SUPLEMEN PA MORIA GBKP TGL. 13 - 19 JULI 2025

Pdt. Larena Sinuhadji (Nd. ReyRapha Tarigan)

Kesetaraan Gender

Si Man Ogen : Joel 2:28-32

Tema : KESAH DIBATA MAN DILAKI RAS DIBERU

Tujun : Gelah Moria :

- Ngasup ngelayasi maka Dibata ncurcurken KesahNa man dilaki ras diberu

- Ndalanken kesetaraan gender i bas kerina dampar kegeluhen

Metode : Diskusi Kelompok

Penaruh

Sekalak penulis nuliskenca bagenda nina, “Gender adalah konstruksi sosial tentang perbedaan peran, kedudukan, serta kesempatan antara perempuan dan pria, dalam kehidupan keluarga atau masyarakat. Ataupun sifat yang melekat pada diri manusia, baik pria maupun perempuan, sebagai akibat dari konstruksi sosial yang dipengaruhi agama, budaya, etnis, serta politik” (“Diskriminasi Gender dalam Promosi Jabatan” by Mualimah & Yusuf). Pernyataan enda payo akap kami. Sebage contoh, peran orang tua i bas rumah tangga. Umumna, sipahami maka tugas diberu e me erdakan, ngurus anak ras ndahiken dahin rumah tangga. Sedangken dilaki sebage kepala keluarga, si erdahin ndarami nafkah. I bas perspektif gender, perihal tugas si idatas ndai situhuna banci ipertukarken. Diberu banci ndarami nafkah, erdahin i bas luar domestik nampati keluarga, ras dilaki pe banci ikut nampati pesikap jabu.

Rikutken kesaksian Pustaka Si Badia, maka Tuhan nepa dilaki ras diberu sentudu ras tempas Dibata. Ertina, dilaki ras diberu seri i lebe-lebe Dibata (la lit si ganjang teruken, bdk. Kej. 1:27). E maka, i bas bahan PA-nta sekali enda, mulihi kita ngenehen kai si icidahken Pustaka Si Badia maka dilaki ras diberu setara, si kehadirenna tetap banci saling melengkapi sada ras si debanna.

Mpebagesi Si Man Ogen

Bangsa Israel i bas jaman Yoel ngenanami kiniseran erkiteken serangen bala labang ras kelegon si luar biasa (Yoel 1:4). Bangsa e mengalami kelihen, ibadah ngadi ras la lit nari pengarapenna. I bas situasi si bage, nabi Yoel ndilo bangsa e guna bertobat, “Genduari jeralah kam, dahilah Aku alu erpuasa dingen tangis janah erceda ate. Bahanlah maka pusuhndu si getem ncidahken atendu ceda. Adi uisndu saja nge icaingkenndu la kap bias. Jeralah kempak Tuhan Dibatandu” (Yoel 2:12-17). Inubuatken Yoel, kenca bangsa e bertobat, maka ipekena Tuhan kondisi bangsa Israel seh maka mehumur ka ras ikuseken Tuhan kesahNa man kerina kalak. Secara teologis, kai si isuratken Yoel, ncidahken relasi antara pertobaten umat ras pemulihen si ibahan Dibata, bage pe semangat si peturah pengarapen kerna wari Tuhan si dem alu pasu-pasu labo penghukumen.

Secara khusus, piga-piga poin penting si banci siidah arah perikopta:

• Ku kuseken kesahKu man kerina kalak. Maka Dibata sendiri si berinisiatif  mencurahkan (nguseken) kesahNa. Kesah Si Badia ibereken erkiteken perkuah ate Tuhan labo erkiteken usaha manusia.
• KesahNa ibereken man kerina kalak, la erdobahen, dilaki - diberu, anak-anak - kalak dewasa, pertua-pertua, anak perana, bahkan man suruh-suruhen sekali pe. Jadi, la nari bage kebiasaan si sedekah enda ilakoken i bas Padan Si Ndekah, Kesah Tuhan ibereken man kalak tertentu saja, e me raja, imam ras nabi.
• Anak-anakndu si dilaki ras si diberu meritaken gelarKu. Ertina, Dibata make kerina generasi guna meritaken kabar baik (Berita Si Meriah). Kengasupen ernubuat labo saja man anak-anak dilaki tapi pe man diberu. Kai si inubuatken i jenda, mematahkan tradisi si sedekah enda enggo nggeluh i bas kalak Yahudi, maka dilaki ganjangen asangken diberu.
• Kesah Si Badia pe isehken man suruh-suruhen si dilaki ras diberu. Ncidahken maka seri i lebe-lebe Dibata kerina manusia, budak entah pe tuan. Kerina ngaloken Kesah i bas Dibata nari.
• Kai si enggo inubuatken Yoel tergenapi i bas wari Pentakosta, nusurna Kesah Si Badia man kerina ajar-ajar ras kalak si tek paksa si e (Perb. Rasul 2:1-12).
• Ras nubuaten Yoel enda iujungi, maka arus lit kerembaken manusia ras Dibata. Manusia arus tetap ernalem (bergantung) man Tuhan, sabab Dibata si erdolat penuh i bas kegeluhenta. Kerna kalak si mindo penampat man Tuhan nari terkelin kap.

Versi Audio silahkan klik : https://youtu.be/eokBNQmKpY0

Pengkenaina

Rikutken bahanta sekali enda, maka pengidahta enggo lebih terbuka sebab jelas Tuhan la mbeda-bedaken kerina manusia termasuk jenis kelaminna. Dilaki diberu, anak-anak entah kalak dewasa, tuan bage pe suruh-suruhen, kerina seri ergana i lebe-lebe Dibata, dingen ngaloken Kesah i bas Dibata nari. Alu bage rikutken tujun si pemena bahan PA enggo banci terjawab kita. Kerina Moria ngasup ngelayasi maka Dibata ncucurken KesahNa Si Badia man dilaki ras diberu.

Dingen tujun si peduaken, ngasup Moria ndalanken kesetaraan gender i bas kerina dampar kegeluhen. Tujun si peduaken enda akap kami si perlu irealisasiken i bas kegeluhenta, subuk i bas jabu, gereja, ras masyarakat. Piga-piga poin penting si perlu jadi perenungen rikut respon kenca kita er-PA:

1. Ngasup ngataken bujur man Tuhan ras ngergai Kesah Si Badia si enggo ibereken Tuhan man banta guna kita banci ndalanken sura-sura i bas kegeluhenta subuk sebage ndehara, nande, moria, bage pe peran si deban si idalanken kita. Caranta ngergai, enggo pasti alu kita bertanggung jawab ndalanken peranta masing-masing.
2. Ula kita erbahan perbahanen si la adil man diberu alu membenarken stereotype maka diberu lemah. Sebage contoh, khususna bas gerejanta. Walau pe radu ras sieteh kita enggo enterem Pendeta diberu i bas GBKP enda. Tapi asum lit percakapen kerna Mutasi Pendeta, lit pernyataan “kami la ngaloken Pendeta diberu.” Janah si mengherankan, pernyataan enda ipeseh Serayan si diberu ka. Situhuna, peseh saja i bas persidangen kai kebutuhen si niperluken Runggun e gelah banci ipenuhi Pendeta si reh. Labo nari soal dilaki entah diberu, tapi kebutuhen Runggun e. Umpamana, iarapken Pendeta si reh e beluh maba kendaraan, baik motor entah mobil. Entah pe, labo bergantung man ise pe, ngasup ia ngelakoken perkunjungen sekalak saja. Rsd.
3. Kesetaraan gender labo erbahanca turah keunggulan diberu dibanding dilaki entah pe sebalikna. Tapi dilaki ras diberu banci bekerja sama, saling melengkapi. Kesetaraan gender, ertina labo harus seri pendahinta subuk i tengah jabu entah pe i bas luar domestik. Tapi peran si idahiken alu dem keriahen, tanpa lit beban ras keterpaksaan. Dibata si mpengasup kita kerina.