SUPLEMEN PJJ GBKP TGL. 6 - 12 APRIL 2025

Pdt. Larena Sinuhadji (Nd. ReyRapha Tarigan)

NGGELUH TAMA PUJIN MAN KEMULIAN DIBATA - Epesus 1:7-12

(Rangkaian Paskah)

Penaruh

La tergejap kentisik nari radu ras kita merayakan rangkaian Paskah tahun 2025. Rikutken Liturgi i bas Gerejanta, rangkaian Paskah ibenaken alu Minggu-minggu Passion, i ja radu ras kita nggejapken pengalamen-pengalamen Tuhanta Yesus Kristus sope IA bengket ku bas kiniseran. Umpamana, Minggu Passion pe-7-ken, si igelari Minggu Palmarum (Lambe), i ja ibabana kita nginget Tuhan Yesus si bengket ku Yerusalem alu ngersak kelde, tandana maka kerehenNa maba dame. Kenca bage bengket kita ku Kamis Badia, i ja radu ras kita nginget perjamuan terakhir Tuhan Yesus ras ajar-ajarNa, iburihi Tuhan Yesus ka nahe ajar-ajarNa. I bas Jumat Si Mbelin radu ras kita mperingeti kematen Yesus Kristus i kayu persilang, kenca leben inanamiNa kiniseran si mesangat. Sabtu Pengarapen, mabai kita ngerenungken erti keleng ate Dibata arah kematen Yesus Kristus. Janah i bas Minggu Paskah, radu ras kita ngerayaken kekeken Yesus i bas kematen nari. Kuasa dosa enggo italuken. IsehkenNa man banta keselamaten, bage pe ipekena-kenaNa mulihi bagi tangtangna itepa Dibata.

I bas PJJ sendah radu ras kita nikapken pusuh ukurta guna merayakan rangkaian Paskah 2025 erpalasken Kata Dibata si man ogenta.     

Mpebagesi Ogen

Ogenta sendah lit i teruh judul perikop “Pemasu-masun Dibata arah Yesus Kristus.” I bas terj. TB-LAI nina, “Kekayaan orang-orang terpilih.” I bas terj. BIMK nina, “Berkat rohani dengan perantaraan Kristus.” Perikop enda termasuk ku bas salam pembukaan surat Rasul Paulus man perpulungen kalak si tek i kota Epesus si isina “doxologia” entah pe puji-pujin man Dibata erkiteken perbahanen-perbahanenNa si luar biasa i bas diri Yesus Kristus. Rikutken AI nari, doksologi adalah doa atau himne yang memuji dan memuliakan Tuhan. Arah judul-judul perikop ndai tersirat maka perbahanen-perbahanen Dibata si luar biasa i bas Yesus Kristus e me jadi pasu-pasu, jadi kekayaan, bage pe jadi berkat rohani man kerina kalak si tek man Dibata i bas Yesus Kristus.

I bas doksologi enda teridah pengakun kiniteken Paulus kerna perbahanen-perbahanen Dibata Bapa si luar biasa si jadi pasu-pasu, kekayaan, ras berkat rohani ndai. Rikutken ogenta sendah, benaken ay. 7 & 8, isaksiken Paulus maka arah kematen Yesus Kristus i kayu persilang, kita enggo itebus Dibata, janah dosa-dosanta enggo ialemi Dibata. Si e kerina banci jadi erkiteken perkuah ate Dibata si mbelin, si dem alu kepentaren ras pengertin. Ay. 9 - 11, arah kerehen Kristus ku tengah-tengah doni enda, ipetangkas Dibata sura-suraNa. E me mpersadaken kerina si nasa lit, subuk i surga bage pe i doni, i bas Kristus, janah Kristus si jadi kepalana. Si e kerina enggo irencanaken Dibata gelah kerina kalak si tek man baNa dat bagin i bas kai si enggo jadi sikerajangen Kristus.

Ay. 12 e me si jadi tema i bas PJJ-ta sendah, nina, “Janah gelah kita, kalak si pemena erpengarapen man Kristus, nggeluh tama pujin man kemulian Dibata.” I bas terj. TB-LAI Ed. II, nina, “Supaya kami, yang sebelumnya telah menaruh harapan pada Kristus, boleh menjadi puji-pujian bagi kemuliaanNya.” I bas ter. BIMK nina, “Biarlah kita, yang pertama-tama berharap pada Kristus, memuji Allah karena keagunganNya.” I bas telu terjemahen enda, lit telu antusenna akap kami. Si pemena, arah kerina perbahanen Dibata si mbelin, erkelangken Yesus Kristus, patut kita muji-muji Dibata. Puji-pujin man Dibata banci isehken kita arah ende-enden pujin si ipenangkih kita. Bage pe puji-pujin si ibelasken kita setiap saat, sebage respon positif i bas kai pe si terjadi i tengah-tengah kegeluhenta si tep-tep wari. Si peduaken, kai pe si iukurken, ibelasken, bage pe ilakoken kita, tujunna hanya untuk kemulian Dibata, Soli Deo Gloria. Si peteluken, kerina pengkebet geluhta tuhu-tuhu jadi kesaksin man sekelewetta kerna keleng ate Dibata i bas Yesus Kristus.

Versi Audio silahkan klik : https://youtu.be/lH-S-cvrAzE

Pengkenaina

Bagi si enggo tersinget i bas bagin penaruh i datas, PJJ-ta sendah i bas rangka persikapenta menyambut rangkaian Paskah i bas tahun enda. Situhuna arah Minggu-minggu Passion enggo kita isingetken gelah ersikap guna menyambut puncak rangkaian Paskah si kentisik nari sirayaken. Kai si banci jadi pesan rikutken bahan kotbahta, secara khusus i bas kita merayakan Paskah tahun enda?

Si pemena, geluhta tama pujin man Tuhan Dibata. Uga kin geluh tama pujin man Tuhan Dibata? Kita si enggo ngaloken keterkelinen i bas Dibata nari rutang pusuhta guna ngelakoken perbahanen-perbahanen si mehuli (bdk. Ep. 2:10). Bage pe kita idilo gelah ula nari nggeluh i bas kegeluhen si male, si ngikutken kerincuhen dagingna tapi kita idilo gelah tetap makeken manusia si mbaru si teridah i bas kebujuren, keleng ate, perbahanen si mehuli si ngena ate Dibata, rsd. Siusahaken arah kerina pengkebet geluhta, subuk arah perukuren, pengerana, ras perbahanenta tetap kita mpermuliaken Tuhan. Bahkan geluhta si singkat harus jadi pasu-pasu (berkat) man kalak si deban arah kita tetap nehken kekelengen man sekelewetta.

Si peduaken, si mehulina, Paskah tahun enda, ula lit kita sitading-tading, muat baginlah kita i bas erbage-bage rangkaian Paskah si enggo irencanaken i bas runggunta masing-masing.

Si peteluken, berita Paskah, berita kekeken Tuhan Yesus i bas si mate nari, harus jadi berita si mereken keriahen si tuhu-tuhu man banta. Sebab labo hanya dosanta ialemiNa, tapi jaminen keselamaten, kegeluhen si rasa lalap, jadi sikerajangenta. I doni enda pe malem ateta, amin sekali mbue erbage tantangen, tapi tek kita ngasup kita ngalakenca, erkiteken Kristus si mereken kemenangen man banta. Bage pe kenca kita lawes nandingken doni enda, malem kel ateta, sebab enggo isikapkenNa Kinirajan Surga man banta kalak si tek man baNa. Tetaplah sipindo gegeh i bas Dibata nari lako kita setia nggeluh tama pujin man Dibata katawari paksa pe.