SUPLEMEN PJJ GBKP TGL. 7 - 13 APRIL 2024

Pdt. Larena br. Sinuhadji (Nd. ReyRapha Tarigan)

TETAP ERDALAN I BAS DALAN SI PINTER

Heber 12:12-15 (Menegakkan Keadilan, Kebenaran)

Penaruh

Adi sibaba mobilta ku bas dalan si pinter, mulus, bebas hambaten, jalan tol, maun-maun erbahanca kita terlena, kurang waspada, sibaba mobilta meter-meter, piah dungna mobilta enggo lanai terkendali, terjadi ka tabrak belakang mobil kalak si deban, bahkan banci terjadi kecelakaan si lebih parah erkiteken pengendara si deban pe ugal-ugalan. Tapi adi sibaba mobilta ku bas dalan si ceda, melala je lobangna, entah pe melala polisi tidurna, justru erbahanca kita hati-hati, fokus, manjar-anjar sibaba mobilta, bage ka pe pengendara si deban, ibabana kendaraanna alu hati-hati, emaka kerinana selamat amin pe lambat.

I bas PJJ sendah erlajar kita kerna erdalan i bas dalan si pinter. Dalan si pinter i jenda tentu labo seri ras jalan tol ndai. Dalan si pinter i jenda ikaitken ras kinitekenta man Dibata i bas Yesus Kristus. 

Mpebagesi Ogen

Surat Heber itulisken alu tujun mpegegehi perpulungen kalak si tek, bangsa Yahudi si berbahasa Yunani, si merap marpar i belang-belang doni paksa si e, janah sangana ngenanami kiniseran si mesangat. Kiniseran si mesangat e teridah i bas bindu 10:32-34 i ja perpulungen enda igombangi dingen isakiti i lebe-lebe jelma si nterem, erta-ertana keri irampasi kalak. Erkiteken situasi si bagenda rupana, labo sitik perpulungen si itadingkenna kinitekenna (murtad) janah itadingkenna kiniersadaanna ras kalak si tek. Ogenta sendah lit i teruh judul perikop “Pedah dingen pertenget,” i bas terj. BIMK nina, “Petunjuk dan peringatan.” Sedangken i bas Alkitab TB-LAI ay. 1-17 ibere judul “Nasihat supaya bertekun dalam iman.” Judul i bas Alkitab TB-LAI nari akap kami lebih sue ras latar belakang situasi si ialami perpulungen paksa si e.

Ay. 12 e me kutipen i bas Yes. 35:3 nari e me pengajuk, motivasi man perpulungen gelah tetap semangat, megegeh i bas ndalani kegeluhen. Ay. 13 e me kutipen i bas Kuan. 4:26 nari, si memotivasi perpulungen gelah tetap erdalan i bas dalan si benar (jalan Tuhan) gelah aminna pe lit kekoten i bas ndalani dalan si pinter e, isalihken Dibata jadi gegeh si mbaru (dipulihkan). Duana ayat kutipen i bas Padan Si Ndekah nari sengaja isingetken Penulis Surat Heber man perpulungen, gelah perpulungen nginget janah tek maka Dibata si pernah nampati bangsa Israel ndube, gundari pe pasti nampati perpulungen i bas kiniseran si ialamina. Janah dua ayat kutipen enda banci iertiken gelah perpulungen si megegeh mpegegehi si kurang megegeh kinitekenna, mereken semangat man si enggo kote kinitekenna, janah mabai si enggo bene kinitekenna mulihken ku Tuhan.

Ay. 14, “meriahlah ras ise pe”, i bas terj. TB-LAI nina, “berusahalah hidup damai dengan semua orang,” i bas terj. BIMK nina, “berusahalah untuk hidup rukun dengan semua orang.” Ayat enda ikaitken ras “nggeluh bagi si ngena ate Tuhan,” i bas bhs. Ind. nina, “kejarlah kekudusan,” terj. BIMK nina, “berusahalah juga untuk hidup suci”), iumputi alu kalimat “sabab adi la bage ise pe labo banci ngidah Tuhan”, i bas terj. bhs. Ind. nina, “sebab tanpa kekudusan tidak seorangpun akan melihat Tuhan” (terj. BIMK, “sebab tidak seorang pun dapat melihat Tuhan kalau ia tidak hidup seperti itu”). Kedamen ras kekudusen e me tanda-tandana Dibata erdahin i tengah-tengah perpulungen, janah e me tanda-tandana kalak si erkiniteken man Dibata, sebab lit kedamen ras kekudusen i bas dirina. Kedamen ras kekudusen e me bagin si la terpisahken i bas proses segedang geluh erkiniteken man Dibata. Emaka perpulungen iajuk gelah erpala-pala (berusaha) erbahan suasana si dem alu kedamen ras kekudusen, ibenaken i bas dirina sendiri, terus ku tengah-tengah perpulungen, bage pe ku tengah-tengah masyarakat si lenga itandaina Yesus Kristus, gelah kerina jelma banci ngenanami keleng ate Kristus.

Ay. 15-17 e me pengajuk man perpulungen gelah nggeluh sitatang-tatangen, sikeleng-kelengen, siergan, sihamat-hamaten, simaaf-maafen, nggeluh ersada sada ras si debanna, gelah la lit ise pe si jadi batu antuken si erbahanca ceda pusuh perukuren anggota perpulungen (bhs. Ind., “akar pahit”, “racun”, “toxic”) apai ka seh nadingken kinitekenna man Yesus Kristus.

Versi Audio silahkan klik : https://youtu.be/SlMR1HmUL4w

Pengkenaina

Lit pernyataan si ngatakenca bagenda, “Salah satu tanda bahwa anda telah berjalan di jalan yang benar adalah, akan ada banyak tantangan yang harus dihadapi karena lingkungan sekitar kita tidak terbiasa hidup dengan kebenaran.” Lit perpayona akap kami pernyataan enda. Melala contoh kerna si e, umpamana, sekalak pegawai si ikucilken teman-temanna sada dahin erkiteken la ia nggit erbual ras korupsi i bas kantorna. Sekalak anak si la itemani teman-temanna sada kelas erkiteken la ia nggit nyontek sanga ujian. Sekalak perbinaga la isenangi teman-temanna erkiteken la nggit ia nipu alu mpergunaken sibar-sibar timbangen. Ras melala denga contoh si deban. Rikutken tema i bas PJJ-ta sendah, si jadi penekanen i bas ogenta akap kami lit i bas ay. 13. Emaka i bas PJJ-ta sendah iajuk kita gelah tetap nggeluh sue ras peraten Dibata amin pe melala tantangen si man alanken. Tapi teklah kita maka Dibata mereken gegeh si mbaru i bas kita ngalaken erbage-bage tantangen erkiteken ndalanken si benar sue ras peraten Dibata.

PJJ-ta sendah ikaitken ras salah sada Misi GBKP. Rikutken Buku GBP-ta, misi si peduaken e me “Menegakkan keadilan, perdamaian dan keutuhan ciptaan.” Mungkin ikut ka je “kebenaran.” Menegakkan keadilan, perdamaian, kebenaran, keutuhan ciptaan akap kami e me bentuk konkrit i bas kita tetap erdalan i bas dalan si pinter.

Kerna perdamen, lit kuan-kuan si ngatakenca Peace is not something you wish for. Peace is something you make, something you do, something you are, something you give away (Damai itu bukan sesuatu yang hanya kita harapkan bakal terjadi dengan sendirinya, damai itu harus kita ciptakan, damai itu harus kita lakukan, damai itu adalah kita, dan damai itu harus kita bagikan kepada orang lain”). Kuan-kuan enda lit perpayona sebab Dibata i bas Yesus Kristus enggo ncidahken teladan man banta i bas proaktif menciptakan perdamaian. Memang melala tantangen i bas kita nggeluh erdame ras kalak si deban, sebab perdamen e seri ras kekelengen, la banci bertepuk sebelah tangan. Melala pengalamen i bas geluhta maka geluh erdame e tidak gayung bersambut ras kalak si deban sebab melala denga kalak si ikuasai egoisme, dendam, akar pahit, rsd. I bas si e tentu labo ngasup kita menciptakan perdamaian i japa pe kita ringan. Emaka pindolah gegeh i bas Dibata nari gelah ipengasupNa kita nggeluh erdame ras kalak si deban. 

Keadilan ras kebenaran akap kami saling berkaiten sada ras si debanna. Sebab arah pajekna kebenaran, keadilen banci sigejapken. Yesus i bas geluhNa i tengah bangsa Israel berjuang majekken kebenaran ras keadilan alu pemberlakuan hukum kasih. Kekelengen man Dibata bage pe kekelengen man sesama manusia. Kekelengen i jenda labo seri ras pembiaran entah pe permisif nandangi kinilaadilen ras kinilabenaren. Sebab i bas kekelengen lit ketegasan menolak ketidakbenaran ras ketidakadilan alu cara-cara tanpa kekerasan. Yesus ngenanami kiniseran erkiteken perjuangenna menegakkan keadilan ras kebenaran. Kita pe labo ngasup alu gegehta mperjuangken keadilen ras kebenaren, emaka pindolah gegeh i bas Dibata nari gelah ipengasupNa kita menegakken keadilen ras kebenaren i japa pe kita ringan. Kerna keutuhan ciptaan, dua tahun si lepas (2022), GBKP enggo mencanangkan tahun pelayanan “Kreatif merawat lingkungan,” enda akap kami harus terus silakoken sebage bentuk konkrit menegakkan keutuhan ciptaan.

Si terakhir, kai si banci silakoken i bas rangka menegakkan keadilan ras kebenaran? Secara Sinodal akap kami, GBKP harus pang mengambil sikap erpalasken kinitekenna man Kristus erkaiten ras isu-isu sosial ras politik si terjadi i bas skala nasional bage pe internasional alu secara kritis menyuarakan suara keadilan ras kebenaran arah demonstrasi damai, publikasi i bas media-media sosial, rsd. Sikap kritis enda banci siterusken ku Klasis-klasis ras Runggun-runggun. Secara pribadi iajuk kita gelah peduli ras pang kita menyuarakan suara kebenaran ras keadilan i japa pe kita ringan. Pindolah gegeh i bas Dibata nari gelah ipengasupNa kita ngelakokenca.