SUPLEMEN PA MORIA GBKP TGL. 13 - 19 APRIL 2025

Pdt. Larena Sinuhadji (Nd. ReyRapha Tarigan)

Sidang Majelis Sinode (SMS)

Si Man Ogen : 1 Korinti 3:5-9

Tema : ARON SI MUAT BAGIN

Tujun : Gelah Moria :

- Meteh potensi si pelain-lain i bas Apolos ras Paulus guna ndahiken dahin Dibata

- Muat bagin i bas mensukseskan Sidang Sinode alu dana, toto, ras ketutusen i bas persidangan

Metode : Aksi

Penaruh

Makna kata “aron” rikutken Kamus Karo - Indonesia (Darwin Prinst) e me ikatan kerja sama untuk mengerjakan sesuatu. Kata “aron” enda i bas konteks perkembangen GBKP enggo jadi sada kata si penting guna menerjemahken “kawan sekerja.” Aron Dibata ertina “Kawan sekerja Allah.” I bas kesempaten enda radu ras kita erlajar kerna aron si muat bagin i bas dahin-dahin pelayanen erpalasken si man ogenta sendah. Bage pe i bas rangka mendukung suksesna Sidang Majelis Sinode si bakal ilakoken i bas Tgl. 23 - 30 April 2025.

Mpebagesi Si Man Ogen

Si man ogenta nuriken kerna kerja sama saling mendukung i bas pelayanen antara Paulus ras Apolos rikutken pemere (karunia) si ibereken Dibata. Apolos (Apolonius) e me sekalak Yahudi i Aleksandria nari, ia sekalak guru si beluh ras mehuli ngajarken kerna Yesus Kristus i teruh bimbingen Priskila ras Akwila (Perb. Rasul 18:24-28). Pelayanenna i Korinti cukup berhasil erkiteken kebeluhenna ngajar ras erkhotbah. Tapi erkiteken lenga dewasa i bas erkiniteken (ay. 1-4), maka lit piga-piga perpulungen si erpengakap Apolos lebihen asangken Paulus, maka turah pengelompoken-pengelompoken, lit ibahan perpulungen e kelompok Paulus, kelompok Apolos, kelompok Kefas, ras golongen Kristus (1 Kor. 1:12). Padahal situhuna Paulus ras Apolos, termasuk Kefas (Simon Petrus), saling bekerja sama alu mehuli i bas dahih-dahin pelayanen i tengah-tengah Perp. Korinti (1 Kor. 3:4-6).

Alu litna pengelompoken enda ndai tentu mengganggu efektifitas pelayanen erkiteken dekahen sician-cianen, ras rubati sada ras si debanna, asangken semakin meningkatken kualitas ras kuantitas pelayanen. Paulus tegas ngatakenca, ise kin Paulus, ise kin Apolos? Maka duana kalak enda pelayan Dibata kap, si negu-negu perpulungen gelah nggeluh erkiniteken. Tuhan nge si mereken kengasupen lako banci melayani. Duana kalak enda saling melengkapi i bas pelayanenna. Paulus nuansa, Apolos niramsa ras Dibata si erbahanca turah. Si nuansa ras si niramsa labo penting, tapi Dibata nge si pentingna kel i je, sebab Dibata nge si peturahsa. Si niramsa ras si nuansa sada aron kap, kawan sekerja Allah. Ertina, sama-sama ibereken Dibata kepercayaan guna erdahin ras mpekena-kena juma Dibata.

Paulus ngingetkenca maka Dibata i bas Yesus Kristus harus jadi palas i bas pelayanen, sebab Dibata ngenca si erbahanca turah kerina si mehuli guna pembangunen kula ni Kristus. Janah Dibata si harus termulia arah kerina pelayanen si idahiken i bas Perp. Korinti, labo Paulus entah pe Apolos. Ate Rasul Paulus tentuna gelah reh dewasana kiniteken Perp. Korinti ras banci iusih perpulungen e kerja sama si mehuli antara Paulus, Apolos, ras si debanna i bas pelayanen erpalasken kiniersadan ras Yesus Kristus.

Versi Audio silahkan klik : https://youtu.be/QKtXJdbQlcM

Pengkenaina

Sada pengungkunen man banta, lit kin aron si la muat bagin makana ibahan tema “Aron si muat bagin?” Jawabenna tentu lit. I bas kerja bakti sajalah umpamana, adi siperdiateken, lit si erdahin, lit si dahinna ngobrol, lit si dahinna mentas-mentas saja gelah idah kalak, lit si sinik saja jadi penonton, si parahna enggo pe jadi penonton, mandangi ka ia. Ertina secara positif tema i bas PA-ta sendah ngingetkenca maka kita kerina, ise pe kita, pendeta, pertua, diaken, pengurus, entah pe anggota jemaat biasa, adi enggo masuk ku bas persadan kalak si tek, igelari aron Dibata, entah pe kawan sekerja Allah. Kerinana harus ikut muat bagin i bas dahin-dahin pelayanen. Melala dahin si banci ilakoken kita i bas pelayanen i Gereja, si paling sederhana sajalah umpamana 3S: senyum - salam - sapa, jadi si ngalo-ngalo perpulungen, jadi kolektan, notokenca, rsd. Ertina la lit alasen i bas kita guna sinik saja la ateta ikut muat bagin i bas dahin-dahin pelayanen. Dibata enggo mereken man banta kerina, talenta, karunia-karunia, entah pe kebeluhen-kebeluhen i bas bidang tertentu, guna membangun kula ni Kristus. Emaka marilah sipakeken guna memuliaken gelar Dibata.

Paulus, Apolos, Kefas, bage pe Perp. Korinti, mereken teladan si mehuli man banta kerna saling mendukung sada ras si debanna, saling bekerja sama ras sama-sama bekerja. La lit ise pe si merasa lebih penting, lebih tinggi jabatenna, lebih beluh, lebih megegeh, lebih bayak, lebih berpengaruh, lebih berjasa, rsd.-na. Kerinana erdahin alu palas keleng ate Kristus. Nggit kerinana erkorban bagi Kristus si enggo ngorbanken diriNa guna kiniulin kalak si tek man banNa. Janah kerina si idahikenna e semata-mata guna kemulian gelar Dibata labo guna kepentingen dirina entah pe kelompokna.

Puji Tuhan ninta man Dibata erkiteken untuk kesekian kalinya GBKP akan melaksanakan Sidang Majelis Sinode (SMS), si irencanakan ilakoken i bas Tgl. 23 - 29 April 2025 i Retreat Center Sukamakmur. Man banta si ikut muat bagin secara langsung i bas SMS enda, si jadi utusen, marilah sipakeken kesempaten enda alu mehuli. Gundari nari enggo ersikap, baik persiapan fisik, psikis, mental, guna ngikuti kerina kegiaten si lit i bas SMS enda alu mehuli. La lit ise pe kita si la tutus ngikuti proses persidangen enda seh dung. Man banta si la ikut i bas kegiaten enda, labo berarti la lit si banci silakoken guna ikut muat bagin mendukung kesuksesen SMS sekali enda. Umpamana, dukungen dana, nehken kata-kata semangat, rsd.na. Emaka marilah sibaba SMS enda ku bas topik doanta, sipindo man Dibata gelah proses persidangen enda banci erdalan alu mehuli, turah keputusen-keputusen si membangun kiniteken guna kemulian gelar Dibata, terpilih pengurus Moderamen si tuhu-tuhu nggit erkorban guna kemulian gelar Dibata. Dibata si masu-masu kita kerina.