SUPLEMEN PJJ GBKP TGL. 13 - 19 APRIL 2025

Pdt. Larena Sinuhadji (Nd. ReyRapha Tarigan)

ITAMBAHI ALU BIAK SI MEHULI - Pilipi 1:9-11

(HUT Persekutuan Kategorial)

Penaruh

Kerina kita akap kami ngerayaken wari ketubuhen setiap tahun. I bas kita ngerayaken wari ketubuhen e, biasana siendeken lagu “Panjang umurnya” si intina, erpengarapen kita gelah itambahi Dibata umurta. Arapenta tentu labo terjeng gelah ibereken Dibata umur si gedang, tapi pe reh dewasana kita i bas kai-kai pe, sukses i bas pendahin, keluarga, sehat selalu, jadi pasu-pasu man kalak si deban, rsd.-na. Bagem rusur sipindoken man Dibata arah pertotonta sanga kita mperingeti hari ulang tahun.  

I bas bulan enda radu ras kita mperingeti sehna Berita Si Meriah ku tengah-tengah masyarakat Karo 135 tahun si lepas. Janah sekaligus siperingeti HUT Kategorial KAKR GBKP. Puji Tuhan erkiteken i bas GBKP enggo ibahan Persekutuan-persekutuan Kategorial si tujunna gelah reh tambahna kualitas erkiniteken man Dibata i bas Yesus Kristus. I bas kesempaten enda radu ras kita erlajar arah Paulus nari i ja iingetna kiniulin si enggo ialokenna arah Perp. Pilipi, janah itotokenna perpulungen e gelah datken kerina si mehuli si rehna i bas Dibata nari.  

Mpebagesi Ogen

Surat man Perp. Pilipi itulisken Paulus asum ia lit i bas penjara Roma. Amin pe itulis i bas penjara nari, tapi la tergejap suasana perbeben Paulus si mberat, justru sebalikna, surat enda itulis Paulus dem alu sukacita. Adi sidarami i bas surat enda, lit 12 kali Paulus nuliskenca kata “sukacita.” Engkai maka bage? Si pemena erkiteken persadan Paulus si luar biasa ras Tuhan. Si peduaken erkiteken kedekatan hubungan antara Paulus ras Perp. Pilipi, sebab Perp. Pilipi, Paulus si mantekisa (Kis. 16). Janah rikutken ay. 7, banci ikataken Perp. Pilipi e me perpulungen si paling setia mendukung pelayanen Paulus, baik dalam suka mapun duka.

I bas bindu sada si jadi ogenta sendah, Paulus ertoto nandangi perpulungen, erkiteken keleng ate perpulungen man bana si luar biasa. Paulus ertoto gelah: si pemena, ertambahna keleng ate perpulungen. Tentu Paulus pe ngarapkenca maka keleng ate si enggo igejapkenna arah perpulungen nari e igejapken kalak si deban. Keleng ate Kristus harus terus iberitaken man kerina kalak. Emaka ertoto Paulus gelah ertambahna keleng ate Kristus i tengah-tengah perpulungen gelah banci siterusken ku kalak si deban si lit i sekelewetna.

Si peduaken, ertambahna pengangkan ras pemeteh si tuhu-tuhu. I bas terj. TB-LAI nina, “Semoga kasihmu makin melimpah dalam pengetahuan yang benar dan dalam segala macam pengertian.” Ertina, kekelengen banci ertambah-tambah adi pemeteh ras pengertin kerna Dibata pe ertambah. Pemeteh ras pengertin si payo kerna Kristus mabai kita erlumba nehken kekelengen. Sebab Kristus me ulu kekelengen.

Si peteluken, alu ertambahna pemeteh ras pengertin erbahanca perpulungen ngasup milih si mehulina i bas kegeluhenna, sebab palasna kepentaren si rehna i bas Dibata nari. Bena-bena kepentaren e me erkemalangen man Dibata. Tambah pemeteh ras pengertin kerna Dibata enda penting sebab pengaruh lingkungen paksa si e banci mabai perpulungen ku bas hal-hal si la mehuli.

Versi Audio silahkan klik : https://youtu.be/v93AFIauHao

Pengkenaina

Kai saja si banci iteladani arah ogenta sendah? Si pemena, erlajar kita arah relasi si mehuli si terjalin antara Paulus ras Perp. Pilipi. Lit suasana si dem alu sukacita, saling peduli, sitatang-tatangen, sikeleng-kelengen, saling mendukung, saling menguatkan, saling notoken sada ras si debanna. Memang guna menjalin relasi si bage ulinna labo gampang. Tapi tek kita adi nggit kita iajari Kata Dibata maka suasana si bage rupana banci siwujudken i bas perpulungenta masing-masing. Ertina gelah banci ertambah karakter si mehuli i bas dirinta, harus nggit kita iajari Kata Dibata. 

Si peduaken, erlajar kita arah pertoton Paulus nandangi Perp. Pilipi. Kai si ipindo Paulus i bas pertotonna labo hal-hal si sifatna materi duniawi. Memang materi duniawi labo salah adi sipindo arah pertotonta. Tapi iteh Paulus kai si pentingna, si jadi prioritas man kalak si tek, e me keleng ate, pemeteh si tuhu-tuhu, ras pengertin si serta. Alu keleng ate, pemeteh si tuhu-tuhu ras pengerti si serta kerna Dibata si terus bertambah, erbahanca kalak si tek megegeh menghadapi erbage-bage tantangen i bas kegeluhenna.

Si peteluken, bagi si enggo isingetken i datas, PJJ-ta sendah i bas rangka HUT Persekutuan Kategorial GBKP. Amin pe kita enggo masuk ku bas persekutuan kategorial si berbeda, tapi iarapken gelah kita pe saling mediate sada ras si debanna. Ula sempat terjadi ego kategorial i bas persadanta. Umpamana, erkiteken KAKR isina anak-anak denga, maka pelayanen pe labo maksimal silaksanaken erkiteken la lit dukungen arah kategorial si deban. Kegiaten-kegiaten lintas kategorial mehuli ada ilitken gelah terjalin relasi si mehuli di antara persekutuan kategorial. Umpamana kegiaten MORIMARTA: Moria, Mamre, ras PERMATA. Si pentingna kel, marilah kita saling notoken, janah pindolah i bas pertotonta gelah ertambahna keleng ate, pemeteh si tuhu-tuhu, ras pengertin si serta. Dibata si mpengasup kita guna ndalankenca.