SUPLEMEN PA MAMRE GBKP TGL. 27 APRIL - 3 MEI 2025

Pdt. Larena Sinuhadji (Nd. ReyRapha Tarigan)

Teks : Masmur 18:47-50

Tema : ENDEKENLAH ENDE-ENDEN PUJIN MAN BANA

Tujun : Gelah Mamre :

1) Meteh maka Dibata saja man pujin, janah pujilah IA arah ende-endenta

2) Tetap muji gelar Tuhan dingen ncidahkennca arah kesaksin geluhna

Penaruh

Rikutken informasi i bas AI nari, ikataken nina, “Bernyanyi memiliki banyak manfaat kesehatan, baik fisik maupun mental, seperti: Meningkatkan kesehatan paru-paru. Meningkatkan daya ingat. Menurunkan stress. Meningkatkan kesehatan mental. Meningkatkan rasa percaya diri. Membantu mengatasi demensia. Membantu mengatasi rasa sakit. Membantu mengatasi kesepian. Membantu memperkuat hubungan dengan orang lain dengan bernyanyi bersama.” Ertina alu rende kai saja pe, enggo erbahanca kita sehat, apai ka adi si iendeken e ende-enden pujin man Dibata.

Versi Audio Silahkan Klik : https://youtu.be/dfF61A-Hg_U

Mpebagesi Teks

Teks ogenta sendah e me ende-enden pujin Daud man Dibata erkiteken enggo iselamatken Dibata ia i bas musuh-musuhna nari, khususna i bas ancamen Saul nari. I bas ende-enden enda icidahken Daud keleng atena nandangi Dibata si jadi gegehna, benteng si nteguh, bage pe penyelamatna. I bas ende-enden enda icidahken Daud kuasa Dibata si luar biasa i bas naluken musuh-musuhna janah mereken kemenangen man Daud. Ngataken bujur Daud man Dibata erkiteken kesetian Dibata i bas mereken perlindungen man kalak si erpengendes man baNa. Irakut Daud i bas bindu enda maka Dibata ngenca si ngasup mereken keselamaten bage pe keleng ateNa si tuhu-tuhu man Daud bage pe kesusurenna.

I bas konteks peribadahan bangsa Israel, ende-endeh pujin Daud enda rusur iendeken guna mpegegehi kiniteken, ras membangkitkan optimisme, erkiteken tek bangsa e maka Dibata si enggo mereken keselamaten ras kemenangen man Daud, pasti mereken keselamaten ras kemenangen i bas erbage-bage perbeben kegeluhen. I bas ay. 47 iajuk pe bangsa Israel guna meritaken kemulian Dibata. Ertina, labo terjeng menikmati keselamaten ras kemenangen, lit tanggung jawab si deban guna ngataken bujur man Dibata janah meritaken kemulianNa.

Pengkenaina

I bas kesempaten enda radu ras kita kerina, khususna kam Mamre kami, gelah rende muji Dibata. Palasna jelas maka erkiteken Dibata enggo mereken keselamaten man banta, maka kita pe patut muji gelarNa si badia. Keselamaten si enggo ialoken kita e labo terjeng kenca mate bengket ku surga, tapi genduari pe keselamaten e enggo sigejapken. Sikap pendahinta, sikap keluarganta, cukup ekonominta, aman ras dame sekelewet, enterem kade-kadenta, rsd.-na., si e kerina bentuk konkrit keselamaten si banci sigejapken kita i bas geluhta si tep-tep wari. Adi tuhu-tuhu siinget pasu-pasu Dibata i bas kegeluhenta, enggo pasti la terhitung. Emaka lanai lit alasen i bas dirinta la muji gelar Dibata.

Adi enggo siteh manfaat rende untuk kesehaten fisik ras psikis, bagi si enggo isingetken i datas, benakenlah rende secara pribadi, i bas kai pe si idahiken kita. Sinen inganna, adi bas kantor tentu la palah siban megang soranta. Cukup alu bersenandung. I bas si e kita enggo muji gelar Dibata i bas pendahinta. Arah ende-enden puji si ipenangkih kita, reh deherna kita ras Dibata, janah secara tanpa isedari, enggo ka kita erlajar kerna Kata Dibata arah ende-endenta. Man bandu Mamre si kisat denga rende, benakenlah rende muji Dibata janah gejapkenlah manfaatna.

Adi siperdiateken i bas konteks Gerejanta, teremen denga Moria si lit vocal group-na, kelompok koor-na, vocal solo, rsd.-na. Adi Moria biasana konsisten berlatih ras konsisten mpersembahken puji-pujin i bas kebaktin-kebaktin. Emaka i bas si e, man bandu Mamre, marilah sibentuk kelompok rende si secara konsisten berlatih ras mpersembahken puji-pujin i bas kebaktin-kebaktin. Man bandu si enggo ngelakokenca, sitingkatken keterampilan guna rende arah pelatihan-pelatihan, rsd.-na. Dibata si masu-masu kam kerina arah ende-enden pujin si ipenangkihndu guna kemulian gelar Dibata.