SUPLEMEN PJJ GBKP TGL. 27 APRIL - 3 MEI 2025

Pdt. Larena Sinuhadji (Nd. ReyRapha Tarigan)

GUNA DAME KITA IPILIH DIBATA - Kolose 3:12-15

(Sasaran Pelayanan GBKP 2025 Poin IV: Tidak ada perpecahan Jemaat karena konflik)

Penaruh

Adi siperdiateken keadaan doni enda, banci ikataken ndauh denga i bas suasana dame. Enterem denga negara entah pe daerah si erperang mperebutken erta, kinibayaken, kekuasaan, kepentingen pihak tertentu, ras si debanna. I bas keluarganta pe lit denga si berkonflik erkiteken erbage-bage sebab. I bas lingkungen masyarakat pe enterem denga si rubati sada ras si debanna. Janah i bas Gereja sekali pe si notabene lembaga religius si mempromosiken perdamen, enterem denga terjadi konflik. Adi sidarami i bas Google, ikataken bagenda nina, “Perdamaian itu mahal, artinya mencapai perdamaian membutuhkan pengorbanan yang besar. Perdamaian yang mahal juga bisa diartikan sebagai perlunya kesadaran untuk menghargai perbedaan dan bekerja sama untuk menciptakan perdamaian. Ertina guna mewujudken perdamen e labo murah, kerina pihak harus nggit erkorban bage pe nggit bekerja sama.

I bas kesempaten enda radu ras mulihi kita erlajar kerna dame Kristus si lit i bas kita, si harus iwujudnyataken i bas kegeluhenta si tep-tep wari, i japa pe kita ringan.

Versi Audio Silahkan Klik : https://youtu.be/9_F0QbCs5CA

Mpebagesi Ogen

Ogenta sendah lit i teruh judul perikop “Kegeluhen si male ras kegeluhen si mbaru.” I bas terj. TB-LAI nina, “Manusia baru.” Arah judul perikop enda jelas maka Rasul Paulus ngajuk perpulungen kalak si tek i Kolose gelah nggeluh i bas kegeluhen si mbaru, sebab kerina kalak si tek man Kristus enggo jadi manusia si mbaru, si enggo ngaloken keleng ate Dibata janah enggo ipilih jadi sikerajangenNa. Kerina biak-biak si male, si dem alu kejahaten entah pe dosa, harus siambekken, janah siganti alu paken si mbaru e me biak-biak Kristus. Biak-biak si male, entah pe lagu langkah si la mehuli, jelas i jenda itulisken Paulus, e me: erlua-lua, erlagu la mehuli, peraten daging, sura-sura si jahat, rangap, merawa, ngamuk, segat ate, cikurak entah pe melasken cakap melket, perbual, pergelut, kitik ukur entah pe menaruh dendam.

Sedangken paken si mbaru entah pe biak-biak Kristus e me: ate perkuah, mehuli, rukur meteruk, lemah lembut, sabar, sialemen salah, sikeleng-kelengen sebab keleng ate mpersadaken kerinana alu serta. Selanjutna e me, lit dame Kristus, lit kesadaren guna ngataken bujur man Dibata, Kata Kristus nggeluh i bas dirina, lit kininggiten guna siajar-ajaren alu kepentaren Dibata, dem alu puji-pujin man Dibata arah ende-enden pujin bage pe ende-enden pertendin. Si e kerina lit i bas proses si terus-menerus ku kesempurnaan. Sebab i bas ay. 10 ikataken Paulus, nina, “Kam genduari manusia si mbaru si tetap iperbarui Dibata si njadiken kam rikutken tempasNa jine. Tujunna e me gelah itandaindu alu serta Dibata.” I bas terj. BIMK nina, “Kalian adalah manusia baru, yang sedang diperbarui terus-menerus oleh Penciptanya, yaitu Allah, menurut rupaNya sendiri. Maksudnya ialah supaya kalian mengenal Allah dengan sempuna.” Ertina jadi manusia si mbaru e labo terjadi secara instan, tapi alu proses si terus-menerus seh ku kesempurnaan.

Secara khusus si jadi fokusta sendah, rikutken tema, e me kerna dame, entah pe erbahan perdamen. Kita ipilih Dibata guna mewujudkan perdamaian i japa pe kita ringan. Ayat si ngerana kerna perdamen i bas ogenta sendah lit i bas ay. 15, bagenda nina: “Dame si ibereken Kristus i bas pusuhndu min si ngajari kam i bas erbahan keputusen-keputusenndu. Sebab guna dame kam ipilih Dibata jadi sada kula. Emaka ngataken bujurlah.” I bas terj. TB-LAI nina, “Hendaklah damai sejahtera Kristus memerintah dalam hatimu, karena untuk itulah kamu telah dipanggil menjadi satu tubuh. Dan bersyukurlah.” Sada hal si penting i jenda e me kalimat “Dame si ibereken Kristus,” entah pe “damai sejahtera Kristus.” Ertina, dame si tuhu-tuhu rehna i bas Dibata nari, labo i bas doni enda nari. Rikutken Yoh. 14:27; 16:33, dame Kristus labo seri ras dame si rehna i bas doni enda. Dame Kristus erbahanca hubungenta ras Dibata jadi mehuli. Emaka kerina kalak si tek enggo ipersadaken ras Dibata. Labo terjeng ras Dibata, dame Kristus pe erbahanca hubungenta ras sesama manusia jadi mehuli. Emaka lit kiniersadan kalak si tek i bas kula ni Kristus. Dame Kristus erbahanca kalak si tek megenggeng ngalaken erbage-bage kiniseran erkiteken kinitekenna. Dame Kristus erbahanca kalak si tek ngasup ngataken bujur i bas kerina keadaan.

Pengkenaina

Ogen, tema bage pe sub-tema i bas PJJ-ta sendah, mulihi ngingetkenca maka kerina kalak si tek enggo ngaloken dame i bas Kristus nari. I bas si e marilah sigejapken dame Kristus e i bas dirinta masing-masing. Adi enggo tuhu-tuhu sigejapken dame Kristus e, tentu kita pe ipengasup Kesah Si Badia guna banci berdamai dengan diri sendiri. Adi enggo kita ngasup berdamai dengan diri sendiri, selanjutna, erdame ras keluarganta. Konflik i bas keluarga e me hal si biasa ras la banci sibeneken. Sebab la lit kita si sempurna. I bas sada paksa kita pe ngalakoken kesalahen si erbahanca turah konflik i tengah-tengah keluarga. Tapi adi enggo lit dame Kristus, labo mesera guna ndungi konflik alu mehuli. Dame Kristus mpengasup kita menyadari kesalahan dan meminta maaf. Bage pe sebalikna, dame Kristus mpengasup kita mengampuni orang lain, bagi si rusur ibelasken kita i bas Pertoton Tuhan.

Adi enggo terbiasa kita ndungi konflik alu mehuli i bas keluarganta, maka labo mesera i bas kita erbahan perdamen i tengah-tengah persadan kalak si tek entah pe Gereja Tuhan. Ertina potensi terjadinya perpecahan karena konflik di tengah-tengah Jemaat e banci siminimalisir bahkan sibeneken. Perdamen i jenda tentuna labo perdamen si semu, si i darat nari teridah kompak, tapi situhuna i bas dem alu kebencian ras dendam. I bas konteks Gerejanta me rusur terjadi si bage rupana. Perdamen si semu erkiteken konflik la idungi alu mehuli. Memang lit konflik si la banci pedas idungi. Bahkan lit konflik si la terdungi erkiteken lit pihak si la nggit erdame. Tetapi paling tidak Gereja secara kelembagaan harus berani mengambil sikap dengan cara berpihak kepada yang benar erpalasken Kata Dibata apapun resikonya.

Adi lit konflik si la terdungi i bas konteks Gerejanta em tandana erkuasa denga biak-biak si male. Adi nggeluh denga biak-biak si male, ertina, lenga tuhu-tuhu sigejapken dame Kristus i bas dirinta. I bas si e marilah sipekena geluh kinitekenta alu menjalin relasi si mehuli ras Dibata, tutus ertoto setiap wari, tutus ngoge entah pe mbegiken Kata Dibata setiap wari, ndarami circle pergaulan si sehat ras kalak si tutus erkiniteken, rsd.-na. Alu bage dame Kristus tuhu-tuhu nggeluh i bas dirinta. Pindolah gegeh i bas Kesah Si Badia nari gelah ipengasupNa kita maba dame Kristus i japa pe kita ringan.