PJJ GBKP Tgl. 9 - 15 Pebruari 2020

PJJ GBKP TGL. 09 - 15 PEBRUARI 2020

Pdt. Larena br. Sinuhadji (Nd. Rey Rapha Tarigan)

Tema : DIBATA SI NJADIKEN MANUSIA (Kejadin 2:7)

Konfesi GBKP kerna Manusia

Rikutken Pustaka Si Badia, lit dua versi si ngerana kerna Dibata nepa manusia si saling melengkapi sada ras si debanna. Dua versi enda lit erkiteken sumber si berbeda, e me sumber Y (Yahwis) dan Sumber P (Prister - imam). Tradisi (sumber) P asalna i bas kenca pembuangen. Sedangken tradisi Y lit sope pembuangen. Versi si pemena, Kej 1:1-2:4a (sumber P), maka manusia itepa Dibata sentudu ras tempas Dibata, si menam seri ras Dibata. Sedangken i bas versi si peduaken (Kej. 2:4b-25 - sumber Y), manusia  ijadiken Dibata i bas abu taneh nari je nari iembusken kesah kegeluhen ku bas igungna si erbahanca manusia ndai nggeluh. Ertina, arah dua na versi enda maka manusia e me tinepa, sedangken Dibata si nepa manusia. Labo bage-bage saja manusia itepa Dibata tapi alu sada perencanaan si mehuli ras hasil si mehuli.

Je nari rikutken ogen si jadi renungenta, maka manusia itepa Dibata i bas abu taneh nari. Ertina, manusia pemena (Adam), labo hanya terbentuk i bas taneh nari (Ibr. Adamah) saja tapi pe i bas debu/abu (Ibr. Afar) nari (bdk. Kej. 3:19, “dengan berpeluh engkau akan mencari makananmu, sampai engkau kembali lagi menjadi tanah, karena dari situlah engkau diambil; sebab engkau debu dan engkau akan kembali menjadi debu”). Kata “debu/abu” nuduhken sesuatu si hina (Job 4:19; Mas. 103:14; 1 Sam. 2:8), Abu/debu pe gambaren dukacita entah pe kedukaan  (Job 2:12; Ket. 18:19), bahkan abu/debu pe gambaren sesuatu si rendah, keduduken manusia si rendah (Kej. 18:27). Ertina, jelas maka itepa Dibata manusia labo arah logam mulia (emas, permata, berlian) si banci kataken mehaga ras meherga tapi i bas abu taneh nari si hina, si murah hancur (perper) gelah alu bage la lit sada hal pe si banci ipeganjangken (isombongken) manusia dingen manusia tuhu-tuhu bergantung man Dibata sabab ia hanya abu taneh ngenca.

Tapi kenca enggo iembusken Dibata kesah kegeluhen ku bas igungna e maka mulai nggeluh manusia ndai. Ertina, sope iembusken kesah kegeluhen, manusia terjeng benda mati si la banci erkai pe, tapi erkikteken enggo iembusken Dibata kesahNa maka enggo lit kegeluhen. Kesah Dibata si erbahanca manusia banci beraktivitas, bergerak, erdahin, rsd. Arah si enda jelas, maka arus lit tetap kerembakken manusia ras Dibata si enggo mereken kesah kegeluhen ku bas manusia. Arah kerembahkken manusia ras Dibata maka kai pe si ilakoken manusia tetap si mehuli, si ngena ateNa. I bas waktuna, kenca ibuat Dibata kesah e i bas manusia nari maka mate me ia (Pengerana 12:7, badanna mulihken jadi abu asalna ndube. Kesah mulih ku Dibata sebab Ia nari merekenca man banta).

Rikutken ogen renungenta i bas wari si sendah, lit piga-piga point penting si banci jadi renungenta :

1. Manusia e me ciptaan (tinepa) sedangken Dibata si nepa manusia. Alu bage si metunggung isembah, ipuji, imuliaken e me Dibata ngenca la lit si deban. Bahkan manusia la banci muat kemulian Dibata, sabab lit ka deba manusia ia atena isembah rikutken kebayaken ras kekuasaan si lit bas ia.

2. Manusia itepa Dibata i bas abu taneh nari, gambaren si hina, meteruk, murah perper. Keberadaan si enda si arus isedari manusia gelah ula sempat turah kiniganjangen ukur i bas manusia ‘di kenca lit melekat erbage si mehuli, si merga bas ia, sabab ia debu/abu ngenca.

3. Kesah Dibata si erbahanca maka lit kegeluhen i bas manusia, njemba manusia lako tetap nggeluh rembak ras Dibata, gelah kesahNa si badia si tetap negu-negu kegeluhen manusia.

4. Manusia arus tetap ngataken bujur man Dibata i bas kerina dampar geluhna alu makeken subuk talenta (karunia), gegeh, kepentaren guna kemulian Dibata. Soli Deo Gloria!