SUPLEMEN PA MORIA GBKP TGL. 6 - 12 APRIL 2025

Pdt. Larena Sinuhadji (Nd. ReyRapha Tarigan)

HUT KAKR GBKP

Si Man Ogen : Johanes 15:11-17

Tema : ANAKKU TEMANKU

Tujun : Gelah Moria :

- Meteh relasi Yesus ras ajar-ajarNa

- Encidahken biak jadi teman man anak

Metode : Sharing & Games

Penaruh

Mungkin pernah sibegi istilah “bestie.” Bestie asal katana e me “best friend” entah pe sahabat. Adi i bas bahasa Karo nina “teman” entah pe “kandu-kandu.” Sahabat ertina teman dekat, lebih dekat dari hanya sekedar teman biasa. I bas bhs. Yunani lit kata “filia” si ertina cinta kasih persahabatan. Adi sitelusuri lit sekitar 83 kata “sahabat” i bas Alkitab Terjemahan Baru (TB-LAI), ertina hubungan persahabatan, karakter bersahabat, entah pe unsur-unsur persahabatan e me bagin si penting i bas Pustaka Si Badia. I bas kesempaten enda radu ras kita erlajar kerna karakter sahabat sue ras ogenta sendah. Bage pe radu ras kita erlajar kerna anakku temanku erpalasken Kata Dibata, i bas rangka mperingeti HUT KAKR GBKP si pe-135-ken.

Mpebagesi Teks

Teks ogenta sendah lit i teruh judul perikop “Yesus kap batang anggur si tuhu-tuhu,” i bas terj. TB-LAI “Pokok anggur yang benar.” Batang anggur entah pe pokok anggur eme anding-andingen erkiniteken si tuhu-tuhu man Dibata i bas Yesus Kristus. 

Versi Audio silahkan klik : https://youtu.be/p0Pac30Z5jU

Erpalasken Ese. 15:1-8; 19:10-14; Jes. 5:1-7; ras Mas. 80:9-17, perikop enda banci ikataken antitesis Israel sebage bangsa pilihen Dibata. Pedoman Penafsiran Alkitab Injil Yohanes i bas LAI nari ngatakenca, “Di dalam Yoh. 15:1 ini Yesus digambarkan sebagai pokok anggur yang benar dengan maksud untuk mempertentangkanNya dengan Israel. Israel telah ditanam Allah sebagai “pokok anggur yang benar,” namun yang merosot akhlaknya dan menjadi tidak berguna.” Ertina perikop enda secara garis besar ngatakenca, ula min bagi bangsa Israel si mengaku dirina bangsa pilihen Dibata tapi la ngasup ncibalken dirina sebage bangsa pilihen Dibata. Salah sada tandana bangsa pilihen Dibata e me erkeleng ate nandangi sesama manusia.

Lit dua kata kunci akap kami i bas ogenta sendah e me “kasih” ras “sahabat.” Perentah Yesus guna sikeleng-kelengen rikutken ogenta sendah lit i bas ay. 12 ras 17. I bas ay. 11, ikataken Yesus maka lit ulih si idatken kita adi ngikutken pedah-pedah Dibata khususna pedah guna sikeleng-kelengen, e me keriahen si tuhu-tuhu si rehna i bas Dibata nari. 

Lit telu ayat si ngerana kerna “sahabat” i bas ogenta sendah e me ay. 13, 14, ras 15. Ay. 15 rikutken Pedoman Penafsiran Alkitab Injil Yohanes i bas LAI nari, iterjemahken, “Aku tidak lagi menyebut kalian hamba/pelayan, sebab hamba/pelayan tidak tahu urusan tuannya. Kalian Kusebut sahabat, sebab semua yang Kudengar dari [Allah] BapaKu sudah Kusampaikan kepada kalian.” I bas ayat enda jelas, kerina kalak si enggo ngaloken keselamaten i bas Yesus Kristus arah kinitekenna, enggo iangkat derajatna i bas budak nari jadi sahabat. Kenangkihen pola relasi enda akap kami ndauh kel jarakna. I bas sekalak juak-juak entah pe budak nari nangkih jadi sahabat. Sekalak sahabat tentu itehna kel kai si jadi sura-sura sahabatna. Kita enda kerina sahabat Dibata, adi bage tentu enggo iteh kita kai si jadi sura-sura Dibata. Rikutken ogenta sendah, kai saja si jadi sura-sura Dibata?

I bas ay. 14 ikataken, nina, “Kam teman-temanKu adi idalankenndu kai si Kupedahken man bandu.” I bas terj. Pedoman Penafsiran Alkitab Injil Yohanes LAI nari nina, “Kalau kalian melakukan apa yang Kuperintahkan kepadamu, maka kalian sahabat-sahabatKu.” Sebage sahabat-sahabat Dibata, kita iajuk gelah ndalanken, ngelakoken, melakukan, kerina si jadi sura-sura Dibata.

I bas ay. 13 ikataken, nina, “Labo lit keleng ate si belinen asangken keleng ate kalak si nggit ngasamken kesahna guna teman-temanna.” I bas terj. Pedoman Penafsiran LAI nari nina, “Jika seseorang mati demi sahabat-sahabatnya, itu menunjukkan bahwa ia begitu mengasihi mereka sehingga kasihnya itu sudah tidak lagi dapat lebih besar dari itu.” Enda encidahkenca keleng ate Kristus si mate i kayu persilang guna kerina kita si ikelengiNa. Tapi i bas sisi si deban, ayat enda encidahkenca pengorbanen si meganjangna kel si banci ilakoken sekalak sahabat nari guna sahabat-sahabatna. Ertina sebage sahabat-sahabat Dibata, iajuk kita kerina gelah rela entah pe nggit erkorban kai pe sebage resiko ngelakoken kerina si jadi sura-sura Dibata. Khususna i bas kita engkelengi kalak si deban si labo sahabatta bahkan kalak si jahat perbahanenna man banta.

Kai ulihna adi kita nggit jadi sahabat-sahabat Dibata, si nggit erkorban janah ngelakoken pedah-pedahNa? Yesus i bas ay. 16 ngatakenca, “Kai pe ipindondu i bas gelarKu ibereken Bapa e nge man bandu.” Kita enggo ipilih Dibata guna jadi sahabat-sahabatna emaka sipergunakenlah kesempatan si lit guna erkorban ras ngelakoken pedah-pedahNa.

Pengkenaina

Tema bage pe tujun i bas PA-ta sendah, mulihi ngingetken kita kerina Moria kerna pendampingan man anak-anakta. Mendampingi anak-anak i bas masa-masa pertumbuhenna seh kel pentingna khususna i bas jaman genduari enda. Lit kuan-kuan si ngatakenca, “Guru pertama dan terakhir seorang anak adalah orang tuanya. Sekolah pertama dan terakhir seorang anak adalah keluarga.” Kuan-kuan enda encidahkenca maka tanggung jawab pendidikan si mbelinna lit i bas kita orang tua, labo man guru-guru i sekolah, dosen-dosen i universitas, entah pe guru-guru Sekolah Minggu. Tanggung jawab pendidikan man anak-anakta lit i bas kita orang tuana. Janah kuan-kuan ndai pe encidahkenca maka tanggung jawabta selaku orang tua si la lit batasna. Enggo pe kerina anak-anakta mandiri, enggo enterem kempunta, tapi tugasta guna mendidik, nehken pedah-pedah, mereken motivasi, mpegegehi, notoken, mereken teladan, harus terus silakoken.

Kata Dibata si man ogenta sendah, ngajuk kita kerina Moria gelah jadi teman entah sahabat nandangi anak-anakta. Usihlah Yesus si jadi teman entah pe sahabat si tuhu-tuhu nandangi ajar-ajarNa, bage pe kerina kalak si tek man baNa. Sahabat si tuhu-tuhu ersukuten man Dibata, ipakena kepentaren Dibata i bas ia menjalin relasi ras kalak si deban, khususna ras anak-anakta. Ertina, pindolah gegeh man Dibata i bas kita mendidik anak-anakta. Sipakelah Kata Dibata jadi palas i bas kita mendampingi anak-anakta. Gelah alu bage iusihna ka kita, anak-anakta jadi anak-anak si ersukuten man Dibata, si ipergunakenna kepentaren Dibata i bas ia bergaul, bersosialisasi, ras i bas ia meraih cita-citana.

Sikataken bujur man Dibata, erkiteken i bas tahun enda Kategorial KAKR (Kebaktian Anak Kebaktian Remaja), si mewadahi pembinaan iman man anak ras remaja, enggo berusia 135 tahun (18 April 2025). Usia si enggo ndauh senior, lebihen asangken kategorial si deban. Arapenna tentuna, ise pe kita si jadi pengurus kategorial enda, pusat nari seh ku runggun-runggun, tuhu-tuhu ersukuten man Dibata, ipakena kepentaren Dibata i bas ndalanken tugas tanggung jawab pelayanen man anak ras remaja sebelang-belang GBKP, gelah Kategorial KAKR i bas kerina tingkatenna, tuhu-tuhu ikut muat bagin i bas menciptakan generasi muda kristiani yang mengasihi Tuhan, menghormati orang tua, berprestasi, tangguh, dan jadi pasu-pasu man sekelewetna. Mari terus sidukung pelayanen KAKR GBKP i bas kerina tingkatenna, mari sisehken dukungenta alu pertotonta, dukungen dana, ras kai pe si banci sisehken kita. Selamat HUT KAKR si pe-135 tahun-ken, Dibata si masu-masu anak-anak ras remaja-remaja GBKP.