PA Kategorial GBKP Tgl. 8 - 14 Maret 2020

PA MORIA GBKP, TGL. 8 - 14 MARET 2020

Pdt. Larena br. Sinuhadji (Nd. Rey Rapha Tarigan)

Bijak Nggunaken TI

Ogen : 2 Petrus 1:3-9

Tema : AKU, TI RAS DIBATANGKU

Tujun : Gelah Moria :

1) Meteh kerincuhen daging si encedaken si lit bas doni enda

2) Matuhi UU ITE si jadi tanda mehamat man Dibata ras ngkelengi manusia

Langkah-langkah i bas mpebagesi bahan pengogen:

1. Bahan (perikop) asa bancina ioge 3 kali gelah banci tangkas man banta kerna isi perikop.

2. Ula lebe sioge bimbingen si enggo isikapken i bas buku PA Moria, tapi pebagesi pengangkan rikutken Firman Tuhan si jadi renungenta.

3. Kai saja si ioge kita?

- Dibata enggo ndilo kita gelah kita dat bagin i bas kemulian ras kiniulinNa.

- Arah padan si mbelin dingen meherga si iberekenNa ngasup kita mulahi i bas kerincuhen daging nari, carana :

- Irakut kiniteken ras kai si mehuli (sungguh-sungguh berusaha untuk menambahkan kepada imanmu dengan kebajikan).

- Rakutken perbahanen si mehuli ras pemeteh kerna Dibata.

- Je nari irakut ka ras penguasaan diri.

- Terus ka irakut ku bas ate megenggeng.

- Je nari arus ka irakut ku bas ate tutus er-Dibata.

- Rakut ka ku ate keleng man teman-teman sapih kalak Kristen.

- Je nari irakutka ku ate keleng man kerna manusia.

- Enda me kerina biak-biak si niperluken kita i bas nggeluh i doni enda, janah adi biak-biak enda turah alu mehumur i bas kita, si e erbahanca maka pemetehta kerna Yesus  Kristus nggeluh ras erbuah. Kebalikenna, adi la lit bas kita biak-biak si bage maka pentang kap mata perukuren, la ia ngasup ngidahsa ras lupa maka dosa-dosana si enggo lepas enggo ibersihken.

3. Pesan kai si ate Dibata ipesehNa man banta? Adi rikutken metode BGA, maka nampati kita alu istilah P3JT (Pelajaran, Perintah, Peringatan, Janji, Teladan):

- Enggo ibersihken Dibata dosa-dosanta maka arus tetap kita ngataken bujur alu kita nimbak sura-sura daging.

- I bas proses kegeluhenta maka arus tetap kita nggeluh i bas kiniersadan ras Tuhan alu tetap nggit ibentukNa: nggeluh erkiniteken, ngelakoken perbahanen si mehuli, lit penguasaan diri, megenggeng, ate tutus er-Dibata, keleng ate man manusia.

Tema “Aku, TI ras Dibatangku”. I bas tahun enda Gerejanta fokus ku bas cerdas menggunaken Teknologi Informasi. Rikutken ogenta maka terkadang la ngasup kita ngkuasai dirinta, si ebahanca la kita pentar makeken IT. Melala contoh-contoh kasus i bas kita enggo ndabuh ka ku bas dosa, ras sipelebeken sura-sura kedagingenta. Berita hoax, berita-berita si membully, memprovokasi, rasis, menebar kebencian, menipu, rsd.

Tujun si peduaken, matuhi UU ITE (Informasi dan Transaksi Elektronik) si jadi tanda mehamat man Dibata ras ngkelengi manusia. UU ITE No. 11 Th. 2008 e me UU si mengatur tentang informasi serta transaksi elektronik atau teknologi informasi secara umum. Secara khusus i jenda itamaken kami hal-hal si penting (primer) i bas UU ITE No. 11; Ps. 27, larangan mendistribusikan informasi elektronik bermuatan: asusila, perjudian, pencemaran nama baik, pemerasan dan atau pencemaran. Ps. 28. berita bohong: kepada konsumen; terkait suku, agama, ras dan antar golongan. Ps. 29, ancaman kekerasan dan menakut-nakuti. Ps. 30, mengakases sistem elektronik milik orang lain: dengan cara apapun, mengakses dan mengambil, menerobos. Jelas, adi la sieteh UU enda, janah kita termasuk pengguna teknologi informasi (media sosial), dingen silanggar UU enda banci kita ikenai pasal enda.

Tema “Aku, TI ras Dibata”. Rikutken jaman si genduari, maka TI merupaken kebutuhen man banta, sabab enggo jelas melala hal si positif si banci sidatken kita. TI mempermudah aktivitasta, mempermudah komunikasi, la lit nari jarak ras batas (kerina enggo banci cepat ras dekat aminna situhuna jarak memisahken), mempermudah ndatken erbage-bage informasi si ibutuhken, rsd. Ertina, teknologi infomasi hadir nampati kita manusia. Tapi banci ka kita ikuasai teknologi informasi seh makana enggo ia jadi dibatanta ras la nari kita mpermuliaken Dibata arah TI. La kita ngasup nimbak sura-sura daging erkiteken penyalahgunaan Tehnologi Informasi. Pentar kita makeken sosial mediata gelah tetap sicidahken tanda keleng ateta man manusia dingen kehamatenta man Dibata. Jadiken TI alat guna erberita si mehuli, nehken Berita Si Meriah, si menginspirasi, si membangun.

PA MAMRE GBKP TGL. 8 - 14 MARET 2020

Pdt. Larena br. Sinuhadji (Nd. Rey Rapha Tarigan)

Peningkatan Ekonomi melalui TI

Ogen : 2 Tesalonika 3:6-10

Tema : JADI USIHEN I BAS ERDAHIN

Tujun : Gelah Mamre :

1) Meteh maka Paulus tutus ras mejingkat erdahin guna man usihen perpulungen

2) Alu tutus ras erbintuas ndahiken dahinna guna keluarga ras si nterem.

Metode : Sharing ras Aksi

Langkah-langkah i bas mpebagesi bahan pengogen :

1. Ogen (perikop) asa bancina ioge 3 kali gelah banci tangkas man banta kerna isi perikop.

2. Ula lebe sioge bimbingen si enggo isikapken i bas buku PA Mamre, tapi pebagesi pengangkan rikutken Firman Tuhan si jadi renungenta.

3. Kai saja si ioge kita?

- Sirangi kerina kalak si perkisat.

- Usih Paulus maka la ia perkisat asum ia lit i tengah-tengah perpulungen (bdk. 1 Tes. 2:9, “O senina-senina, tentu ingetndu denga kelatihen kami erdahin! Erdahin kami suari ras berngi gelah ola kami jadi tanggungenndu kidekah kami meritaken Berita Si Meriah si rehna i bas Dibata nari man bandu”).

- La ipanna nakan kalak alu la nggalar.

- Erdahin ia alu latih, erdahin ia ras team suari ras berngi gelah ula ia memberatken perpulungen (bdk. 1 Tes. 2:7, “Aminna pe lit hak kami mindo kai-kai pe i bas kam nari erkiteken kami rasul Kristus. Tapi asum kami i tengah-tengahndu melias kami man bandu, bagi sekalak nande nandangi anakna”). Sabab konteks paksa si e pe, i tengah-tengah perpulungen nggeluh i bas erbage-bage kiniseran erkiteken kinitekenna man Kristus, termasuk i bas masalah ekonomi. Nterem ka perpulungen si la nari erdahin. Maka, Paulus la nari atena memberatken perpulungen.

- Si enda ibahanna labo perbahan la lit hakna guna mindo penampat man perpulungen, tapi gelah jadi usihen si mehuli man perpulungen.

- Kalak si la nggit erdahin ola bere man.

4. Penjelasen terdauhen rikutken tema. Latar belakang surat enda, maka paksa si e enterem kalak Kristen i Asia Kitik ngenanami kiniseran erkiteken kinitekenna man Kristus. Deba-deba megenggeng, deba putus asa, bene pengarapenna. Persoalen si peduaken, bas perpulungen turah kebingungen kerna kerehen Yesus si peduakaliken. Lit deba ngatakenca kentisik nari Yesus reh entah enggo kap reh si erbahanca mpengaruhi mentalitas perpulungen seh makana enggo kisat erkai pe. Padahal jelas kesaksin Firman Tuhan, maka kerna kerehenNa ise pe la metehsa, si penting kita arus ersikap katawari paksa pe. Terlebih alu kiniseran si ialamina, bagi perpulungen si enggo bene pengarapenna, kabar Yesus kentisik nari reh erbahanca jadi sada solusi guna pedas-pedas lawes nadingken doni enda.

Janah judul i bas perikop enda “Tanggung jawab guna erdahin” (terj. TB-LAI “Berdoa dan bekerja” tidak ada pembagian judul). Secara khusus i bas perikop enda Paulus menasehati perpulungen gelah ula erteman ras kalak perkisat dingen ula perkisat (ay. 11, “Lit piga-piga i bas kam perkisat, si la kai pe ibahanna seyakaten ncampuri sikerajangen kalak”). Sabab adi erteman kita ras ia, adi la megegeh pendirianta enggo pasti kita ipengaruhina. Si tangtana la kisat piah dungna jadi perkisat. Jadi usihen la kita khususna Mamre i bas erdahin. Rikutken tujun si peduaken, maka Mamre alu tutus ras erbintuas ndahiken dahinna guna keluarga ras si nterem. Mentalitas erdahin arus nggeluh i bas diri Mamre, erdahin alu mejingkat, ras sidahiken dahin si mehuli si ngena ate Dibata. Perkisat arus sibeneken i bas diri Mamre sabab labo lit ulih sialokenna seyakaten kemusilen ras kesengsaraan.

Erdahin e me anugerah si ibereken Dibata man banta sabab arah si e banci kita ncukupi kebutuhenta, keluarganta rikut jadi pasu-pasu man kalak si deban si membutuhken. Sabab adi la kita erdahin entah perkisat enggo pasti kita jadi beban man kalak bahkan lit pe sura-sura nampati teman si membutuhken la banci sisehken erkiteken keterbatasen si lit bas kita.

Rikutken perkembangen Teknologi Informasi, maka enggo arus Mamre meng-up grade diri guna banci mpergunaken sosial media i bas meningkatken ekonomi. Alu nambahi pemeteh arah paltform training khusus pekerja, profesional dan pelaku UMKM lebih baik dan naik kelas, makeken media sosial i bas memasarkan produkta, membuka jaringen ras badan-badan usaha si deban, rsd. Intina, Mamre arus jadi usihen i bas erdahin.