PA Kategorial GBKP Tgl. 1 - 7 Maret 2020

PA MAMRE GBKP TGL. 1 - 7 MARET 2020

Cal. Pdt. Albert Ginting

MEDIA SOSIAL

(Cerdas Menggunakan Media Sosial/Hoaks)

Ogen : Masmur 19:15; Kuan-kuanen 17:27-28

Tema : Beluh Ras Pentar Make Media Sosial

Tujun : Gelah Mamre :

1) Ngasup njaga perukuren ras pengerana bagi si ngena ate Dibata

2) Meteh makeken media sosial alu mehuli

Metode : Sharing Pengalaman

Masmur 19:15. Pustaka Sibadia “Min ngena min Atendu rananku ras perukurenku, O TUHAN, kam kap kecionku dingen penebusku” (TB-LAI) “Mudah-mudahan Engkau berkenan akan ucapan mulutku dan renungan hatiku, ya TUHAN, gunung batuku dan penebusku”.

Ibas ayat 15, pemasmur nuriken pengarapenna gelah ia ngasup ngerana ras rukur bagi singena ate Dibata. Pemasmur sedar maka Dibata nge si ngasup ngelakoken si ipindona, emaka iturikenna man Dibata. I jenda pemasmur mindo gegeh man bana maka ia ngasup nggeluh ndalanken undang-undang Dibata.

I bas kitab cakap Karo nina pemasmur: “min ngena ateNdu…”, kata “ngena ate” ibas cakap Heber make kata rason. Kata enda megati ipake ibas Padan si Ndekah si ncidahken keriahen ukur Dibata, nandangi persembahen/kurban umatNa si bersih (Im. 1:4). Jadi ngena ate Dibata pengerana ras perukuren ndesken persembahen si bersih. Janah ibas Jesaya 42:1 kata enda bermakna ngena ate Tuhan nandangi serayan/hambaNa (Mesias). Jadi ngena ate enda tuhu-tuhu mendalam.

Kuan-kuanen 17:27-28. Pustaka Sibadia : “Kalak si beluh rukur iangkarna nge ngerana, kalak si saber ukurna ia kap kalak si pentarna. Kalak bodoh pe iakap cerdik dingen pentar, adi ia sinik dingen la ngerana” (TB-LAI “Orang yang berpengetahuan menahan perkataannya, orang yang berengertian berkepala dingin. Juga orang bodoh akan disangka bijak kalau ia berdiam diri dan disangka berpengertian kalau ia mengatupkan bibirnya”

Ibas ayat 27… Ituriken kerna meteh kalak pentar teridah arah sikap ras pengerana. Ibas ayat 27 isingetken maka kalak pentar meteh angkar, terlebih-lebih ibas pengeranana. Janah saber ia. Saber ibas bhs. Indonesia ertina “berkepala dingin”. Meteh angkar ikombinasiken ras kepala dingin, maka kalak pentar e meteh katawari ia ngerana, sikatawari sinik, kai si icakapkenna, hal-hal kai saja si icakapken, ja inganna.

Janah si paling penting iukurina lebe kai si ibelaskenna, sabab kai si nggo ndarat ibas babahta nari lanai banci mulihken. Kalak pentar la reaktif, ia tenang. Alu bage bicara lit pe pengerana kalak si la bagi ukurna tapi carana ngaloisa la erbahanca ia ndabuh ku bas kecedan, kelepaken si seri bagi ilakoken kalak, tapi pengerana e bagi lau si penimpet api si gurlah.

Ibas ayat 28, ikataken maka sikap si tepat maba kiniulin. Salah sada terjemahan Alkitab kata “sinik” iterjemahken “menahan lidahnya”. Sekalak si ngasup mengendaliken perkataannya, menahan diri tetap diam (banci jadi erkiteken la iangkana, atau banci jadi itehna pengerana banci maba kecedaan). Tentu kepentaren jenda labo sekedar predikat/gelar, tapi nuduhken kondisi si menyebabken kalak ngaloken kiniulin sebage ulih kepentaren.

Rikutken tujun sipemena, maka Mamre ngasup njaga perukuren ras pengerana bagi si ngena ate Dibata. Bahanta jelas mabai kita gelah tetap nggeluh i bas UU Dibata. Alu kita makeken kata Dibata. Janah rikutken tujun sipeduaken, maka pentar kita makeken Media sosial. Ertina, perukuren simehuli mabai kita ngasup make media sosial alu pentar (3 B : Baik, Benar dan Berguna). Melala contoh-contoh sibanci siidah kita arah Media sosial tersampat kel kita Subuk informasi sibutuhken kita, Renungen Firman Tuhan sibanci mpegegehi kinitekenta, rsd. Bage pe contoh si la mehuli, berita hoax, membully, penghinaan (Fota kepala negara igantiken ras kepala binatang) rsd sibanci banci kataken labo membangun. Erkiteken si e, selaku mamre pentarlah makeken media sosial gelah arah si e pe gelar Dibata terpuji.

PA PERMATA GBKP TGL 1 - 7 MARET 2020

Pdt. Larena Sinuhadji (Nd. Rey Rapha Tarigan)

MUSYAWARAH SIDI

Nas : 1 Korinti 14:26-40

Tema : METUNGGUNG DINGEN RATUR

Tujun : Gelah PERMATA GBKP

1) Meteh pentingna Musyawarah Ngawan

2) Ikut Muat bagin i bas perdalen Gereja

Jemaat Korinti i ja Paulus nehken suratna banci kataken jemaat si rusur berkonflik, perpecahen, kelompok-kelompok (lit kelompok Apolos, Kefas, kelompok Kristus). Janah benaken 1 Kor. 12 situhuna i je Paulus enggo ngerana kerna pemere-pemere Kesah (karunia-karunia Roh) si pelain-lain si arus ipakeken dalam rangka membangun perpulungen. Maka gambaren kerna perpulungen si ipakeken Paulus e me kula si mbue ring-ringna tapi tetap sada. Bage kita, perpulungen, enterem erbagena, rikut karunia si pelain-lain tapi arus saling melengkapi guna nehi sura-sura si seri e me mpermuliaken gelar Dibata. Janah pemere si mbelinna kel si enggo ibereken Dibata man banta e me kekelengen. Kai pe si lit bas kita adi la lit kekelengen la lit ertina.

Secara khusus i bas perikop enda si ibere judul “Kiniraturen i bas perpulungen” ngerana tole kerna karunia si ibereken Dibata si banci ipakeken i bas kegeluhen perpulungen. Sope perikopta (bindu 14:1-25) situhuna i je Paulus enggo nerangkenca maka ibereken Dibata pemere-pemere kesah (karunia) guna membangun perpulungen. Tapi kepeken lit piga-piga perpulungen si kedungenna lebih ngayaki pemere berbahasa Roh ras kedungenna enggo ndabuh ku bas kesombongen rohani. Sabab bahasa Roh ‘di kenca la lit kalak si beluh ngatusisa maka sia-sia ibelasken dingen la membangun perpulungen. Emaka Paulus ngatakenca maka amin pe beluh ia bahasa Roh, la pernah ipakena i bas perpulugen adi kin la lit kalak si beluh ngertikenca (ay. 18-19). Sabab nina Paulus, maka pemere ngerana i bas cakap Kesah jadi tanda-tanda man kalak si la nggit tek, labo man kalak si tek, tapi pemere ernubuat, e me guna kalak si tek, labo man kalak si la nggit tek.

Ras i jenda Paulus mereken masuken si mehuli si banci ipakeken i bas perpulungen khususna i bas kebaktin (ibadah) jemaat. Erbage-bage hal banci ilakoken : lit si ngendeken ende-enden, nehken pengajaren, nehken perkara si ipetangkas Dibata, nehken berita i bas cakap kesah, nuriken antusen i bas cakap kesah e. Secara khusus i jenda Paulus nehken penekanen kerna si ngerana i bas cakap Kesah, cukup dua entah telu kalak saja, janah sekakak-sekalak ia ngerana. Janah adi la lit beluh ngertikenca, madin sinik saja ia bas perpulungen. Janah si e kerina arus ilakoken dalam rangka membangun perpulungen (majeken perpulungen). Ertina, si terjadi paksa si e, kerina jemaat berpartisipasi rikutken karunia si lit bas ia janah secara spontan ilakoken. Enggo pasti kurang ratur-ribut. Sabab kerina atena erlumba ncidahken karuniana. Karunia-karunia e arus ipakeken alu ratur ras metunggung (sopan). Alasen enda ilumbaken Paulus erkiteken:

- Dibata si mereken karunia-karunia si pelain-lain emaka tetap Dibata si imuliaken ula sempat turah kesombongen.

- Dibatanta e me Dibata kiniraturen.

- Adi karunia-karunia e secara bergiliren ras ratur idalanken maka enggo pasti membangun perpulugen (kerina ndatken pengajaren ras ipegegehi, ay. 31).

Rikutken bahanta si ikaitken ras Musyawarah Ngawan maka PERMATA selaku bagin i bas kula ni Kristus arus terlibat i bas dahin-dahin Tritugas Gereja. Ula si maba jerona. Maka i bas MWSR ilaporkenka kerna kegiaten PERMATA rikut program si bakal ilakoken i bas tahun enda, gelah alu bage lit koordinasi si mehuli ras Runggun ras ngawan perpulungen janah jemaat pe banci mereken usulen si membangun guna Kategorial PERMATA.