PJJ GBKP Tgl. 1 - 7 Maret 2020

PJJ GBKP TGL. 1 - 7 MARET 2020

Pdt. Larena Sinuhadji (Nd. Rey Rapha Tarigan)

Tema : ERSADALAH UKURNDU (Roma 15:5-6)

Musyawarah Warga Sidi Runggun

Melala peribahasa entah pepatah si memotiviasi kita gelah nggeluh i bas kiniersadan: “bersatu kita teguh bercerai kita runtuh”, bagi kiniersadan sapu purih, rsd.  Ertina, mbue kel tuhu manfaatna ‘di kenca banci kita ersada arih, ersada ukur. Sada lebe, kiniersadan ukur mereken semangat, keriahen ukur i bas kita banci ndahiken dahinta. Si peduaken, dahin e banci pedas dung dingen maksimal ka asilna ‘di kenca ersada arihta ndahikenca. Si peteluken, waktu lebih efisien sipake, seh dungna dahin si deban banci ka sidahiken. Maka penting kel kiniersadan e tetap ipelihara ras ijaga.

I tengah-tengah perpulungen Roma i ja Paulus nehken suratna maka i je pe Paulus menekanken gelah tetap banci ersada ukur, sabab enggo pasti mbue erbagena i bas perpulungen. Subuk kalak Yahudi bage pe non-Yahudi, berpendidiken ras si kurang berpendidiken, tingkat ekonomi, karunia si pelain-lain, rsd. Emaka i bas bagin si deban suratna (Korinti), Paulus pe make gambaren kula, i ja melala ring-ringna tapi sada kula nge. Kalak Yahudi enggo pe Kristen tetap denga terbaba-baba kerna undang-undang agamana ndube si cukup mbue ras menuntut kalak gelah bali ras ia (soal sunat, pangan, wari Sabat, rsd.). Sedangken kalak Yunani entah pe si non-Yahudi nggeluh rikutken kebebasen si enggo ibereken Kristus. Tapi tetap i bas kebebasen si ertanggung jawab.

Kata kunci si ibereken Paulus e me ula egois, ula dirinta ngenca siukuri, tapi siperdiateken rikutken kebutuhen ras kondisi kalak si deban si lit i sekelewetta (ay. 1). Emaka kalak si megegeh kinitekenna arus nampati kalak si merampek kinitekenna. Intina, kalak si enggo megegeh kinitekenna, maka bas ia lit sikap peduli man kalak si deban, mampu berempati, meteruk ukur, mampu bekerja sama ras kalak si deban, la memaksaken kehendak, rsd. Arah nggeluh ersada ukur, nggit kita peduli man kalak si deban, secara khusus man kalak si merampek kinitekenna gelah reh paguhna kinitekenna, alu ersada sora banci sipuji Bapa Tuhanta Yesus Kristus.

Kristus Yesus tetap jadi usihen i bas kita banci nggeluh ersada ukur amin mbue erbagena i bas kegeluhenta perpulungen. I ja Kristus Yesus ngaloken ise pe, subuk dilaki, diberu, anak-anak, kalak dewasa, pengalo cuke, kalak si sakit lepra, termasuk pemimpin agama Yahudi ras kalak Farisi. Si dua golongen terakhir enda si memutusken diri guna ndarami kesalahen Yesus ras kedugenna ersura-sura munuh Yesus.

Geraja Tuhan i bas doni enda, termasuk GBKP, tetap nggeluh i bas kiniersadan ukur, ersada arih. Sabab ‘di kenca la banci sipersada ukurta, megah pe gedung Gerejanta rikut ras kerina peralaten Gerejanta labo lit ertina. ‘Di kenca enggo turah erbelah-belah ras konflik enggo pasti mempengaruhi kerehen perpulungen, semangat perpulungen urak guna berpartisipasi dingen enggo pasti la nari ersada soranta guna muji Dibata, bahkan enggo pasti kehadiren perpulungen labo banci jadi pasu-pasu man sekelewetna tapi jadi batu antuken.

Secara khusus i bas bulan Maret minggu pemena rikutken Almanak Gerejanta maka i je silakoken Musyawarah Warga Sidi. I bas Tata Laksana Bab XXXIX Ps. 164 enggo iaturken kerna Musyawarah Warga Sidi Runggun:

1. Musyawarah Warga Sidi Runggun (selanjutnya MWSR) adalah sarana bagi warga dan Majelis Runggun untuk saling memberi masukan mengenai perkembangen kehidupan bergereja di Runggun dalam bersekutu, bersaksi dan melayani.

2. MWSR bukan sarana mengambil keputusan.

3. MWSR dilaksanaka 1 kali dalam setiap tahun selambat-lambatnya pada bulan Maret dan dipimpin oleh Majelis Runggun.

4. MWSR dilaksanakan untuk mendengar laporan perkembangan jemaat dari BPMR beserta seksi-seksinya, pengurus unit-unit pelayanan, dan pengurus PJJ serta pengajuan usul-usul tentang kehidupan bersekutu, bersaksi dan melayani serta pembinaan guna pertumbuhan Jemaat.

5. Usul/masukan tentang kehidupan bersekutu, bersaksi, melayani dan pembinaan harus ditampung dan ditanggai oleh Majelis Runggun dalam bentuk keputusan pada SMR terdekat.

6. Peserta musyawarat adalah Warga Sidi Runggun dengan ketentuan:

a. Untuk Runggun dengan jumlah sampai 100 keluarga menggunakan sistem langsung (seluruh warga sidi diundang).

b. Untuk Runggun dengan jumlah di atas 100 keluarga dapat menggunakan sistem perwakilan (baik warga maupun pengurus PJJ dan pengurus unit-unit pelayanan yang jumlahlah ditetapkan oleh Majelis Runggun).

Intina, kesempaten MWSR merupaken sarana jemaat mereken masuken-masuken/usul si membangun kenca enggo megiken laporan ras nggejapken sendiri uga perdalanen pelayanen Gereja selama setahun si enggo ibentasi. Sarana si mehuli guna banci mereken usul-usul si membangun guna perdalinen persekutuan, pelayanen, kesaksian rikut keuangen Gerejanta. Jadi labo wadah guna menyerang entah pe mempermaluken ras mandangi dahin Majelis Runggun. Adi kin lit si perlu man evalusin, ikritik seh kel ulina sebab e pasti erguna i bas kemajun Gerejanta. Jadi ula hanya masalah keuangen saja isoroti walaupe enda penting, terlebih adi lenga transparan. Tapi dahin persekutuan, Kebaktin Minggu, partisipasi jemaat i bas kerina kegiaten, Diakonia, ras kegiaten si deban. Si paling penting, Majelis Runggun ras kerina ngawani perpulungen arus ersada arih guna mpekena-kena Geraja Tuhan gelah alu bage Gereja tetap banci jadi pasu-pasu man sekelewet inganna tading.