Dibata si mpengasup kita kerina guna ngelakokenca.