SUPLEMEN PA MAMRE GBKP TGL. 6 - 12 APRIL 2025

Pdt. Larena Sinuhadji (Nd. ReyRapha Tarigan)

 

Teks : Kuan-kuanen 16:31-32

Tema : MALEM ATE PUDI METUA

Tujun : Gelah Mamre :

1) Meteh maka lit ulih kalak bujur i bas adepen Dibata

2) Tetap nggeluh i bas kebujuren dingen mehamat man orang tua (Saitun)

 

Penaruh

 

Lit kuan-kuan si ngatakenca “Waktu tidak bisa diputar kembali,” ertina kerina si enggo terjadi i bas waktu si enggo lepas lanai banci siulihi. Emaka simanfaatkenlah waktu si lit guna kiniulin gelah ula sempat turah penyesalen pudi wari sanga kita enggo metua, enggo lanai lit gegeh, rsd.-na. I bas PA-ta sendah radu ras kita erlajar i bas Kitab Kuan-kuanen nari kerna kepentaren Dibata gelah ula sempat turah penyesalen i bas kegeluhenta. Janah PA-ta sendah i bas rangka mperingeti HUT Kategorial Saitun.

 

Mpebagesi Teks

 

Kitab Kuan-kuanen ibenaken alu pokok bahasen si ncidahken tujun pengajaren  kitab enda (bindu 1). Janah jelas, kitab enda membimbing si ngogesa gelah nggeluh i bas kepentaren, disiplin, erpemeteh ras nggeluh i bas kebujuren. Nggeluh alu pentar entah berhikmat lit kurang lebih 41 kali muncul, si ertina, penting kel nggeluh alu pentar. Mbiar (erkemalangen) man Dibata e me tema si dominan i bas kitab Kuan-kuanen, janah e nge syarat utama kalak ndatken kepentaren. Mbiar i jenda ertina sikap hormat, mehamat, menundukkan diri i bas kedaulaten Tuhan ras taat nandangi perentah-perentah Dibata. Tuhan me ulu kepentaren. Emaka ise si kekurangen kepentaren reh dingen pindolah man Tuhan.

 

Versi Audio silahkan klik : https://youtu.be/IX7vPacnAoI

Bindu 16 ngajarken kerna erbage-bage kepentaren man si ngogesa. Lit piga-piga hal si jadi fokus i bas bindu 16. Si pemena, ngingetkenca man si ngogesa maka meteruk ukur ras mbiar man Dibata harus jadi palas i bas kai pe si irencanaken bage pe si iputuskenna. Si peduaken, ngajuk si ngogesa gelah memperjuangken kebenaren, keadilen, ras kepentaren Dibata i bas kegeluhenna si tep-tep wari. Si peteluken, ngingetkenca man si ngogesa maka Dibata si nentuken kai pe si terjadi i bas kegeluhen manusia. Emaka si harus ilakoken e me demi pusuh perukuren alu kepentaren ras kejujuren, sebab si e nge si ngena ate Dibata janah mabai ku kegeluhen. Si peempatken, ngingetken man si ngogesa maka doni enda dem alu kejahaten, kiniganjangen ukur, bage pe perubaten. Emaka i bas si e iajuk gelah fokus ndarami kepentaren entah pe pengertin i bas Dibata nari, sebab ergan kepentaren Dibata asangken erta kebayaken doni enda.

 

Secara khusus si jadi fokus teks ogenta sendah e me ay. 31 ras 32. Ay. 31 nina, “Ulih kalak bujur e me kap cawir metua; uban desken mahkota si meherga kap.” I bas terj. TB-LAI Ed. II nina, “Rambut putih adalah mahkota yang indah, yang didapat di jalan kebenaran.” I bas terj. BIMK nina, “Orang jujur akan dianugerahi umur panjang; ubannya bagaikan mahkota yang gemilang.” Antusenna jelas maka si niarapken Dibata e me kalak si erkemalangen man Dibata kitik-kitik nari seh ku masa tuana. Uban labo terjeng tanda enggo metua, tapi uban e me sada bukti maka enggo idalankenna si benar, si ngena ate Dibata, segedang geluhna. Umur si gedang e me anugerah si ibereken Dibata man kalak si erkiniteken sebab e me sada kesempaten si meherga guna terus nggeluh erkemalangen man Dibata janah sada kesempaten si meherga guna terus jadi pasu-pasu man sekelewetna.

 

Ay. 32 nina, “Madin jadi kalak saber asangken erkuasa, ngkuasai diri ulin asangken naluken melala kota.” I bas terj. TB-LAI Ed. II nina, “Orang yang sabar melebihi seorang pejuang, orang yang menguasai dirinya melebihi orang-orang yang merebut kota.” I bas terj. BIMK nina, “Tidak cepat marah lebih baik daripada mempunyai kuasa; menguasai diri lebih baik daripada menaklukkan kota.” Antusenna jelas maka si niarapken Dibata e me kalak si tek si ngasup engkuasai dirina entah pe mengendalikan diri. Saber ate entah pe kesabaren e me salah sada hal si harus lit i bas engkuasai diri. Adi sioge Gal. 5:22-23, kesabaren ras ngasup engkuasai diri e me ulih Kesah Si Badia, ertina dua hal enda penting i bas kegeluhenta si tep-tep wari.

 

Pengkenaina

 

Tema bage pe tujun PA-ta sendah ngajuk kita, khususna kam kerina Mamre, gelah nggeluh erkemalangen man Dibata, si secara konkrit iwujudnyataken alu ndalanken si benar, entah pe si bujur, sabar, janah ngasup engkuasai diri. Tujunna tentuna labo terjeng gelah cawir metua, tapi si pentingna, em tandana maka kam kerina enggo nggeluh i bas keselamaten. Tapi nggeluh erkemalangen man Dibata tentu labo murah, melala tantangenna. Emaka i bas si e pindolah kepentaren i bas Dibata nari gelah ipengaspuna kita nggeluh erkemalangen man Dibata.

 

PA-ta sendah i bas rangka mperingeti HUT Kategorial Saitun si pe-10tahun-ken (20 April 2025). Pelayanen i bas Gereja nai-nai nari seh asa gundari bersifat holistik, baik pelayanen si sifatna rohani bage pe jasmani. Pelayanen lintas generasi, benaken anak tubuh nari seh ku lansia, rikut kalak mate. Pelayanen lintas profesi, la lit ibeda-bedaken, kerina jemaat alu erbage-bage pendahin, entah pe jabaten, datken pelayanen si seri. Pelayanen man kerina keluarga, baik si kuh denga bage pe si la kuh. Bage pe pelayanen man kerina pelayan, baik serayan Tuhan, pengurus PJJ, kategorial, bage pe pelayan-pelayan KAKR, kerinana datken pelayanen si seri. Puji Tuhan, GBKP enggo ngelakoken pelayanen lintas generasi alu ilitkenna Kategorial Saitun guna memaksimalkan pelayanen man orang tuanta si enggo lansia.

 

Selamat ulang tahun ninta man Kategorial Saitun, sitotoken gelah semakin meningkat kuantitas bage pe kualitas pelayanenna. Adi rikutken teks ogenta sendah, mbera-mbera kerina Saitun GBKP enggo idalankenna si benar, si ngena ate Dibata, segedang geluhna. Bicara lenga pe, marilah sipergunaken waktu si lit guna nggeluh erkemalangen man Dibata, jadi pasu-pasu nandangi keluarga, anak, kempu, bage pe kalak si deban, i japa pe Saitun tading. Mari sidukung arah pertotonta, dana, alu kai pe si lit i bas kita gelah program-program Saitun i bas Runggun masing-masing banci erdalan alu mehuli. Dibata si masu-masu Saitun GBKP.