PA Kategorial GBKP Tgl. 9 - 15 Pebruari 2020

PA MAMRE GBKP TGL. 9 - 15 PEBRUARI 2020

Nrs. Pdt. L. Sinuhadji (Bp. Rey Rapha Tarigan)

Talenta (Gelah kerina Mamre ikut muat bagin rikutken talentana)

Ogen : Keluaren 35:30-36:1 (bdk. Keluaren 31:1-6)

Tema : PAKEKENLAH KEPENTAREN, KENGASUPEN, RAS PENGERTIN

Tujun : Gelah Mamre :

1) Meteh maka Dibata alu KesahNa mereken kepentaren, kengasupen ras pengertin man anak-anakNa

2) Makeken kesempaten si lit sue ras talentana sekalak-sekalak

Ogenta sendah e me pelaksanaan perentah si ikataken Dibata man Musa i bas Kel. 31, i ja ikataken Musa man bangsa Israel ise-ise saja tukang si beluh si enggo ipilih Dibata guna erbahan Kemah Perjumpan (Kemah Suci). Sope ogenta i bas Kel. 31 Dibata enggo nehken perentah man Musa gelah erbahan kerina si niperluken guna Kemah Perjumpan ingan ersembah kalak Israel man Dibata. Kerina si niperluken guna si e arus sue ras kerina si enggo ipedahken Dibata man Musa (Kel. 31:11). Adi sioge benaken bindu 25 seh 31, kerina isina berkaiten ras rincian kai-kai saja si arus ibahan ras ilakoken kalak Israel i bas ibadah man Dibata. Erkiteken ibadah man Dibata e arus ilakoken alu tutus, maka kerina peralaten si nibutuhken pe arus isikapken alu mehuli. Guna si e Dibata enggo nentuken Besalel ras Oholiap guna ndahikenca.

Man Besalel leben enggo ibereken Dibata KesahNa, kenca bage iumputi alu kepentaren, kengasupen, ras pengertin guna merancang bage pe erbahan kerina perhiasen i bas emas, pirak, tembaga, permata, janah ukir-ukiren si mejilena guna itamaken bas Kemah Perjumpan. Man Besalel bage pe man Oholiap enggo ibereken Dibata kengasupen guna ngajarken kebeluhenna man kalak si deban. Janah ituriken i bas bindu 36:1 maka Besalel, Oholiap, ras kerina tukang-tukang si deban si enggo lit bas ia kebeluhen, kepentaren ras pemeteh guna majekken Kemah Perjumpan e, arus ndahiken kerinana sue ras si enggo iperentahken Dibata. 

Jadi i bas ogenta sendah banci isimpulken : 1) Kepentaren, kengasupen, ras pengertin guna membangun kerina si berkaiten ras Kemah Perjumpan rehna i bas Dibata nari. 2) Man kerina kalak si enggo ngaloken kepentaren, kengasupen ras pengertin i bas Dibata nari arus nggit ipake Dibata (engah pe igerakken KesahNa) guna membangun Kemah Perjumpan sue ras peratenNa. 3) Man kerina kalak si enggo ngaloken kepentaren, kengasupen ras pengertin i bas Dibata nari arus nggit ngajarkenca man kalak si deban.

PA-ta sendah lit i teruh tema umum “Talenta (Gelah kerina Mamre ikut muat bagin rikutken talentana)”, tema khusus nina “Pakekenlah kepentaren, kengasupen, ras pengertin”, alu tujun gelah Mamre meteh maka Dibata alu KesahNa mereken kepentaren, kengasupen ras pengertin man anak-anakNa, janah Mamre nggit makeken kesempaten si lit sue ras talentana sekalak-sekalak.

Situhuna adi sinen i bas Kamus Teologi, ratana talenta e ertina ukuran mata uang, entah pe ukuran timbangen logam mulia. Janah adi siperdiateken turi-turin i bas Mat. 25:14-46, i bas terj. TB-LAI (bhs. Indonesia) judulna e me “Perumpamaan tentang talenta”, talenta si lit je la lit kaitenna ras kebeluhen khusus si lit i bas sekalak jelma guna ngelakoken bagi si lit i bas ogenta sendah. Tapi mungkin erkiteken sedekah enda enggo rusur talenta e iertiken sebage kebeluhen khusus, entah pe bakat si lit i bas sekalak jelma, e maka enggo terjadi pergeseren arti. Mungkin akap kami lebih tepat adi ikataken “karunia-karunia Roh” entah pe “pemere-pemere Kesah” si kin memang adi siperdiateken i bas Padan Si Mbaru tujunna khusus guna membangun kula ni Kristus (Gereja, bdk. Roma 12; 1 Kor. 12; Gal. 5; rsd.).

Tapi amin bage gia, PA-ta sendah ngajuk kerina kita Mamre guna : 1) Mengenali karunia-karunia kai saja si enggo ipercayaken Dibata man banta guna membangun GerejaNa. 2) Adi enggo tuhu-tuhu sitandai karunia-karunia (kepentaren, kengasupen, ras pengertin) si lit i bas kita maka langkah selanjutna harus lit kininggiten i bas kita guna secara proaktif makekenca guna kemajun GerejaNa. 3) Nggit kita siajar-ajeren bage pe saling mendukung i bas kerina karunia si lit i bas kita si tujun akhirna e me guna kemulian gelar Dibata.

PA MORIA GBKP TGL. 9 - 15 PEBRUARI 2020

Pdt. Larena br. Sinuhadji (Nd. Rey Rapha Tarigan)

Metenget Ras Megermet

Ogen : Matius 7:15-20

Tema : METENGET NANDANGI PENGARI-NGARI DONI

Tujun : Gelah Moria :

1) Meteh sura-sura Dibata dingen metenget nandangi pengajuk doni

2) Metenget makeken fasilitas TI rikutken sura-sura Dibata

Metenget ras megermet enda biak si perlu kel lit i bas kita manusia, sebab adi la sipake biak si bage i bas geluhta maka banci kita celus ras ceda kinitekenta seh maka geluhta la erbuah. Tahun Pelayan GBKP 2020 enda e me terampil mpergunaken Teknologi Informasi, subuk internet, WA, FB, Line, IG, rsd. I bas si e perlu kel kita metenget, sabab labo hanya si positif manfaatna banta tapi mbue ka si negatif.

Perikop enda ibere judul “Kerna batang ras buahna” ( terj. TB-LAI “Hal pengajaran sesat”). Bas bhs. Indonesia enggo lebih spesifik kerna ajaren sesat si arus itengeti. Hal si pemena si ilumbaken Tuhan Yesus gelah ajar-ajarNa, pengikutNa, metenget nandangi nabi-nabi perguak, si reh menyamar bagi biri-biri si melemuk, tapi situhuna ukurna bagi serigala si merawa. Gelah banci la kita terkecoh, ngasup kita metenget inehen arah buahna, i ja buah e me perbahanenna. Yesus make metafora batang ras buah. Batang si mehuli tentu mehuli ka buahna tapi sebalikna labo banci mehuli buahna adi la mehuli batang e. Konsekuensina maka batang si la mehuli itektek me je nari itamaken ku bas api. Ertina, nabi palsu ras pengikutna iukum Dibata erkiteken perbahanenna si la mehuli. E maka itandai me nabi palsu arah perbahanenna.

Tema i bas PA Moria sekali enda “Metenget nandangi pengari-ngari doni”. I bas Kamus Bhs. Karo, “pengari-ngari” e me : melayani, menemai, mendengarkan keluhan, menanyakan berbagai hal. Ertina, rikutken tema maka kurang masuk tema enda. Banci jadi maksudna metenget nandangi pengajuk doni. Sabab tujun si pemena, gelah Moria meteh sura-sura Dibata dingen metenget nandangi pengajuk doni. Enggo pasti sura-sura Dibata si mehuli, si ngena ateNa, sue kata ras perbahanen, nuriken si tuhu-tuhu labo hoax. Pengajuk doni cukup mbue si banci erbahanca kita papak. Hedonisme : tujun utama nggeluh e me kenikmaten, kesenangen nggeluh subuk konsumerisme, materialistis, seks bebas, konsumsi obat-obaten terlarang, termasuk si perlu gundari man tengeten e me pengaruh Teknologi Informasi (TI).

Kita patut ngataken bujur rikutken perkembangen jaman maka genduari enggo kita bengket ku Revolusi Industri 4.0, i ja teknologi digital enggo ipergunaken secara masif. HP androidta enggo menjadi sada barang kebutuhen man banta, sebab kai pe enggo i je. Berita kai pe banci sidat alu cepat (resep membuat makanan, info diet, khotbah, artis, materi pelajaren, rsd.), kai pe banci si idah bas HP (jam, kamera, kelender, radio, video, pesan makan, pesan tiket, mobile banking, jualan on line, Alkitab, majalah, rsd.). Tapi mbue ka dampak negatifna si arus itengeti. Adi la kita mampu menguasi diri, enggo HP si mengusai kita, HP enggo jadi dibatanta, ku ja pa pe sibaba-baba la pernah tading kecuali mungkin sanga kita medem ras ridi. Erkiteken si e enggo kurang keakrabanta ras keluarganta, terkadang beda bas dunia maya ras dunia nyata (dunia maya menjadi dunia pencitraan man banta), melala informasi si la mehuli, berita hoax, adi la kita metenget banci kita ikut terbawa arus. Tarum er-HP anak-anakta banci terbengkalai, entah anak-anak enggo lupa tugas utamana guna erlajar, rsd.

Labo kita anti teknologi informasi tapi arus alu pentar kita makesa. HP sipake guna nampati kita nehken berita si meriah, berita si mehuli, berita si mereken inspirasi ras motivasi.